Hoose'i 6 - Mataafa Qulqulloota

Waaqa akka arara kalo'e samayta a Isira'eeli hale

¹ Samayta asse olli' kide, “Xooya ka Waaqopa tiitaawna isha ino qeqqepsheey, ishaaw qepanittinno hida, isha ino mataysheey, ishaaw ino dinsha.

² Ha isha kuyyaata lakki kammaayye ino' hupna daasha ka kuyyaata a sessattatiiyyi ino xaasha; anka fuulaadi turaayye caanna.

³ Xooya Waaqa upnaanna ka isha upnaatta' kokkonsanna; ha isha oto inopa deenooyye, akka la'ayta para' mina'e dukaatan ino akkaada ka akka roopa a soroora roopno ka piita faakinno mina'e, ino' de'a.”

⁴ Waaqa ikiini, “Ata Efreemi ka Yihuta, hela attan ishin koda? Ha jaalala ana qaptane akka urratta ka a tadahata teykanta' mina'e ennoow alle' panni.

⁵ Semmalla anti xuumampayaayyo qudannen ishin quura ka qaalese afaayyoppa sooknitton ishin leysha. Firteetiyyo ka akka paritoota' mina ishin qara' la'ayta.

⁶ Ha anti jaalala dukaata'en faani diisheey, daassata dehassan. Akka ana Waaqa upnattanen ishin qara faani diisheey, daassata a kupannitto dehassaan.

⁷ Ishootta' xoori porase ‘Attaami’ kidammo oppa'e kodayteetase a ana olli qapan alle' pooten ka eyye'e ana amanama diishen.

⁸ Kele'aadi katama orra neequmta koono ka diikaaw tuqnon immakaade'e koddite.

⁹ Akkima xolmatoomaya orra tura' lessaata asannaan mina'e, kita qeesewwa kuli asseew kooni ka pora Sekemipa anno oppa'e orra tura' asani ka nama ikanni ka dapa akata neeqa kooni.

¹⁰ Wa ilda kela akata neeqa'en samayta a Isira'eeli' qara akke, ha Efreemi eyye'e almalummi, Isira'eeli' nefo ka eeyye' nyalte.

¹¹ Ha ishin samayta Yihutaatiiyyi, anti kuyyaata an oppa ishin qatta'o in piisade.