Filippisiyuusi 3 - Mataafa Qulqulloota

Hanqeeta dukaata

¹ Piraampira qara hellaanno a kiristaanatiiyyi! poqallaan xasooda oton waan turan ishina' taafe qara'ew oorro ka ishoottaaw ishina' taafnooyye, ana pakinni in kitto ka kamma dapeeta kela ishin tooytita.

² Kutta sene neequmta koona kapa isi tooytaada, isasene dakinta quurra kapa isi tooytaada.

³ Maana malla ino a Hapura Waaqatin waaqaysanna ka taanteta a laka tulan akkaannitton in koddinin mali Yesuusi Kiristoosiiw jeejjaanna, ino dukaatan dawra qara murade.

⁴ Oton jeejjatta parpaaccisniiyyi, anti waan malla so'an jeejjaada lekayan qapa; oton nama kiini waan minan taanteta laka tulan akkaannitton jeejjada'en qapaayye, ana isha qara jaalli.

⁵ Anti an delade kuyyaata sette'atinnin dawra qara murade; sanynyeeta Isira'eeli oppa kafa Piiniyaami oppaayyen delade. Ka an Ipuritta dukaata. Qoota seera Yihutaata' tooytaattaati desaaw, an Feresitta.

⁶ Qoota seera' yoota qapnaattaati desaaw, anti a tika kiristaana pora daanno; qoota seera tooytattaan hanqeellaawati desaaw, qaja malin caade.

⁷ Ma xoori waan xatta turan ana'e we' patayshan kiina ka kippanna' piisa, Kiristoosi mallan kide ka akkima wa wa'e in' nakannini kapa' dikni.

⁸ Se maliiyyiiw Poqallaayyo Yesuusi Kiristoosi upnaatta qaropeela we takkan' nefo akkima in kinnin qootan amanno malla, we' piisa kasaara'en dikanni. Ka isha malla we' piisa dape ka Kiristoosi akkatta malla we' piisa akka miissa a tika kela sahen kapa' dikni.

⁹ Waan malla sede koona' nefo, akkan hanqeelluma sene' xayyo seera qudan deena alle' diisho ka hanqeelluma sene a Waaqa amanteeta quda deena, Kiristoosi amaneetan teyo ka isha olli kinnaado malla.

¹⁰ Waan malla sede koona a pilaa'ew, akkan Kiristoosi ka Hupnaadi a tootoppa xaana' upnaado'e, akkan rakkootaadippa qoottado ka tootaadin isha pahanaado malla.

¹¹ Ka sedenne, tootoppa xaana a orra le'eeti oppa kayo malla.

Pora opa keerraan oppa kayeeta'e keereeta

¹² Amma sede piisan akkada, taaki sede piisa oppa qaja an qapo kideeta an ettansho ma; wa sene an malla Yesuusi Kiristoosi xaadi ana kodade qapatta'en keeranta' japaanni.

¹³ Hellaanno a kiristaanatiiyyi! anti in ata wossen qapade an kiini an co ka an dikanni an co ma, we takkanen koda. Wa ana kammopa ca'en alle' teyma ka wa ana turopa ca' qapatta' japaada.

¹⁴ Anti loqshaayyo akkatta'en porase opa keerraan ise ana tura co opa keerri; loqshoosen' nefo, isase a malla Waaqa Yesuusi Kiristoosi qudan opeela ana hale.

¹⁵ Semmalla ino a kallaata hapuratin qime' piisa, dikatta asse paho qapnaatta ino faani. Oton dikatta a ishin olkela pursammittane caayyeew, sede kuli Waaqa olkela ishina' la'aysha.

¹⁶ A kodditoma, kallaatose an amanteetan amma oppa kayene kallaanna.

¹⁷ Hellaanno a kiristaanatiiyyi! pahanaannon kallaatta'e, ino olli parkuma. Ka a pahanaannon kallaanna' piisa qanqannissa tooya.

¹⁸ Akkan se' turan a lekatin ishina' lele ka amma nefo ilmaama urqissaan ishina' lello mina'e, lekaya kallaatayshotin masqala Kiristoosi' paarakaala kodde.

¹⁹ Karittaaysho Waaqaaysho, wa orra jeerinna xaaysho ishootta' ulfeena; dikattaaysho wa piita' qaropa oore; semmalla piraampiraaysho' pateetta.

²⁰ Ino' xoori an orra mankisteeta moonta. Ka eeyyeeyye dinshampaytase' xanno, Poqallaanno Yesuusi Kiristoosi asanninna.

²¹ Isha dakintase' xanno are' jeerte, pursha ka akka dakintaadi a ulfeessamte Pahanaatto' koda. Sede nefo, Hupnase' xaadi a ishin we' piisa iskelopa oorsatta ettanshonne koda.