Hoose'i 14 - Mataafa QulqullootaHoose'i akka samayta Isira'eeli Waaqopa ooro'e ishootta kaassade 1 Samayta a Isira'eelitiiyyi, qoota juppootan kehaysatten ka pi'iten malla, qinda Waaqa Poqallaassina opa oora. 2 Haasa a araara' kalta qapada ka Waaqopa oora ka kida, “Juppootinno piisa ino' diishe ka diissataaytin ino teyyado, anka dalta kalata a afaanno ke' dehaanno. 3 Ha Asoori inon paha in ettanisso umma fartada a oranna qara xasa an xaayanno umma arepadesa killowwasene an harkan xefanneeti'i an kiino, ‘waaqinno.’ Ha he'aya toolla in qapnini'i ke kapa dissata akkadan.” Waaqa akka diissata kodo'e kippeeta daashe 4 Waaqa ikiini, “Qootan miira an ishootta qara qapo harfisade malla, samaytiyyon ana amanama diissata kela dinsha ka karittiyyo piisan ishootta jaalada. 5 Anti samayta a Isira'eeli kelopan pisha iksha, ishootta ka akka pisa' mina pisan ka akka qora a Lipanoosi' mina hittinna katadan. 6 Ka taamma kuli jifsadan, paxaarumaadi ka akka qoyra ekerta, alumaadi ka akka mura a Lipaanoosi' mina kodda. 7 Ka desa ooran ka kaattilliyyo kela' nessadan ka akka sakkatta unta' mina' pisiqsiqan ka akka dishma wayneeta' mina pisan; akka kurra taadeta wayneeta a piita Lipaanoosi' dakaanno mina'e, kurraaysho' nefo ka asseew dakaada. 8 Ata samayta Efreemiti, anti maanan killoota olli qapa?, Ha ana qinseetaayshin dakaya ka ishin qara tooya. Anti an pirpirta awta piisa ilaawuma quda' tawno mina; dalta daletaayshin nefo ana qudanneew kodda.” 9 A ookuma qapa leloose' matte hitanni, qalpeelayaaw leloose kara upnaadan. Ha pora a Waaqa pora dukaata; hanqeellaya ka oppan desa anni; juppoolaya xoori qara'e kehaysanni. |