Filippisiyuusi 2 - Mataafa Qulqulloota

Pahana a naaluma Kiristoosi

¹ Oton takkumta a Kiristoosi olli qaptan minanne olli kokkonnannittaneeyye ka jaalalaadin olli' xasa oorinnittaneeyye ka Hapura Qulqullootatin takkumta qaptaneeyye ka olli' paxaarumta koonittan ka oli suraysannittaneeyye;

² dikatta takkan olli' kala ka jaalala takkan ka hapura takka ka wa koda' xaatene takka qapnaada ka seden xasiyyo immakkoota' koda.

³ Naalumaan akkima orra pila ishin qara jaallo dikada diisheey, isi patta jaalattaanne ka “Ana mali ayno ca?” Kideetanne, we takka' nefo in kodan.

⁴ Ishina matta mina'e, nama tookta mattaadi patta in faanin ma, a tookta orra pila' kuli fado.

⁵ Saanta asse pahatonne, naalumoosene a Yesuusi Kiristoosi akkishe a ishin kara kinnaaden.

⁶ Aynumaadinni, isha Waaqa; a koddito ma, kuttumoosen xaadi a Waaqa, Waaqa mina isha kinnaannitto; wa diisheeta isha parpaaccisni in kinnin kapa in dikne;

⁷ Ma xoori, ulfeenaadi alle' diishe ka a karpishsha' mina' kodde ka a nama' mina' delade;

⁸ ka pahana namatin akkaade; ka naalumaan xata isi shakkishe; ka haka tootati'i, ka tooteeyye desa haka masqala qara' to'etati a ajajame kodde.

⁹ Sede minan Waaqa ka pora ulfeena a piisa qaropa qapo opeela isha kuttishe ka maxxa a maxxada piisa qaropeela qapo ishi' kode.

¹⁰ Semmalla wa a moonte ca ka piita qara ca ka piita kela ca' piisa; maxxa Yesuusi ulfeessa'e kilpiippadan.

¹¹ Ka afaassotin maakkuman ka kidane, “Yesuusi Kiristoosi' poqalla!” Ka Waaqa Aappa' ulfeena daashan.

Akka la'ayta' mina orra piitati'i' la'ayeeta

¹² Semmalla moottadaayyooyye! an ishin kapa cooyye, akkima awta piisa ajajammittan mina'e. An amma ishin kapa pora seka cooyye, akka a qaran qapto ajajamtane'en ishin dehaammi. Semmalla ishna takka takkaayye, fuura ka xareetan dinaayshin dikkisha.

¹³ Waaqa akka dikattaadi fula kayo'e, akka kodaadi koda jaalattan ka isha ajajamtane'e, isha ishin kara koda kooni.

¹⁴ Wa' koonittane' piisa, a' qoojqoojnin ka a oli a shiishinin mali koda.

¹⁵ Oton i''asse koodditeeyye, xeltose are quumaara koddite ka neeqa oppaayye, hellaa Waaqa a qaja ka puyatama in qapnin ka qulqullaawe'e, kodditan ka piisse oppa akka hikka' mina la'aytan;

¹⁶ sede nefo oto' qaaletase a caatta kokkonnaysannittan ka qapannittaneeyye asse koddita. Seden oori keerittiiyyo ka kodiyyo qoota patta'en hasnin malla, awta Kiristoosi' oorrooyye, waan jeejjaada'en qapnaada kideeta.

¹⁷ Kalisootaayshin isho koda a amanteetaayshina a Waaqopa dehaanno qara'e, kadi caattiiyyo a kalisoota ikkayta mina' tuqamma nefooyye, ishin piisa olliiyyi xasa ana' dakaanni.

¹⁸ Ishina' kuli ka ana olli xasoottan.

Koda Timotoosi isho a Eppafrodituusi

¹⁹ Oton qootaayshinaayye desa dakayooyye, akkan xasoodo'e, jarjartan Timotoosi ishin kapopa erkeeta'e Poqalla Yesuusin kippanni.

²⁰ A qootayshina desa fayya' dikanno, Timotoosi mali nama pila an qapo.

²¹ A taakkane xoori tookta mattaayshoti kammaaw hirri diisheey, koda Yesuusi Kiristoosi we' kapa dikni in caan.

²² Timotoosi akkima nama amanteetaadi ekkaysatamte ka a qaja in qapnin koddite kodde ka akkima inna aappaaysho olli koda koonaan' mina'e, otootase a fayya kollissaanne anka ollin koda kooninno, ishina mattaayshina'e i''uptan.

²³ Semmalla oton wa itturopa ana qara kodda upnaado kammaayye, Timotoosin jarjartan ishin kapopa erka.

²⁴ Ka laadi anti mattiyyo akkan jarjartan ishin kapopa deena ettansho'e, poqalla ana qaarqaara in kiini ka kippanni.

²⁵ Akkimoose' mina'ew, inna sene' xanno Eppafrodituusi isase akka wa ana' parpaaccisna' piisan ana qaarqaaro ana' erkiten, oorissa ka ishina' erkeeta a parpaaccisnitto ana' pahanaatte. Isha xelitta an ollin koda kooninno ka ollin oranna torpininno.

²⁶ Waan malla isha ishin kapopa erkina, isha ishin piisa akkeeta yaatanni ka qoota akkima paaqe dakayten malla, karanxata kupanni.

²⁷ Keeto ipaaqe ka toota' foolsade ma, Waaqa diissata ishi' kode; Umma isha patta'en ma, akka nyarrahata qara'ew nyarrahata ana qara in kaynini'i, ana kuli'i diissata kode.

²⁸ Semmalla oto isha akkitaneeyye, akka' xasoottane'e ka qaapiyyo kuli ka horoqo'e a qaran qapto'en ishin kapopa isha erkeeta fade.

²⁹ Semmalla akka nama poqalla amanno mina'e, xasa kuttan isha teyyada ka orra isha pappaho piisa ulfeessa.

³⁰ Maana malla isase a allu ishina ana kapa kinnaattan ka ana qaarqaartan qoota' malaalten malla, isha' sede koda malla kide ka a issi in suraysannin mali koda Kiristoosi malla toota' foolsadeey.