Filippisiyuusi 1 - Mataafa Qulqulloota

Nakayta

¹ Nakayta orxayasene a Yesuusi Kiristoosi Pawloosi isho Timotoosi, kapaayye, isasene Yesuusi Kiristoosin qulqullowwa kodde ka katama Filippisiyuusi kara kala' piisa'e ka qara tooyampaya isho taaqonewwa kuli' erkame.

² Waaqa Aappinno ka Poqalla Yesuusi Kiristoosi kapaayye, daassata ka nakayta a ishina' kodden.

Qinseeta Pawloosi a kalata

³ Oton ishin matte oorsanno piisaayye, Waaqiyyon kalataysanni.

⁴ Oton ishin piisa' qinsanno piisaayye qinseetiyyo xasanne immakaanni.

⁵ Kuyyaata paayyotati paayyatte otootase a fayya torreetan haka ammati'i otootase a fayya torraanne qoota kodiyyoppa ana olli parkumten malla, Waaqan kalataysanni.

⁶ Waaqase kodoose' paxaara caattayshin oppa' paayye, akka kuyyaata a Yesuusi Kiristoosi' firteeta' tiitaawnooyye dikkisho fayya in upa.

⁷ An amma tika hida' kara co ka an hidammin kuli turanne an dukaatase a otoota fayya' qara tamaakkanno ka isheetta kokkonnannooyye, faroota a Waaqa daassataadin ana' daashe oppaayye, qoota' pisanti qoottatten malla, ishina awta piisa karittiiyyo kara' kittan; semmalla qootaayshinaayye desa asse ana' dakaatta parpaaccisni.

⁸ Akkiman jaalala a Kiristoosin a atta kitto ishin piisa yaatanno, Waaqan maakkittiyyo.

⁹ Jaalalaassin akka upna ka haasa kara akkeetan immakaadan ka kuttattaan aanane'en qinsanni.

¹⁰ Sede nefo akka wa we' piisa qaropa jaalla kara qortan ka upnaattan ka kuyyaata Kiristoosi' tiitaawnooyye, a qulqullaawe ka qaja in qapnini' kodditan malla;

¹¹ Ka ulfeena isho kalata Waaqati'i, daltase a hanqeelluma Yesuusi Kiristoosi qudan teyannitton immakaattan malla.

Hidama Pawloosinni, akkima otootase a fayya paldattan ante

¹² Hellaanno a kiristaanatiiyyi! wa ana qara' kaye' piisa akka a qaran qapto'e otootase a fayya' paldishen akka upnaattane'en faani.

¹³ Anti akkiman Kiristoosi malla hidame, tooytampaya a tika mankisteeta isho orra eyye co piisa upnaade.

¹⁴ Hidamiyyo minanne hellaanno a kiristaana a Poqallaan ca oppaayye, lekaya maxanyumaan ka fuura maliiyyi qaaleta Waaqa' haasawatta'e kokkonnuma akkade.

¹⁵ A koddito ma, a demo yoota ka olkapa nyareetanne otootase a fayya a Kiristoosi torrini; demo xoori karitta fayyaatinni Kiristoosi torrini.

¹⁶ Sene qaalese a Waaqa karitta fayyaatin torrina, jaalalaanne torrini; ishootta' nefo wa malla asse koonaane, akkiman anti otootase a fayya qara tamaakkatta malla are co qoota upan malla.

¹⁷ Sene a taakkane qoota Kiristoosi desa qindan desa quu'ina ka torrina' xoori karitta fayyaatin torrini in caan ma, isi jaalattaanne torrini ka akka hidamiyyo qara' rakkoota pila ana qara' qeedan dikaden.

¹⁸ A koddito ma, pappahanassaan koddite dukaatan koddite qinda pisan Kiristoosi torraammiiy, xasa ana dakaanni.

¹⁹ A pilaa'ew waan malla xasoonna, qinseetaayshinanne ka qaarqaarsa a Hapura Yesuusi Kiristoosinni akkan nataan sooko qootan upo malla.

²⁰ Akkan pakkanna an jeerrin kippeetannen asanni. Ma xoori akkiman awta piisa koono mina'e, awwe kuli tootiyyo ka caattiyyonne Kiristoosi dakintiyyo oppa ulfeessama in kiini ka maxanyumaan haasawanni.

²¹ Semmalla ana'e caatta kideeta Kiristoosin kallaatta; toota kideetaaw ana' tannapa.

²² A koddito ma, oton dakintose' xayyo are kitton kallaannooyye, koda dalta qapon koda kideeta. A koddito ma arepa desa kallaatta isho tootoppaayye a xaame akiman reexado an upo.

²³ Dikattose lakki oppa'en qapame; qinda takkanne, Kiristoosi olli kinnaatta qoota we' piisa qara qapto malla, caattose oppa sookeeta ka Kiristoosi olli kinnaattaan faani.

²⁴ Qinda takkanneew, kinnaattiyyo a kuttati ishina' parpaaccisni;

²⁵ seden kippanni ka akkiman toota kela paho ka akka amanteetaayshin kuttatto akka xasoottane'e, ishin olli kinnaado upa.

²⁶ Oton amma lammatta ishin kapopa oorooyye, jeejjaatta a ana minan qaptan Yesuusi Kiristoosin ikoopa.

²⁷ Ishina' xoori akka otootase a fayya a Kiristoosi parpaaccisnitto qara' kallaada; sitiiyyi oori kadin punu de'a ka ildaan ishin akkaayye, taaki ishin kapa sekaada ka qootaayshinaayye desa dakayna nefooyye, akka hapura takka qara kokkonnaatten ka qa'atten ka karitta takkan amanteeta otootase a fayya orra qaran kaya' soonnittan in upnaada.

²⁸ Pakkanna toorampayaassina an fuuran. Maxanyumoosen xaayshin ishootta'e milikkita pateetta. Ka ishina'ew akkima dintane'e, milikkita a Waaqa kapa de'e.

²⁹ Wa malla sede qoota Kiristoosi desa ishina' daasamte, akka isha amantan patta mallanne ma, akka isha malla rakkattan kuli malla.

³⁰ Semmalla ana olliiyyi a rakkoota qoottanna' kodditen; rakkoose' nefo, isase turan ana qara' kayte akka akkiten ka amma nefo ana qara' kayte akka dakaynittan.