Hoose'i 2 - Mataafa Qulqulloota

¹ Semmalla hellaassin a Isira'eeliti' kida, “Ishina Aami” Ka tuparraassina' kidaawwe, “Ishina' Ruhaama.”

Isira'eeleta akka qatta'amte

² Hellaayyo! Aayyaassin amma desa isheetta iskatteetiyyon, umma anti an diirtaadinniiy, isheetta dehaama ikka dikattoose ka totooyyattose' xaadi a sharmuutuma' kamma oorto.

³ Oton kodoose' xaadi neeqa qara oorri in kinniniiyi, akkima lulle dalatte mina'en isheetta hattisha ka akka piita a ponsatte mina isheetta koda, ikka deepota pishaatin toota.

⁴ Hellaadi nefo qoota almaluman xaayte malla an suraysado.

⁵ Aayyaasso qoota almalitteeta koddite malla, almalumanne helloosen hitte. Ha isheetta ikiite, “Kaarayyowwaayyo ana quda sira ka waan dama ka ikka ka sayteeta ekerta isho taadeta wayneeta ana' daashaay, ishootta kamma'en aana.”

⁶ Semmalla anti poraadi turan qeeyyaan oxna ka akka lakopa in sooknini' tura' kawwatta dawa.

⁷ Isheetta kaarayyowwasene kamma pora keerta, umma ishootta in qaqqaapto. Ka pora ishootta faata umma in teyto. Ka oori' kiita, “Toolumiyyo a xatta'ew ana wayyiiy, ana diirtiyyo a xatta' kelopaaw alle' kalo.”

⁸ Ha isheetta unta a dammitto ka sayteeta ekerta a daatannitto ka taadetase a wayneeta a iknitto ka dakara isho warqeewwa a killootase' xaadi pa'aali kiinaaneti kalinnitta piisa, akkan anti isheetta' daashe in upto.

⁹ “Waaqa ikiini, semmalla oto fera kaytooyye, unta ka taadeta wayneetiyyo'en alle' tura qeeda ka mehaddasene an akka kalsatto isheetta' daashe kuli alle' quda sooksha ka lulle isheetta diisha.

¹⁰ Ka kaarayyowwasene' xaadi tura lulle isheetta diisha, umma nama harkiyyoppa isheettan paho in caado.

¹¹ Ka kuyyawwaadi a killoota ulfeessinitta ka a para ka a leya' mina kodannitta ka sanpataddaadi ka kuyyawwasene a xawwi reexxame a ulfeessinitta piisa alle qara hattisha.

¹² Ka dishma a wayneeta isho qora hilteeta a almaluman kaarayyowwasene' xaadi kapa akkatte alle' tura shuka. Ka dullasene' xaadi a oppa wayneeta isho luukkawwa pohannitta' tura rafsha; pinaana kappina ka oppa deetan.

¹³ “Qoota killootase pa'aali'i tankarta qayyannitto ka sissirattaan kaarayyowwasene' xaadi kammaaw keerritto ka ana alle' diisse malla, dapan isheetta qara' mura.

Jaalala a Waaqa samytaadi' qapa

¹⁴ Semmalla amman isheetta naappada ka koommaytoppopa titta. Ka eeyye'e torra paxaaraatin kara sataata qeeda.

¹⁵ Ka dulase a wayneeta a xatta' isheetta' oorsha ka naabase a rakkoota' xarra kippeetati isheetta koda, ikka akkimase a xatta a xayya qaptooyye ka a piita Kipsiti sooknittooyye sammarritto mina'e, xasan sammarta.”

¹⁶ Waaqa ikiini “Awseti paayyatte ‘Diirtiyyo’ kiita ka ana haleeta diisheey, akkima killootase a pa'aliti ‘poqallaayyo’ kiinitto mina'e ana'e in kiito.

¹⁷ Awwe desa akka afaappaayye killootase a pa'aali pora in haleenini in qara dawra.

¹⁸ Sitiiyyi, ishin mallan kida ka pinaana ka xampira moontan xa'anna isho pinaana piitandesa titmanna olli kodayteeta kodada. Ka akka ishina' nakaytan kallaattane'e, piita qara lawa ka koraateta isho oranna alle' pashsha.

¹⁹ Isira'eeli, akka haka paraparati' haantotiyyo koddito'en ke hema ka hanqeeta ka dukaata ka jaalala paraparatin isho suraysattaan ke hema; akka iskatteetiyyo koddita.

²⁰ Kodayteetiyyo tooytattaannen ke hema, atti ka akkan anti Waaqa kodde upnaatta.”

²¹ Waaqa amma nefo ikiini, “Anti awsetiiyyi, in oorsha ka moonta nefo' haasawada, moonta ka turaayye piita' haasawatta.

²² Piita ka turaayye unta ka wayneeta ka luukkata isho sayteeta ekerta' palassaanne, Iyyisira'eli' haasawatta.

²³ Samaytase' xayyo akka teyantoodo'en piisse oppa' kutiisha ka isasene ‘Orra a in suraysatammin’ kidame suraysada ka isasene ‘orriyyon’ kidameeti' kida ‘Ishina a orriyo;’ Ishootta ka ana' kidane, ‘Atti a' Waaqinno.’”