Efesooni 6 - Mataafa Qulqulloota

Qoota toolla isho a hellaati desa

¹ Ishina hellaayye! qoota a Poqalla kodditen malla, toollaassina ajajama; sede wa parpaaccisna'ey.

² Ajajase' kiino'e, “Aappaayshin isho ayyaassin ulfeesse.” Ajaja paayyota a karaayye kippeeta qapo.

³ Oton sede' kooniiyyi, “We' piisa olkela ke' teya, paraayti kuli ka deraada.”

⁴ Ishina toollaayyeew! taanteta Poqallaatin hellaassin kollissa ka fukkaan qoha diisheey, pora ishootta an mimmiirayshan.

Qoota poqalladda isho a karpishshaddaati desa

⁵ Ishina' karpishshaddaayye! akka Kiristoosi ajajamittan mina'e, a piita qara poqalladdaassin kodde ulfeessaanne ka tura fuuretanne karitta fayyaatin ishootta' ajajama.

⁶ Oto ishootta ajajammittan nefooyye, akka karpishshadda a Kiristoosi a heenna Waaqa karittaayysho' piisan koona' mina kodda diisheey, ildaasso tura akkaatta ka peepaasso teyeeta malla in koddinin.

⁷ Akka nama kela koda a' kooni a' kinnin ka poqalla kela koda koonittan mina kodda ka xasan koda koda.

⁸ Maana malla, karpishsha taaki a karpishsha in koddinin, nama kodaadi a paxaara a kode kapa'e akka poqalla kapaayye rapootaadi teyo i'uptaneey.

⁹ Ishina' poqalladdaayyeew! akkima poqallasene xaayshin ka xaaysho kodde ka qatayma kooni in kinnin moonte qaptan i'uptaneey; asseew ishootta' koda ka ishootta nyara diisha.

Mehadda oranna a Waaqa kapa' teyanna

¹⁰ Oori poqalla ka hupnase' xaadi kokkokan japaada.

¹¹ Ka akka koda sassapa a seetana isi qara oorssa ettanissane'e, meeha a oranna a Waaqa' piisa hidada.

¹² Orannaanno orra ollin ma, mukissampaya ka piddampaya a ukkuumampaya ka a sapanoose a tukkanta, isho hupnada a piisiti; se kideese nefo, xela oranna a hapurra nenneeqa a moonteeyye ca, olin torpininna.

¹³ Semmalla kuyyaata neeqati akka hupna nyaapa isi qara oorissa ettanissane'e ka we' piisa dikkissa ka qa'atta ettanissane'e, meeha oranna a Waaqa' piisa hidada

¹⁴ Semmalla dukaata akka sinnaara' mina surraappa' hidada ka hanqeeta sipla a kessoppa' qaarannaan mina' qaarada.

¹⁵ Ka otootase a fayya a nakayta a xopa mina loqqaassin kela' kalsada ka tura' harmisada ka qubba qara' qa'ada.

¹⁶ Ka a se' piisa qaran qapto'ew, lawase a seetana a apitta' mina hapulpullo akka' libbissa ettanissane'e, amanteeta a kontaleeta mina' qapada.

¹⁷ Ka akkimoose' mina'ew dina akka kulleeta a sipla' mina isqara' kalsada ka qaaletase a Waaqa koraateta a Hapura Qulqulloota' koddite qapada.

¹⁸ Wa koddina' pisa oppa'e, qinseeta isho lelatta ika pisanne Hapura Qulqullootatin qinsada. Ka sede matta kara qapnaada ka impasa ka awta pisa qulqullowwa' qinsada.

¹⁹ Oton juuttotase a otoota fayya' fuura mali la'assa' haasawannooyye, akka qaaleta parpaaccisnito ana' daasamto'e, ana kuli' qinsada.

²⁰ Amma sede an are sansalaataan hidame nefooyye otootase a fayya torra'e, an saara erkame. Semmalla akka ana' parpaaccisnitto mina'e, akkan fuura mali haasawado'e, ana' Waaqa qinsada.

Nakayta piraampira

²¹ Tikiqoosi innasene' xanno a kiristaana jaalatame ka koda Poqalla Yesuusin orxayta amaname kodde, waan oppa ca ka maana akkiman koono piisa ishina' lela.

²² Semmalla waan oppa kinna akka upnaattan ikka ishin kuli kokkonnaysho'en isha ishin kapopa erkini.

²³ Waaqa Aappa ka Poqalla Yesuusi Kiristoosi kapaayye nakayta ka jaalala, amanteeta ollin a hellaanno a kiristaanati' kodden.

²⁴ A jaalala panni in kinniniitin Poqallaanno Yesuusi Kiristoosi jaalanna' piisa'e, daassata Waaqa a koddito.