Hoose'i 12 - Mataafa Qulqulloota

¹ Samayta Efreemi nama xayxayta qapa faano mina ka kuyyaata piisa qinda piirtota opa kamma xopta dawni ka darta isho nyiraamuma koopsade ka orra Asoori olli kodayteeta kodanni ka piita Kipsi opa sayteeta ekerta erkini.”

² Waaqa samayta Yihuta olli haasa qapa ka sanynyeeta a Yayqoopi akka kallaatayshoti' mina'e qara' dapa mura ka akka kodaayshoti' mina'e kateettaaysho ishootta' oorsha.

³ Yayqoopi a karitta aayyaassoti kara cooyye, innaasso' tura' qata fade ka kamma kaminta qape ka ete kuttadeeyyeew Waaqa soote.

⁴ Ka erkampattoota a Waaqa' kuli soote ka pute ka saka akkatta'e, pooye ka erkampattoose qinsade. Waaqa ka Peteli'i isha tura akkaade ka olli haasawade.

⁵ Isha Waaqa a we' piisa ettaninno, maxxa ishin upnaysammo nefo, Waaqa.

⁶ Semmalla ishina Waaqaayshin opa tiitaawa ka jaalala isho wa dukaata kodde qanqannissa qapada ka awta piisa duupattaan Waaqa asada.

Dapa a lammatati qara'ew murame

⁷ Waaqa ikiini, “Xawda a Isira'eeli akka xawda a Kene'aani' mina'e taara qara murenen paata kanni ka orra sassapanni.

⁸ Efreemi'iw isi peepni ka kiini, ‘Anti in teyantoode ka taajureey, nama teyantoose xayyon ana qara' juppoota akko ka dapa muro in caado.’

⁹ Ha ana Waaqa Waaqa piita Kipsi' kara ishin sookshe ma i'oortan ka akka xatta a kuyyawwa xaysonessuma a paratiiyyi tukkanna daapannittan ka kela kallaannittan mina'en akka kallaattane koda.

¹⁰ Ha anti xuumampayaappannen haasawade ka akka keleshaata lekayta akkane' kode ka ishootta qudan pahanaan haasawade.

¹¹ Orra Kele'aadi killoota'e sakatanni, semmalla orrose ipata; ha Kelkelaayye xormada kalisoota' dehaanni, ma xoori poroose a qara' kalisoota dehannaan, iqitqita ka akka poqa duloppa ollopa tuullaan mina' tuulama.”

¹² Yayqoopi' piita Mosoppotaamiya opa paqe ka iskatteeta hema' yaale ka isheetta akkatta malla kahirra sikshe.

¹³ Waaqa harka xuumampaytatinni samayta Isira'eeli' piita Kipsi' kara sookshe ka xuumampaysetinniiw ishootta qara tooye.

¹⁴ A koddito ma samayta Efreemi akata Waaqa miirayshe, isha ka dapase a diika tuqen ishootta qaropa oorshe ka sede a isha oten malla, ishootta qara' dapa mura.