ipro 12 - Mataafa Qulqulloota

Waaqa akka Aappinno kodde

¹ Qootan maakkiyyoosen a urratta' mina ino kapa tiitayshe piisa qapno malla, ino wa haadeta ino qara' kodde piisa ka juppoota ino quda' jaqqalte alle iskapa sekanna ka nyeroosen a keeritta ino turaayye ca duupattaan japaattaan keerra.

² Keerittinno nefo, Yesuusise amanteetinno paayye ka quda qaja dawre tooyaannen keerra. Isha, xasa a isha tura' xaayame minaanne, jeera a masqala qara to'eta a weti in diknin mali, rakkoota masqala isho a toota' duupade ka suufaana Waaqati akkitta' kute'e.

³ Semmalla, a' paknin ka xasa a' murrin maliiyyi Yesuusise toorosen a juppoolaya' piisa duupade quda tooya.

⁴ Ishina' juppoota oli sooteetanne haka' leenittane a ikkisanne.

⁵ Waaqa isase a hellaadi mina ishin dehaame ka kide, “Innaayyo, dehaamta Poqalla in tuffadan, ka oto ke fuknooyye, xasa an muran.

⁶ Poqalla nama a jaalanno fukkini, ka a innaadi mina' dikno qattaani itteymiten.”

⁷ Waaqa qoota a hellaadi' mina ishin dikno malla, qitaateta duupada. Inna a aappaaysho ishootta qattaani in kinnini a xaamane?

⁸ Oto qitaateta a hellaa tika' kodde teyyannaan a' teyyanni a' kinniniiyyi, ishina a hellaa tika'en.

⁹ Se maliiyyiiw, ino aappada a ino xaaye, a ino qattaana in qapna ka ishootta ulfeessininna. Ka kuli caattaan kallaatta'e a qaran qapto'e kuli atta aappinno a hapurati ajajama ino parpaaccisni in kinnin!

¹⁰ Ishootta akka ishootta' paxaari qara'e eta shakkaya kara' ino qatta'en. Waaqa xoori, akkan qulqullumaadippa qoottanno'e, a paxaarati ino qattaani.

¹¹ Qitaateta piisa etoosenetiiyyi, wa nama nyarrahasiisna diisheey, a xasanno in pahan. Xoori kuli'i orra a kollade'e, dalta hanqeelluma a kara nakayta co qeenni.

Dehamta isho wa tooytaatta parpaaccisnitta

¹² Semmalla harkaassin a kafade isho loqqaassin a nukkullaade kokkonnaysha.

¹³ A hekkello akka himintoppa olmina in maynin ka dino'e, loqqaassina'e poraayshin qajeelsada.

¹⁴ Qulqulluma mali nama takka nefo poqalla akkeeta ettaninni in cooy, nama piisa olliiyyi nakaytan kallaada ka qulqullumaan kallaatta' japaada.

¹⁵ Ishin oppa, akka nama takka nefo'e, daassata Waaqa in kalinnini'i tooytaada. Ka akka hittina a dalta haddaawnito dallo ishin oppa in dehenin ka ishina in rakkaccisnin ka orra lekayta in nyalinnini'i, isi tooytaada.

¹⁶ Nama a sharmuuta kodde, taaki a Eesaawi mina amanteetaadi alle' diishe ka damta eta takka' malla qartumaadi kate akka ishin oppa in kinnaannini'i, tooytaada.

¹⁷ Se kammaayye Eesaawi, ete sakase teyyatta fadeeyye, akkima dawrame i'uptan. Kadi punu pooyna ka a kuttati sakase' faanaayye, akkatta in ettaninne. Umma juppootoppa oora'e aroota in akkanne.

¹⁸ Ishina irrootase a Siina harkan qappatammitto taaki apittan kupannitto kapa a' kayne. Umma urrattase tukkane ka tukkantase poora ka puppeetase kapopa a' dehaanne.

¹⁹ Umma pora nessase a kaasa dawammoti taaki pora a qaalese lelammitto dakaannitto oppa akayne. Orra qaalese dakaye iqinsade ka kide, “Arepa desa qaaleta pila ino'en lelammin.”

²⁰ Ajajase kiino, “Oton horeeta nefo irrootose' quda kayaayye, a dakaan dakkamto ka tooto.” Qoota ishootta qara ulsaade malla haada in ettaninne.

²¹ Wa akkaanna' qoota a kuttati orra fuurinnaan malla, Muuse kuli ikide, “Anti in fuure ka xare.”

²² Ishina' xoori irroota Siyyooni kapopa idehaatten isheetta nefo Yursaalami a moonta; katamasene a caattampayta Waaqa ka erkampattoowwasene kumadda lekaya kapa' dikamma xasan ollopa aane kapopa dehaatten.

²³ Ka xorase a orra amannooti qarammasene a tika kiristaana, isasene a maxxadaasso moonta' taafamene kapopa dehaatten ka Waaqase orra piisa qara' farato isho napsewwa a hanqeellayasene qaja dapeetoppa kaye kapopa dehaatten.

²⁴ Ka Yesuusi, isase kodayteeta haaraya'e otantitta a ollopa deexno kodde ka diikase' xaadi fidame ka wa diika Apeeli qaropa a jaalla haasawanno kapopa idehaatten.

²⁵ Akka sede haasawanno dakaya a tiinnini'i istooytaada. Orrase wa Waaqa piita qaraayye nama qudan ishootta' haasawanna, dakaya tiite ete in pahaniniiyyi ka kuli ino a moonte xata ino' haasawanno, oton an dakayni an kinniniiyyi attan paha ettaninna?

²⁶ Sitiiyyi qaaletaadi piita lellehisse, amma xoori qaaleta kale ka kide, “Piita pattan ma, takkannen oppa' oora ka moonta kuli lellehesha.”

²⁷ Qaalese' kiinitto “Takkannen oppa' oora” Wa akkinnitta, wa lellehni in kinnin akka kokkonnaadan ka kallaadan; wa lellehena taaki a uumame ka patane lelli.

²⁸ Semmalla, ino' qootan mankisteetase lelleheni in kinnin lehanno malla, Waaqa kalataysanna ka saanta a isha xasannittonne isha ulfeessa ka fuureetanne isha kela koda koona.

²⁹ Waaqinno apitta a kupno minaay.