ipro 1 - Mataafa Qulqulloota

Waaqa akkima innaadi qudan haasawade

¹ Waaqa sapanna xattatiiyyi porra lekayaappanne a lekati xuumampaya qudan aappadaanno' haasawade.

² Amma xoori, sapannoosen kamma oorshaatiiyyi, innasene' xaadi a lehampayta we' piisati' kodde qudanne, ino' haasawade. Piita piisa ishanneew uume;

³ Isha la'ayta ulfeena Waaqa ka aynumaadinni Waaqa olliiyyi Waaqa keeto ka qaaletase' xaadi we' piisa ettaninnittonne piita piisa kammeela qape. Ka ete juppootoppa orra jaqqe kammaayye, moonteeyye harka a Waaqase we' piisa ettaninnooti'i akkitta' kuti'e.

Waaqa inna akkima erkampattowwa qaropa a kuttati' jaallo

⁴ Maxxa a ishi' daasame, akka maxxa erkampattowwa' qaropa qapo mina'e, Inna Waaqa erkampattowwa qaropa a kuttati' jaalli.

⁵ Waaqa erkampattowwaappaayye, ayno'e kide “Atti a innaayyo, anka awwe ke xaaye.” taaki, “Anti aappaaysho'en kodda, isha ka innaayyo kodda.”

⁶ Waaqa ete qartaadi piita qaropa erkeeyye, ikide, “Erkampattowwa a Waaqa' piisa a ishi' sakataden.”

⁷ Ma xoori ete qoota erkampattowwaati desa haasawannooyye ikide, “Erkampattowwaadi xayxayta'e kooni, ka orxayaadi opaya apittati' kooni.”

⁸ Doota innaaditi desa xoori ikiini, “Waaqqo! sufaanaayti haka paraparati'i kallaada, akka hanqeetan mankisteetaayti mukissa.

⁹ Hanqeeta i''jaalatte ka tiyya needdite. Se malla Waaqa Poqalla ka ke reexade, ka a xeliyyaatti qaran qapto'e daata a orra xasanno ke' daate, ka ke xasayshe.”

¹⁰ Ka kiiniwwi, “Poqallaay, atti' paayyota qaraayye piita uumte, moontada nefo kan koda harkaayti.

¹¹ Ishootta' piisa ipatan, ma atti ikkallaatta. Ishootta' piisa akka mehadda kalsannaane' mina'e keran.

¹² Atti ka a qeppa' mina ollopa ishootta marrita; ishootta ka a ohaata' mina' pursaman. atti' xoori awta piisa a ishaaw, umma parraatti pirama in qapan.”

¹³ Waaqa erkampattowwaadi oppaayye ayno'e kide, “Hakan nyaapaayti hupnaayti a ukkumeeta' kelopa ke oorinno kara'e, harkiyyo a akkittati' kute'e?”

¹⁴ Ka kuli erkampattowwa piisa, hapurrasene Waaqa kela koda koona, a Waaqa akka orra a dinno kela koda kodane'e pora ishootta erkanna'enne?