Filippisiyuusi 4 - Mataafa Qulqulloota

Dehaamta a piraampira

¹ Semmalla ishina an jaalanna ka yaatanna a xasiyyo ka xalaalaayyo kodde, hellaanno a kiristaana moottadaayyooyye! asseew poqallaan japaada ka kallaada.

² Ewodiya ka Sintikke akka poqallaan olli' kalane'e, in ishootta naappanni.

³ Atti ke amaname an ollin koda kooninno, akka iskattoose qaarqaarto'en ke naappanni; iskattoose ana ka Qelementoosi isho orra pila a ana olli koda koono a maxxadaasso maskapa caatta' kara' taafamen olli qa'aden ka otoose a fayya orra piisa qaran kaya'e sooten.

⁴ Awta piisa poqallaan xasooda! oppa'en oorri ka kiini, “xasooda!”

⁵ Naalumaassin a orra piisa tura' akkaaden. A Poqalla tiitaawo ka de'o'e idehaatte.

⁶ Semmalla, qoota we' piisati desa, qinseeta ka naappuma isho kalataan Waaqa tura' rakkootaayshin dehaysha diisheey, we takka nefo oppa'e dikattaan an kupadan.

⁷ Nakaytase a Waaqa upna a nama' qaropeela co, karittaayshin isho mattaayshin Yesuusi Kiristoosin tooytaay.

⁸ Mattaayshin, a wossen piisa qaropa qapa ka paxaara opanka ishin kalataysammaanetin a immakaado. Piraampira qara hellaanno a kiristaanatiiyyi! wa dukaata kodde ka ulfeessame ka likkeeta kodde ka qaja in qapnini ka jaalatame ka paxaara' piisa dikada.

⁹ Wa ana kela kollattene ka dakaytene ka teyyattene ka akkitene' piisa koda. Waaqase a nakayta ishin olli caadaay.

Pawloosi aka daassata a ishi erkamte malla kalata kalshe

¹⁰ Eta kuttaya kamma qoota oppa' oorteneew ka qoota rakkootiyyooti desa ana dikatta paayyiten malla, a kuttati'i poqallaan xasa ana' dakaanni. Dikatta'e keeto i''ana dikannittan ma, kodaan akkissa'e, aroota' dapten.

¹¹ Anti' qootan rakkade malla, asse an kiini an co. Maana malla, “Waan qapa i'ana kayni” kideeta in kolladeey.

¹² Semmalla teyeeta ka dapeeta in upa; pora piisa oppaayye ka eta piisaayye, juuttota a duttana ka a doxa ka a teyeeta ka a dapeeta in kollade.

¹³ Kiristoosise hupana ana daannonne, we' piisa in ettaninni.

¹⁴ A koddito ma, qoota a rakkootiyyo qoottanna' kodditen malla, wa paxaara'e' kooten.

¹⁵ Se maliiyyiiw, an otootase a fayya' torra paayye ka piita Meqedooniyaati xaanooyye, ishina a amanna a Filippisiyuusi kara ca maliiyyi, maapara amannteeta a daassatan ka teyyattaan ana olli parkume takka nefo akkima in kinnin, ishina' mattaayshina i'uptan.

¹⁶ An Teseloonqe kara co ka rakkadeeyye kuli, a lekatinni' qaarqaarsa ana erkiten.

¹⁷ Sede an asse kiinoow, qootan daassataayshin ishin qara faano mallanne ma, daassataayshin a xoona' kela, akka dalta ishina' koopto mallan asse kiini.

¹⁸ Daassatase xaayshin a ana erkiten, a ana parpaaccisnitto ka a ana' parpaaccisnitto qaropa koddite, Eppaafrodituusi qara in teyyade; daassatose' xaayshin nefo, akka kalisoota a alaawnitto mina'e Waaqa teyyada ka ishin xasooda.

¹⁹ Semmalla a Waaqiyyo teyanta ulfeenaadi oppaayye Yesuusi Kiristoosi qudan wa ishin' parpaaccisna' piisa ishina' daasha.

²⁰ Aappinno ka Waaqinno'e, a paraparaayye haka paraparati'i ulfeena a isha kayo. Ameen!

Nakayta piraampira

²¹ Orra amanno piisa'e Yesuusi Kiristoosin nakaytiyyo lela. Hellaanno a kiristaana a ana olli ca nakayta ishina' erkini.

²² Orra amanno piisa ka xawwi' desa, a toola nuqusase kutta a Roomi kodde, nakayta ishina' kiini.

²³ Daassata Poqalla Yesuusi Kiristoosi a ishin olli kinnaatto.