Hoose'i 7 - Mataafa Qulqulloota

¹ Awtan samaytiyyo a Isira'eeli' poojama kelaayye kalsho ka ishootta dinissa faanooyye, juppoota Efreemi isho neequmta a Samaariya i'akkaatta. Ha ishootta dartaaw kooni ka tikkaappa paata hanni; xolmatoomaya nefo ka porraappa orra sarri.

² Umma ishootta akkan anti kodoose' xaaysho neeqa piisa tooyno in upan; juppootaaysho ka ishootta kapa tiitasse, anka kodoose' xaaysho' neeqa a koonaan piisa akkini.

Sullaata a tika nuqusa' kara' kodamte

³ Waaqa amma nefo ikiini, “Ha ishootta neequmtanne nuqusa xasanni ka darta kodaan saarra xasanni.

⁴ Ishootta piisani almalewwaaw, ha ishootta payqa kisa qara' qa'en a kupade, a haka daamma laaqqota' porjinaan kara'e kamma apitta opanni in kinnini pahan.

⁵ Kuyyaata a xaysonessuma a nuqusatiiyyi, saarra taadeta wayneeta ikaanne mamaashshooden ka paaqen, nuqusa ka falqoolaya olli' kale.

⁶ Sullaata karittaayshoti akka payqa kisa qara' kupade mina, miiraysho'ew halkeette kuutaawa quda'e parinni ka oto parito akka apitta hapulpullo mina' opayni.

⁷ Ha ishootta piisantiiyyi akka payqa kisa qara' qa'en mina'e kupaden ka orra ishootta mukinno alle' piren ka nuqussaasso' nefo alle' leyshen umma ishoottoppa nama qaarqaarsaayyo kaassade takka nefo in co.”

Akka samayta a Isira'eeli orra Waaqa in amanni in kinnin oppa' lahe

⁸ Waaqa amma nefo ikiini, “Efreemeta orra Waaqa amanni in kinnini oppa lahate, ha ishootta akka laaqqota karkalsama dapte mina'e kodden.

⁹ Orra hapta'e hupnaaysho' dame, umma ishootta in upnaanne, i'arreeden ma akka arreeta dehshen matte in qapan.

¹⁰ Ha samayta a Isira'eeli isi kukuttissaaysho'e ishootta qara' maakkummi, wossen kodde pisa oppaayye, ana Waaqa Waaqaaysho opa in tiitaawne, umma anan faane.

¹¹ Efreemeta akka eepa eleela a qalpeeta in qapnin mina ka qaarqaarsa faddatta'e takka Kipsipa ullupanni ka takka qinda Asoori opa anni.

¹² Anti porra oppandesa annaane' piisa oppa'en ishootta tura' turuura qaasa ka akka a xampira' mina moonta quda piitopa ishootta tita ka kodaaysho a neeqa malla qara' dapa mura.

¹³ Ishootta' qoota ana kapa alle' sekaaden malla, oo ishootta kido! Ishootta' qoota ana qara' nyiramaya' ooren malla, a pateetta ishootta qara' kayto. Ha anti ishoottan pahan fade, ishootta' xoori darta ana qara' haasawanni.

¹⁴ Qoollaasso oppandesa pora pooyni diisheey, karittaaysho kareela anopa qinsanni in caan. Unta isho taadeta a wayneeta akkatta malla olopa deeni diisheey, i'ana' tulta katen.

¹⁵ Ana ishootta kollishe ka hupna ishootta' daashe; ishootta' xoori ana qara'e sullaata suladen.

¹⁶ Ha ana kapa alle' sekaaden ka wa heenteti sakatanni; ishootta akka lawa a toonnaawe pokken ikka paata in teynin mina'e koddan, saarraasso' qoota wa neeqa' haasawaden malla, koraatetanne piraman; sede minan xaate'e, ikka orra Kipsi tura' jeeran.”