Hoose'i 8 - Mataafa Qulqulloota

Samayta a Isira'eeli a killoota' sakatanno malla Waaqa ishi' miirode

¹ Waaqa ikiini, “Samayta a Isira'eeli, kodayteetiyyo poote ka seeriyyo nefo alle' qepshe, paarkaala ka akka a xooxayta' mina tikiyyo qara xoopilawniiy, akka isqara tooyane'e kaasa a illikayta' dawe.

² Ishootta ka anopa ullupan ka kidane, ‘Waaqqo ino an samaytaaytiiyyi, in ke upna.’

³ A koddito ma ha samayta Isira'eeli' qoota wa paxaara needdade malla, paarkaala ishootta kamma pora daana.

⁴ An anti ishootta'en lellin maliiyyi nuqusa nuqusumsaden ka a ana in kaassannin maliiyyi saarra reexaden ka pateettayshoti'i warqewwaasso isho dakaraasso a pirreeta oppaayye killowwa tumaden.

⁵ Ishina samayta a Samaariyaatiiyyi, killoose' pahana innaya sa'ati' kodattenen alle' tawsha, miiriyyo ka akka apitta' mina ishin qara' opaya. Ata allu haka aytamiti'i jaqqaysuma juppoota' kodatta alle' diissan?

⁶ Killoose pahana a innaya sa'atini Isira'eeli kara' kodamte, qoota nama harkan kode malla, isheetta' Waaqan. Semmalla killoose a Samaariya alle qeqqepta ka yooqamta.

⁷ Ishootta akka nama xayxayta aylade ka puppeeta ferade mina'e koddan umma untaaysho qara kaldayta in caado, umma kara'en fujatto, uqqina apari qara ca' nefo orra hapta'e tura dama.

⁸ Samayta a Isira'eeli orra Waaqa amanni in kinnininni qara pirama ka akka mehadda we' nakanni in kinnini mina' koddan.

⁹ Ka akka harretiita xawwaati mayyaaqe' mina'e orra Asoori kapopa aanen ka akka mankisteese olli moottumane'e, Efreemeta ittura' qattishen ka harka poornayshan kedaden.

¹⁰ Kadi punu mankistewwa harka poornaysha daasadan ka olli kalan nefooyye, anti ishootta piisan ollopa oorsha, ikka miiddota a nuqusa Asoori isho a saarraaditin mina desa piraman.

¹¹ Ha samayta a Efreemi pora oppa kalisoota araara kalta dehaannaane lekaya koden, porroosen xoori porra oppa juppoota koonaane kodden.

¹² Anti wa seeriyyo kara ca oppaayye we lekayan ishootta puuse ka daashe. Ishootta xoori akka wa in upnini mina'e diken.

¹³ Ha ishootta kalisoota ana' parpaaccisnitto dehaanni ka so'aadi kuli dammi, ma xoori anti Waaqa, an qaraayye kalisootaaysho an teyyado; juppoose' xaaysho a kodenen dikada ka qara' dapa mura ikka piita Kipsi opa alle' tiitaawan.

¹⁴ Ha samayta a Isira'eeli uumampaytaaysho'e teymen ka tikka kukutta issi qupaden. Samayta a Yihuta'ew, katamadda a kapa kawwattan qorrame lekaya qupade ma anti' xoori, apittan katamaddaasso' oppa diisha ikka mishshikeewaasso alle' kupa ka pira.”