ipro 11 - Mataafa Qulqulloota

Amanteeta

¹ Amanteeta kideeta, wa kippeetan asannaane “A keeto kodda” kideetan dukaysannaane ka wa ilda tura akkini in kinnini akka akkaannaan mina' dikeeta.

² Orra xatta, amanteeta minanne kalataysame.

³ Kaaskella piisa akka qaaleta Waaqatin uumamen, amanteetannen upnaanninna. Semmalla wa akkaanna, piisa akkima wa akkaanni in kinnini oppa kodamen in upna.

⁴ Apeeli amanteetanne kalisoota a Qa'eli qara qapto Waaqa' kalshe; eta Waaqa daassata Apeeli xasan teyyadeeyye, Apeeli akka amanteetaadin hanqeellitta kodde i'ishi' maakkumamte. Apeeli kadi punu to'eeyye, amanteetaadi qudanne amma ikki' haasawanni.

⁵ Henooki akka toota isha qara in kaynini'i, amanteetanne moontopa qeedame. Qoota Waaqa isha teyyade malla umma in teyanne. A in qeedammin turanne, akkima Waaqa xasayshe i'ishi' maakkumamte.

⁶ Umma amanteeta maliiyyi Waaqa xasassa opani ettaninni in caan. Nama Waaqa kapopa dehaanno, Waaqa akkima co ka orra isha faano rapno amaneeta isha faani.

⁷ Qoota wa sitiiyyi ildaan akkaanni in kinniniti desa Waaqa ete turadesaaw ishi' leleeyye Noohe Waaqa fuuretanne, toolaadin paha'e, amanteetan markapa kode, amanteeta Noohe minanne piita akka juppolayteeta koddite ikka upnaysamte ka qara' faratamte. Noohe ka hanqeellumasene amanteeta qudan teyanna' lehade.

⁸ Aprihaami, akka sooko ka piitase a lehanda teyyado oppopa aano'e ete halaameeyye, ayshopa akkima anno kadi punu in upniniiyyi, amanteetanne anta' ajajame.

⁹ Ka amanteetanne Hisaaqi isho Yayqoopi isasene isha olli qaalese a kippeeta lehada olliiyyi piitase a kippeeta kara'e kalayta kodde ka tukkana kela' kallaade.

¹⁰ Wa malla asse kode nefo, qoota katamaasene kiritta kokkoka Waaqa koda' qapade ka kode, asanno malla.

¹¹ Saara'ew, Waaqase kippeeta ishi' daashe akkima a amanammo kodde qoota upnaatte malla, kadi punu parraadi tarpen ikka inna xaaya in ettaninnin nefooyye, amanteetanne hupna a ishin inna xaayo akkaate.

¹² Semmalla, Aprihaami takkayta isase nama to'e kapa' dikammo karaayye sanynyeeta a lekuma hikka moonta isho hinkaajjeta daka kela' pahato ka teyatte.

¹³ Sene piisa tooy, a amanteetan caaneeyyeew le'en. Umma waasene a Waaqa akka ishootta' daasho ishootta kippeeta daashe in akkanne, ma lake desa akken ka akka akkaden kapa' diken ka xasan teyyaden ka akka piita qaraayye xaykitta ka kalayta kodden upnaaden.

¹⁴ Orra issi kalayta ka hapta kiino, akkima piita a xaaysho koddito asanno fayya'e akkinni.

¹⁵ Kadin piitase a kara sookene matte oorsaden kiiteeyye, eyyepa tiitaawa ettaninni heenen.

¹⁶ Amma xoori, piitase jaallitto ka moonteeyye kitto yaatanni. Semmalla Waaqa qoota katama ishootta' harmishe malla, kati “Waaqinno” kidan ka isha halaneeyye, ishi' jeera in koddito.

¹⁷ Aprihaami, ete ekkaysatameeyye, amanteetanne Hisaaqi kalisoota' kalshe. Isase a Waaqa ishi' kippeeta daashe ka innaadi takkan kalisoota' koda harmisade.

¹⁸ Ma a Waaqa i'ishi' kide “Sanynyeetaayti Hisaaqi qudanne halaamta.”

¹⁹ Waaqa akkima tootoppa orra xa'issa ettaninno Aprihaami qoota amane malla; takka Hisaaqi tootoppa xa'e mina'e Hisaaqi akkade.

²⁰ Hisaaqi, amanteetanne qoota wa itturopa koddaati desa Yayqoopi isho Eesaawi' sake.

²¹ Yayqoopi ete eta a oppa to'o dehaannaneeyye, amanteetanne matta mattan hellaa Yoosefi' sake ka xalittaadi quda elle ka Waaqa' sakatade.

²² Yoosefi'iw, ete eta a oppa to'o dehaannaaneeyye amanteetanne akkima Isira'eeleta piita kipsi kara sookto haasawade ka qoota lafaaditi desa wa koda ishootta parpaaccisnitta ishootta ajaje.

²³ Muuse ete deladeeyye, toolaaysho akkima xarjaalliyya inna' koddene qoota akken malla, a ajajase a nuqusaseti in fuurrin mali amanteetan leya sessa isha juuten.

²⁴ Muuse, ete kuttade kammaayye, amanteetanne “Inna enenta Feri'ooni” kidama ka halaama tiite.

²⁵ Semmalla isha' xasase a eta' desa juppootan teyanno kapaayye, samayta Waaqa olli rakkoota teyyatta reexade.

²⁶ Qoota rapoota a itturopa akkado akke malla, teyanta piita Kipsi kapaayye, akkima Kiristoosi malla jeera teyyatta jaallitto dikade.

²⁷ Ka a miira nuqusaseti in fuurrin maliiyyi, amanteetan piita Kipsi kara sooke. Ka akkima nama, Waaqase akkaanni in kinnin akke mina'e kokkonnaade.

²⁸ Erkampattootase hellaa qaramma kodde lessaata' ajajamte akka hellaa Isira'eeli a qaramma kodde in lennini'i, Muuse amanteetanne taanteta a qaran tarpeeta ka a diika fiddeeta' kode.

²⁹ Isira'eeleta amanteetanne akkima orra a piita kokte oppan tarpino mina'e, pakateeta tiima oppan tarpite. Kipseeta xoori, ete asseew tarpa ekkaysatteeyyew, piisa karopa jimme.

³⁰ Isira'eeleta, ete kawwatta Iyaarko kapa' kuyyaata tappa tiitaawte kammaayye, amanteetanne kawwattase qitisse.

³¹ Sharmuutitteetase ra'api, qoota lettissampaya nakaytan teyyatte malla, akka orra ajajammi in kinnin olliiyyi in toonini'i amanteetanne pahate.

³² Semmalla se qaropa maanan kida? Qoota Kediwooni ka a Paraaqi ka a Somsooni ka a Yooftaahe ka a Taawwiti ka a Saamu'eeli ka qoota xuumampayaatti desa, akkan an torrinini'i, eta ana' qajni.

³³ Ishootta amanteetanne mankistewwa puten ka dukaata farataan orra mukshen. Ka kippeeta a ishootta' daasamte akkaden ka karmada tupa afa dufen.

³⁴ Ka hupna apitta' libbishen ka koraateeta kela pahen ka nukkullumaappaayye kokkonnaaden ka orannaappaayye hupnampaya kodden ka xela oranna a nyaapa kodde ka piita torpa de'e kamma daanen.

³⁵ Iskatta ka daltayaasso a le'e ka tootoppa xa'e akke. A demoow oto tootoppa xa'aneyye, akka caatta a qara qapo akkadane'e akata tirarraawen ka hidaappa nefo furama kuli tiiten.

³⁶ A demoow, qora seesa'e kodden ka karafamen; a demo ka siplan korpamen ka tikka hida' kelopa dakkamen.

³⁷ Ka dakaan dakkamen ka shiifan lakki' kakkaamaden ka koraatetan leysamen ka oyleeta kaharra isho a telalla uwwisaden ka pora rarraataawen ka teekolaya isho a pora daanamma' kodden ka qara kahatamen.

³⁸ Piita pora Ishootta' parpaaccisni in koddini; Ikka koommayta ka irrowwa qara isho rahana ka qaawwa a piita' kara pora rarraataawen.

³⁹ Sene piisa kadi punu amanteetaaysho malla ishootta maakkumamteeyye, kippeeta a ishootta' daasamte in akkanne.

⁴⁰ Qoota Waaqa wa jaalla ino' harmishe malla, ishootta ino maliiyyi xawwaati a qaja dape kodda in ettanshan.