Hoose'i 13 - Mataafa Qulqulloota

Dapa a piraampirati Isira'eeli qara' murame

¹ Efreemeta oto haasawannittooyye, orra Isira'eeli ishootta tura xarri ka ulfeessini, ma xoori' qoota killootase a pa'aliti' sakatattaan juppoota koden malla ile'en.

² Amma nefo juppoota qara'e juppootaaw kooni ka dakara pirreeta liilsaden ka killowwa tumaden ka pahanadda harmuman xefaden; ha sene piisa wa harka namaatin kodene, orra ka ishootta' kiini, “Wossen harkan kodeneeti, kalisoota dehaaysha! Orra ka killootase pahana innayya sa'atin koden dinkado!”

³ Semmalla ishootta akka urratta a teykanta' mina'e pasan ka akka tadahata a teykanta' mina seehan ka akka uruuritta awtaappa ukkashsha haano mina'e, taaki akka qayya qussoppan xaano ka dapanno mina'e dapadan.

⁴ Waaqa ikiini, “Ana Waaqa Waaqaayshina piita Kipsi kara ishin sookshe, ha ana mali Waaqa a pila a' qaptan, umma ana mali dinshampayta a pila in co.

⁵ Koommayta koke, a atoota oppa orra xaalannitto oppaayye, a ishin kaalkalshe ana.

⁶ Ishina' xoori ete' piitase a hiira oppa kayteneeyye, iddamten ka duttanten ka isi peepten ka ana kuli teymiten.

⁷ Sede qaran xaate'e, anti akka a karma' mina'en tura asada ka akka a qayranta' mina poroppa' tura' rabba.

⁸ Ka akka pinantase Tipi kiinaan a tura nyalqa qeedamen mina'e, ishin qara' mud kida ka ishin kara karitta kakkaa'a ka ishin porjojjaysha ka akka a karma' mina ishin mooja ka dama ka akka pinanta a kappina' mina ishin tiiqada.

⁹ Samayta Isira'eelitiiyyi! Qoota anase ishin qaarqaarro qara' xaaten malla, alle'en ishin pashsha.

¹⁰ Ishina ana' qinsatten ka kiitene, ‘Nuqusa isho saarra ino' daashe.’ Ata kuli nuqusase ka saarrasene a katamaddaassina a ishinan paha amma ayshaayye caan?

¹¹ Anti miirannen ishina' nuqusa daashe ka anti'iw miirase' xayyo kuttan alle isha pashshe.

¹² Dapa a Efreemi ollopa tuulame, juppootaadiiw maskapa qaropa ollopa puusame.

¹³ Isha akka iskatteeta yetatta a xaaya oppa kitto mina'e qaapa qara' de'a. Isha eepa a inna, a dalatta kaye kapaayye karitta aayyaasso oppa' tarkame' mina paha.

¹⁴ Hela xawwi hupna Si'ooli kelan ishoottan paha? Ka toota kela ishootta dinsha? Ata tootayti! Erkannaataayti ayshaayye kitta? Ata si'ooli! paata patissaayti, ayshaayye ca? Ha anti amma desa ishootta an suraysado.

¹⁵ Kadi punu hellaasso oppa teyantoodaayye, puppeeta a Waaqa'e koommaytase' koke a qinda piirtotati desa de'a ka paadadda kuusha ka kirrada koksha ka teyantase kokkoka a ollopa tuulade piisa ka alle turaayye saramta.

¹⁶ Orra Samaariya' qoota Waaqa qara' xa'e malla dapaadi a kode kapa'e kaassatama; samaytaadi nefo orannaanne pirama, nyooqqawwaadi ka paatan dakkaman, ikka aayyada karittoppa inna qapa kara hellaa kakkaa'an.”