Hoose'i 4 - Mataafa Qulqulloota

Waaqa akka samayta Isira'eeliti' dehamta kokkoka' daashe

¹ Samayta Isira'eelitiiyyi, wa Waaqa qara ishin peeqna'e caay, semmalla ishina piisse oppa kala wa Waaqa kiina dakkaysada, “Ha piisse oppaayye amanamitta in kitto umma jaalala in caan umma Waaqa fuureta nefo in kitto.

² Orra kodayteeta a xaxa'e pooni ka darta kodeeta ka oli lessaata ka hatanta ka almaluma ka karpa koda kammaaw anni, oli lessaata nefo ka koopte.

³ Semmalla piisse iloosatta, wa piisse oppa ca piisa ka alle' le'an, pinaana kappina ka xampira isho murkujadda piisa ka alle' piraman.”

Waaqa akka qeesewwa' dehaamta kokkoka' daashe

⁴ Waaqa amma nefo ikiini, “Qeesewwaayye! Nama samaytan xasasnnin ka in peeqnin, anti ishin qeesewwa ollin haasa qapaay.

⁵ Ha ishina' kuyyaata quda pora tukulkullittan, xuumampaya kuli ka ishin olli halkeette asseew tukulkulli, semmallan piisse' xaayshin a' oppa' dalattenen alle' pashsha.

⁶ Ha samaytiyyo qoota pora oppan ana upnaado dape malla pate, ishina' qoota ana upnaatta puyatten malla anti akka' qeesewwa a' koddinini'in ishin puyade, ishina' qoota seeriyo teymiten malla anti asseewwen hellaassin teyma.

⁷ Ishina' qeesewwaayye akkima lekumtaayshin koopte mina'e juppootayshin asseew koopaan anteey, ulfeenaayshinan jeeropa oorsha.

⁸ Qoota' daassata a samaytiyyo juppootan dehanno dammittan malla, akka' fayya juppootaaw kodane' heentan.

⁹ Ishin qeesewwaayye waasene a samayta koona'ewwe' koonittaneey, semmalla dapan samayta qara' murro asseewwen ishin qara' mura, nama piisa ka akkima kodaadi a neeqa mina'e' qeetaadi akkada.

¹⁰ Samaytiyyo qoota ana Waaqa diishe malla damata idama ma in duttano ka pora almaluma ma hella in xaayado.”

Waaqa akka killowwa' sakatatta dawrino

¹¹ Waaqa amma nefo ikiini, “Ha koda almaluma isho kokteeta ka maaddota a taadeta wayneeta ikayta kamma anta samaytiyyo qara qalpeeta pashshe.

¹² Ikka olahitta qara paata kaassanni ka akka xalittase a suuma ishootta' paata lelo' qara asanni, ha dikatta almaluma'e ishootta qara pire ikka Waaqa kapa alle' sekaaden.

¹³ Ikka irrowwa qara'e kalisowwa kalinni ka kunkunnawwa qara' kalisoota unta' dehanni; porra oppa sene koonaan' nefo qora kutkutta a kaatta paxaara' qapa a hilteeta ka a madikeeta ka a pirpirta' kela'e asse kooni. Semmalla tuparraassin a almalumma'e koddan. Haantowwa hellaassina ka asseew almaluman.

¹⁴ Ha kadi punu tuparraassin almalummaaneyye, haantowwa hellaassina ka asseew almalummaaneeyye, anti an ishootta qara' dapa an muro. Maana malla ishina a diira kodde, ishina qeeni ka iskattase tikka killowwa kara almalummo olli almalummi ka killowwa' sakatanni. Semmalla samayta matte oorsatta in qapnin alle'e pata.

¹⁵ Oo samayta a Isira'eelitiiyyi! a asse almalummittan qaran desa Yihutaata qaropa dapa in oorshan, umma Kelkelaapa in aanan umma Peti'awweni qaropa in fayyadan. Umma ‘Dukaata a Waaqatinni’ in kidan ka pora in reersadan.

¹⁶ Samayta a Isira'eeli akkima wareera koromta'e pahaay, xawwi Waaqa atta a nyalqa kahirra' mina deetta fayya oppopa ishootta dawwa?

¹⁷ Efreemi' qoota killowwa' sakatatta quda' kokte malla, tupadesan alle isheetta diisha.

¹⁸ Kadi punu ikkayta tura piramaayye, almalumaadi diinni in kitto. Saarraasso' nefo wa jeere kodaaw xoosanni.

¹⁹ Ishootta akka uruuritta paata haano mina'e alle' haadaman ka sede a killoota' kalisoota dehannaan malla jeeran.