Hoose'i 9 - Mataafa Qulqulloota

Dapa a samayta Isira'eeli' qara' muramo

¹ Samayta Isira'eelitiiyyi, Waaqaayti'i a amanamme ka awta oppa unta tummaane kammaayye xaayya almaluma pohannittan ka ishin xasoonnittan; semmalla ishina akka samayta pila' mina'e in xasoodan, xasa ka ishina in dakaannin.

² Semmalla amma desa awtaassin oppaayye unta in caatto; umma pora a kara' wayneeta diipannittan kara wayneeta a akkattan; umma haaraya taadeta a wayneeta a' teytan.

³ Samayta Isira'eeli' piitase a Waaqa ishootta' daashe oppa'en kallaadan; Efreemi irreetanne piita Kipsi opa alle' tiitaawta ka piita Asooriti laata nyale damta.

⁴ Ishootta' poroosetiiyyi, kalisoota a taadeta wayneeta Waaqa' dehassa in ettanshan, umma kalisootaaysho ishan xasasso; damaasso, damta tika pooyta opa qoottinaane' mina'e qara koddan. Damoosen damta awta doxaneeyye karittaaysho oppa' daman diisheey, a kalisoota tika Waaqa opa ishin de'anen; semmalla orra damtoose dammo piisa inyala.

⁵ Hela kuyyawwa ulfeena a xaysoota a Waaqatiiyyi ka kuyyawwa a xaysonessuma a xooraan qapame qaptanetiiyyi, maana' koonittan?

⁶ Ishootta' kadi punu pateetta tura qahaneeyye, Kipseeta ollopa ishootta oorsha ikka katama Memfiisi oppa' hawlaman; jabba ka dakarraasso a' pirreeta a ollopa tuuladene qara pira, tarantara ka tikkaasso' oppa deha.

⁷ Kuyyaata oppa dapa muramo akka kayte, kuyyaata oppa haalota pooyyamto ka dehaatte samayta a Isira'eeli a upnaado. Juppootaayshin qoota koopte, paarkaalummaataayshin ka akata kokkoki malla, xuumampayta akka eepa' mina'e' dikten ka nama hapura Waaqa' qara co akka taarayta' mina dikten.

⁸ Ha Waaqa akka samayta Efreemi' tooyto'e xuumampayta qaatishe, ishootta' xoori porra piisa oppa'e tura' turuuraaw qaasni; tika Waaqatiiyyi paarkaalummaatanne isha kamma anni.

⁹ Ishootta akkima xatta katama a Kepa'ooniti koden mina'e akata nyalaan immakaaden, Waaqa ka dapaaysho' dikada ka juppootaaysho malla qara' dapa mura.

Juppoota a Isira'eeli ka pi'ittaadi

¹⁰ Waaqa ikiini, “Ha samayta a Isira'eeli, an ishootta teyeeyye, ishootta akka dalta a wayneeta a koommaytoppa teyatte mina ana' pahan; aappadaasso' nefo ka akka luukkata hilteeta a paayyota' palite ka teyatte mina ana' pahan; ma xoori ishootta ete pora pa'aali pe'oori kidammo kayeneeyye, jeerolayteetase a killootati'i issi daashen; ishootta ka akkimase a killootose' jaaladen' mina'e asseew nyalen.

¹¹ Ulfeena samayta a Isira'eeli akka a xampira' mina'e xa'ada ka alle' tawa umma inna karittoppa teyyatta ka hiteeta ka xaaya in caado.

¹² Kadi punu hellaa xaayan ka qohadaneeyye, qootan alle' tura erkannaattan piro malla, iqitan ka jo'i kidan. Oton anti ishootta kapa alle' sekaadooyye, oo ishootta kido!

¹³ Ha anti an samayta Efreemi akkeeyye, akka qoyra a sampaapa yeela kara' dishen mina paha, ma amma xoori ishootta iskela hellaasso' qalamitta' daashen.”

¹⁴ Oo Waaqqo! Atti ishootta' daashe. Ma ata allu maana ishootta' daassa? Qohatta a hellaa saldeessino isho amadda xurra ishootta' daashe.

Dapa Waaqa samayta a Isira'eeli' qara' muro

¹⁵ Waaqa ikiini, “A Kelkela caaneeyyew kodaaysho a neeqa piisa akkaade; anti ka eyye'ew kodaaysho a neeqa needdatta paayye ka neequmta a koden malla tikiyyo karaayye alle ishootta sookshe. Anti amma desa ishootta an jaalado, saarraasso piisa nyiraamayaaw kodden.

¹⁶ Samayta a Efreemi akka qoyra koke ka dalli in kinnin mina'e sanynyeeta in qapnaannin; kadi punu hellaa xaayadaneeyye, anti helloosen a akata jaalannaane'en alle' tura leysha.”

Xuuma a Xuumampayta qoota Isira'eeliti desa hasawade

¹⁷ Ishootta' qoota Waaqa' ajajama diishen malla, isha alle'e ishootta kata ikka orra Waaqa amanni in kinnin oppa'e rarraataawaan kallaadan.