ipro 10 - Mataafa Qulqulloota

¹ Seera, waasene' paxaara itturopa de'ati pahana diisheey, pissaaysho a keeto'en. Semmalla, orra para piisa kuyyaata mina kalisowwa a dehaade qapanno ka Waaqa turopa dehaanno a qaja dapeeti kodeeta pakkanna ettaninni in co.

² Kadin seera a qaja dapeeti ishootta koda ettaninni kiiteeyye, orra a Waaqa waaqaysatta' deeno, saanta a oppa oora in qapninin qoota juppootaaysho oppa qulqullaawan malla, dikattaaysho a karan xata, karaayye akkima juppoota ishootta qara in kinnin ikka ishootta' dakaatto malla, helani kalisowwa dehassa alle qaatinni heenen.

³ Kalisoowwosen xoori, kalisoowwa a ishootta paroppa juppootaysho matte ishin oorsannaane;

⁴ maana malla, diika a haariyya xormada isho a tela, juppoota haqeeta ettaninni in cooy.

⁵ Semmalla Kiristoosi ete piita qaropa de'eyye ikide, “Atti kalisoota isho daassata a' faane ma, dakinta' ana harmisse.

⁶ Kalisoowwa kupanna isho, kalisoowwa haseenta juppoota malla dehannaatin a' xasoonne.

⁷ Sitiiyyi an ka kide, ‘Oo Waaqqo, akka mataafoppa qootiyyo desa taafamte mina'en, heennaatti koda' de'e.’”

⁸ Paayyota qaraayye kadi punu wossen akka koddane'e seeroppa ajajameneeyye isha ikide, “Kalisoota ka daassata ka kalisoota a kupannitto, isho kalisoota haseenta juppoota malla dehaannitto a' faane, umma a ishin a' xasoonne.”

⁹ Kamma desaaw, ikide “Tin anti heennaatti koda'en de'e.” Ka sedenne kalisootase a lammatta pakkaadippa qaatissa'e a paayyota' shaare.

¹⁰ Ka qaalese “Heenna” kiinitto qara'e, qoota Kiristoosi saanta oppa oora in qapninin takkan kalisoota kodde ka dehaade malla an ka qulqullaawne.

¹¹ Qeesewwa piisa ka kalisoowwasene juppoota patissa ettaninni in kinnini kuyyaata mina' dehassaanne qa'anni ka koda kooni.

¹² Kiristoosi' xoori, takkayteetase a kalisoota a awta piisa koddite ete kalshe kammaayye harka Waaqa Aappaati akkitta' kuti'e.

¹³ Arepa desa oori haka nyaapaadi hupnaadi a ukkumeeta kelopa oorro kara'e asada.

¹⁴ Sede nefo wa malla asse koddite, qoota isasene qulqullaawna kalisootaadi takka minan a qaja in qapniniti ishootta kode malla.

¹⁵ Hapura Qulqulloota' nefo qootoseti desa ino' maakkummi ka paayyota' kiini,

¹⁶ “Poqalla ikiini, ‘Kuyyawwosen kammaayye, kodayteeta an ishootta olli kodado sede: anti seeriyyon karittaysho kara' xaaya, ka mattaaysho kara' taafa.’”

¹⁷ Ka kamma' kiiniwwi, “Arepa desa oori, juppootaaysho isho kodaaysho a neeqa ishootta qara an dikado.”

¹⁸ Semmalla, oto juppoota piisa alle' diisamtooyye, arepa desa oori, kalisoota a haseenta juppoota malla kalto in caatto.

Waaqa kapopa dehaatta ino faani

¹⁹ Semmalla, hellaanno a kiristaanatiiyyi, diika Yesuusinni qulqullitteeta qulqullowwa karopa kulla'e maxanyuma in akkanne.

²⁰ Pora an oppan kullino nefo, kaarantase' qudanne; se kideese' nefo haarayase a pora caatta daanno a dakintaadin ino' pane oppannen kullina kideeta.

²¹ Qeesitta kutta, a tika Waaqa qara hupna ukkumeeta' qapon qapna.

²² Semmalla, akkan dikattinno a karan xata neeqa oppaayye qulqullaawno'e karittinno fiddanna ka pisha paxaaraatin jaqqanna ka karitta a fayya isho amanteeta dukaatatin Waaqa kapopa dehaanna.

²³ A qaaletose a kippeeta ino' daashe qoota a amaname kodde malla, kippeetose an amma amanne ka maakumminno an arepa ka arepa an kiini maliiyyi kokkonnaysanna ka qapanna.

²⁴ Ka akkan jaalala isho koda paxaara kodeetan kallaanno'e, atta akka olnyerissa ino faanitto,

²⁵ ka awta piisa ollopa anna ka oli kokkonnanna diisheey, akka orra demo ollopa anta alle' diishe mina'e, ollopa anta akkan alle'e an diinnin; laadi sekapaayye, kuyyaata deena Poqalla akka dehaatte matte oorsatta ka a qaran qapto sede koona.

²⁶ An dukaata upnaanne kammaayye, oton an upno qara'en juppoota kooninnaayye, arepa desa kalisoota a qoota juppootinnooti desa kalto takka nefo in kinnaatto.

²⁷ Wa arepa desa hase, firteetase' deena qara kitto orra fuurinnitto isho apittase, toorampaya Waaqa' kupo, orra fuurinno.

²⁸ Nama a seera Muuse qepshe, oton nama lakki taaki sessa qara' maakkumaayye, ishi diisammi in kitto ma tootanne qatta'ammi;

²⁹ Ka kuli nama a inna Waaqa' qara loqqaan aane ka diikase a kodayteeta a ishin Qulqullaawe nyalshe ka Hapurase a daassata Waaqa ino daanno ote, firteeta a qaran qapto a atta pahatto isha parpaaccisni, ishina' pahata?

³⁰ A kide, “Haalota xayyo, ana qara haalota pooyya” Ayno akkima kodde in upna. Akkimoose' mina'ew, ikiini “Poqalla samaytaadi qara'e farata.”

³¹ Semmalla harka caattampayta Waaqa oppa pi'eta a kuttati orra fuurinni.

³² A la'ayta ishina' la'aye kammaayye, kuyyawwasene a xatta oppa rakkoota kuttayteeta ishin qara' kayte akka duupatten matte oorsada.

³³ Awta demooyye fuula orra' tura'e i'otamten ka pora daanamten, awta demooyyeew, orra rakkoota asse pahato ishootta qara' kayte olli qoota moottumten malla, rakkoota i'ishin qara' kayteew.

³⁴ Ishina akka teyaanta aakto ka pata in qapnin moonte qaptan qoota upnaatten malla, orra hidame i'suraysatten ka ete wa' qaptane ishin tura sarameneeyye, i'duupatten ka rakkoose xasan teyyatten.

³⁵ Semmalla, maxanyumasene xaayshin a ishin rapoota a kutta akkattane alle'en katan.

³⁶ Heenna Waaqa kodeetanne akka' waasene a Waaqa akka ishina' daasho kippeeta daashe akkattane'e, duupattaan asatta ishin faani.

³⁷ Semmalla, itaafamte ka kiini, “Isase deeno eta shakkaya kamma de'a, umma in jaro.

³⁸ Hanqeellittase namiyyo kodde xoori, amanteetanne caatta akkada. Oton xoori iskamman desa ooraayye anti ishan an xasoonni an co.”

³⁹ Ino' xoori, an orra amanno ka dinno quda diisheey, orra iskamman desa oorro ka panno qudan.