Hoose'i 1 - Mataafa Qulqulloota1 Xelta a nuqussasene a piita Yihuta a Oosiyaani ka a Iyyo'ataami ka a Akaasi isho a Hisqyaasi olkamma' nuqusumeneeyye, Iyyoorpi'aami inna Yo'aasi ka piita Isira'eeli' qara' nuqusumeeyye, sitiiyyi nessa Waaqa xuumampaytase Hoose'i inna Pi'eeri' de'e. Iskatteeta Hoose'i isho hellaadi 2 Waaqa Hoose'ippanne hellaa Isira'eeliti' haasawatta paayye ka ishi' kide, “Samaytiyyo qoota ana Waaqa kapa sekaade ka almaluma akata neeqa koda qara co malla, atti aane ka almalitteese a iskatteeta' heme ka isheettoppa almalewwa hellaa' xaayado.” 3 Hoose'i ka oori aane ka enenta Tipilaayimi a Komeri kidammitto heme; isheetta ka hitte ka inna diirta ishi' xaayte. 4 Sekkammaayye Waaqa ka Hoose'i' kide, “Maxxa innoosen xaayti, ‘Iyyisira'eli’ kide ka hale. Maana malla, Iyyu naaba Iyyisira'eli' kara'e orra leysheey, anti eta a deha oppa'en toolaadi qara' farata ka mankisteetase a sanynyeetaadi a Isira'eeli kara kitto kuli akka patto' koda. 5 Kuyyaatosetiiyyi, naaba Iyyisira'eli' kara'en Isira'eeli qara alle oranna qeqqepsha ikka hupna dapan.” 6 Komeri ka a lammattati hitteew ka enenta xaayte. Waaqa ka Hoose'i' kide, “Maxxa enentose' xaayti, ‘Looruhaama’ kode. Maana malla anti ammadesa samayta Isira'eeli an suraysado ka ishootta' diissata an kodooy. 7 Ma xoori sanynyeeta Yihuta, koraateta taaki paanta taaki oranna torpeetan taaki xela fartadaan torpino ishoottan in paho ma, ana Waaqaaysho'e ishootta suraysada ka ishoottan paha.” 8 Komeri ete Looruhaama ku'isse kamma, ihitteew ka inna diirta' xaayte. 9 Waaqa ka kide, “Awwe desa samayta Isira'eeli orriyyon, umma anti an Waaqaaysho'en. Semmalla maxxa innoosen xaayti, ‘Lo'aami’ kode.” Kippeeta a samayta Isira'eeliti' lelamte 10 Ma xoori samayta Isira'eeli eta a oppa porase a oppa Waaqa ishootta' kide, “Ishina a orriyyon.” oppa'e “Hellaa caattampayta Waaqa'e” kidamane de'a; lekumtaaysho ka akka hinkaajjeta daka kela' mina' koddita. 11 Kuyyaasetiiyyi samayta Yihuta isho a Isira'eeli olopa oora ka takka kodda ka oltura mukissampayta takka reexada ka piitaaysho oppa teyantooda. |