Hoose'i 5 - Mataafa Qulqulloota

Dehaamta a killoota' sakatatta kapa sekaattaati desa daasame

¹ Ishin qeesewwaayye, waan ishina' lella' dakkaysada! Ishina samayta Isira'eeli' koddeetiiyyiiw, matte qapnaada! ishina toolla nuqusa' koddeetiiyyiiw, sede kela' napahata kata! Ha ishina' Misippa tura'e akka naata' mina qaasamten ka Taapoori tura'e akka nyupura' mina afamten. Semmalla dapa ishin qara' murame.

² Nyiraamaya nefo kodaaysho a orra lessaata ikoopsheneey, anti ishootta piisa qara'en dapa mura.

³ Anti qoota Efreemi desa we' piisan upa, Isira'eeli' nefo ana tura dekatta in ettanisso. Atti Efreemi amma i'almalumte, Isira'eeli'iw inyalte.”

⁴ Qoota dikatta almaluma ishootta kara co malla, Waaqan upan, kodoose' xaaysho ka Waaqopa ooreta ishootta dawre.

⁵ Samayta Isira'eeli akkima isi kukuttinno isha qara'e akkaanni; Isira'eeli ka Efreemi, juppootaaysho a koonaane ishootta kehaytisha ka kata; Yihutaataaw asseew ishootta olli kehaysatta ka pi'ita.

⁶ Ishootta Waaqa kalisoota dehassa'e kahirra isho lo'alla qapadan ka ishin de'an, ma xoori qoota isha ishootta diishe malla, isha in teyan.

⁷ Ishootta' qoota Waaqa in amanammin malla, hellaa xaadi in koddinini'i xaayan; semmalla ishootta isho piitaaysho ollinni xa'atima a leyooseti oppa'ew alle' piraman.

Oranna akkima otanta Yihuta isho a Isira'eeli oppa' xa'an

⁸ Piita Kepa'ooni isho a Raamati'i kaasa oranna' dawa ka Pete'awweni'i ullupitta xaasha ka sanynyeeta Piniyaami' kida, “Isqara tooya.”

⁹ Kuyyaata an dapa murrooyye, Efreemi, lulle hasta anti sede akka kaffa Isira'eeli' qara' dukaatan koddito'en piisade.

¹⁰ Waaqa ikiini, “Saarra Yihuta a orra xeella laayyo tuukanno mina'e kodden; semmalla anti miiriyyonnen akka malxa' mina alle ishootta haada.

¹¹ Samayta Efreemi' qoota killowwa kamma'ew kammo malla, miiddota isha qara' koopte, qitaateta Firteeta ka qara' kayte.

¹² Semmalla anti Efreemeta'e akka itteeta ka Yihutaata'e akka tummaysa' mina'en kodde.

¹³ Efreemeta ete surumtaadi, akkiteeyye Yihutaata ka faykaadi akkiteeyye, Efreemeta piita Asoori opa fuula katte ka qaarqaarsa kaassatta'e nuqusase kutta kapopa nama erkatte. Isha' xoori ishoottan paha ka faykaasso dinissa in ettaninne.

¹⁴ Anti Efreemeta qara akka karma' mina'en kodda ka Yihutaata qara'e akka haaritta a karma' mina kodda ka ishootta qeqqepsha ka alle ishoottan aana; umma nama ishoottan paho takka nefo in caado.

¹⁵ Haka dapaaysho a koden upnaannaan ka pora ana faanaane'e, anti eyye'en jaw kida. Ha oto rakkoota ishootta qara' kooptooyye, mikte ana fadan.”