Hoose'i 11 - Mataafa Qulqulloota

Jaalala a Waaqa samayta Isira'eeliti' qapa

¹ Waaqa amma nefo ikiini, “Samayta a Isira'eeli, a innume coyyewwen isha jaalade ka piita Kipsitiiyyi innaayyo halaade.

² Ma xoori samayta Isira'eeli akka ana qudopa dehaadane'en harmo' haleetta koopshe, ishootta ka a qaran qapto'e alle ana kapa sekaaden ka killootase pa'aali'i kalisoota kalshen ka pahanaddasene a xefadeneeti'i tankarta qayyayshen.

³ Ana Efreemi tupa harka qape ka taattishe ka kollishe. Ishootta' xoori akkan anti ishootta ampade matte in qapan.

⁴ Ana ishootta surasysade ka teeppa jaalalaatin ollopa ishootta qape ka qampara xolmaasso' qara alle' fure ka kapa xata kide ka ishootta damshe.

⁵ Ishootta' qoota anopa ooreeta tiiten malla, piita Kipsi opa ooran, nuqusa Asoori ka karpishshadda' ishootta kodada.

⁶ Paarkaladdaasso, katamaddaasso oppa'e koraatetan ishootta piran ka teehowwa a xarradaassoti' alle' tura qeqqepshan; dehaamtase' neeqa a oorsaden ka alle' hasa.

⁷ Samytiyyo ana kapa alle' sekaatta reexade ka aren qaarqaarsa akkatta'e illi anopa ullupanni, ma nama a rakkootoppa ishootta sooksho takka nefo in co.

⁸ Ata Efreemi! Attan ke qara karitta kutada ka alle ke diisha? Ata Isira'eeli! Attan orra pilaati ke tarpisha ka daasha? Ka atta akka katama a Taama isho a Sepooymi' mina alle ke pashsha? Ha jaalala an ke' qapa' qoota dikkeeti kutti malla, sede ke qara' koda'e karittiyyo in ettaninne.

⁹ Anti an Waaqa qulqullitta a otantaayshin oppa co diisheey, an naman. Semmalla erkannaata a miiriyyo ishin qaropa an diisho, umma an ooro ka Efreemi an pashsho ka aara miiriyyootinni ishin kapopa an de'o.

¹⁰ Anti oton ishootta dinissa akka karma' mina' daatto ka nessa dakaytinnooyye, ishootta ana Waaqa kamma'e sookan, hellaayyo ka qinda a dumaatati xata anopa xaran de'an.

¹¹ Ishootta akka a xampira' mina'e Kipsi xata ka akka eleela' mina Asoori desa xa'adan ka de'an; anti ka tikkaasso oppopa ishootta oorsha, sede ana Waaqa asse haasawade.”

Juppoota a Isira'eeli

¹² Waaqa ikiini, “Samayta Efreemi dartanne ana kapa tiitayshe, samayta Isira'eeli'iw sassapaanne ana kapa tiitayshe; Yihuta'ew ana afaa dakayni in kitto umma ana Waaqa qulqullitta amanammi in kitto; Yihuta' xoori akkan anti ishi' kiino qara'e saantiyyon anni ka ana Waaqa qulqullitta'e amanammi.