Hoose'i 10 - Mataafa Qulqulloota

¹ Samayta a Isira'eeli akka qoyra wayneeta a dalta horkookte qapo mina paha ka akka daltase' koopte mina'e asseew pora a kalisoota killowwa' lekaysade ka akka piitaaysho' teyantan immakaatte mina'e, tuuddasene porase oppa killoota sakatannaane' kela ca siraan immaken.

² Ha karittaaysho sassapaanne immakaade semmalla kateetta dapaayshoti'i akkadan; Waaqa porase a qara' kalisoota dehannaane' piisa alle' tura qeqqepsha ka porase a oppa' killoota' sakatannaan kela alle tuudda qitqishsha.

³ Ishootta ikiini, “Sede an Waaqa fuura diinne mallan nuqusa dapne; ata allu kadin punu nuqusa qapna nefooyye, maana ino' koda ettansha?”

⁴ Ishootta afa pattanne kippeeta daanni ka dartan pora xaxanni ka kodayteeta kodanni. Semmalla akka jabba qundeeta duloppa dapanni in kinnin mina'e, erkannaatiyyo ishootta qara in dapatto.

⁵ Qoota ulfeena killootase Peti'aweniiyyi pahana innayya sa'atini koden qaraayye qeedamo malla, samayta katama Samaariyaati kalo ifuurri ka piisantiiyyi pooyni; qeesewwaasso ka mallaaw pora pooyni ka ullupni.

⁶ Killootose Asooripa qeedamta ka nuqusase kuttati harka poornaysha' daasamta; samayta Efreemi ka ishin jeera, samayta a Isira'eeli'iw dehaamtase' xaaysho a teyyaden malla asseew jeeran.

⁷ Samaariya isho nuqusaadi akka miissa pisha qara pi'o ennow haadammo mina'e ollin patan.

⁸ Samayta a Isira'eeli' porase Awweeni kidammo oppaayye, kunkunnawwasene a qara killoota' sakatannaane, isasene ishootta' juppoota kodde' piisa qitqita ka porrasene a qara' kalisoota kalinnaan oppa'e qeeyya isho miissa ka deha; sitiiyyi samayta ka kida, “Irrowwaay! Ata ino qaropa qitqitan, kunkunnawwaayye! Ata ino qara dekan.”

Waaqa akka samayta Isira'eeli' qatta'o

⁹ Waaqa ikiini, “Samayta Isira'eeli a xatta Kipia juppoota kode desa paayyatte, haka awweti'i juppoota koda qudaaw ca. Sede malla oranna Kipi'a'e ishootta pira.

¹⁰ Anti akkan heeno mina'en qara' farata, juppoose' xaaysho koopte malla, samayta piita' piisan ishootta qaropa xaasha ikka qara' faratan.

¹¹ Ha samayta Efreemi akka koromta leenjisamte ka unta tuma jaalannitto mina; ma xoori anti a xolmaadi mata in qapnin qara'en qampara qaasa ka Efreemi kamma' kinteeta toomma, Yihuta ka ishin qota; hellaa Yayqoopiiw iqaasaman ka piitase' qotamte karkakkalshan.

¹² Anti in ishootta' kide, ‘Piitoose rafte qota ka oppa' hanqeeta aylada ka dalta a jaalala dukaata' ferada; ha etoosen eta oppaayye a ishina ana Waaqopa tiitaawtan, anti' nefo ka hanqeeta tupaxata ishina' roopo.’

¹³ Ma xoori ishina hupnaayshin isho lekumta xormewwasene' xaayshin a oranna'e' kippatten ka neequmta aylatten ka juppoota feratten ka dalta dartaayshina' damten.

¹⁴ Semmalla samaytaayshin qara'e, oranna kokkoka'e xa'a ka akka Shelamani nuqusase katama Peti'arpelini' torpe ka qitqishshe ka aayyada isho hellaa ollin piitan dakke ka leyshe mina'e, mishshikewwaassin piisa alle' qitqishsha.

¹⁵ Ishina katama Peti'eeli kara kalaatiiyyi, juppootayshin qoota akata koopte malla, ishin kuli qara' pateetta asse pahatoow de'a; oton asu oranna paayyadaayye, nuqusa Isira'eeli para karanneew ishshama.”