Efesooni 5 - Mataafa Qulqulloota

Akka orra la'ayta' mina' kallatta

¹ Semmalla qoota hellaa a Waaqan akata jaalatame kodditen malla, Waaqa pahanaada.

² Kiristoosi akka ino jaalade ka daassata isho kalisoota alaawnitto ka Waaqa xasannitto isi kode ka daashe mina'e, ishina' kuli asseew jaalalaan kallaada.

³ Wa asse pappaha qulqullowwa ettanni in caaneey, wa sharmutuma taaki nyela ika heente taaki qorqommuma paha desa diishema, otootaaysho' nefo ishin oppa dakaatta parpaaccisni in kitto.

⁴ Sekkapaayye Waaqa' kalata kalsha diisheey, haasa jeera ka haasa eepuma isho futaytuma a neeqa haasawatta ishin parpaaccisni in co. Wa asse paha ishina in ettanan.

⁵ Dahalmayta taaki dahalmayteeta taaki a nyela koono, taaki yooyompayta se kideese' nefo, a killanna waaqaysanno akka mankisteeta Kiristoosi isho a Waaqa oppaayye lehanda in akkannin upnaada.

⁶ Wossen minanne, qoota orra ajajammi in kinnin qara' miira Waaqa de'o malla, nama takka nefo haasa paata pattatin ishina in sassapannin.

⁷ Semmalla orra asse pappaho olliiyyi in parkuman.

⁸ Xatta turan ishina a tukkanta, ma amma, qoota a Poqalla' kodditen malla a' la'ayta; semmalla akka orra la'aytoppa kalo mina kallaada.

⁹ Maana malla, dalta a paxaarumta' piisa ka a hanqeelluma isho a dukaata la'ayta kapa deeniiy.

¹⁰ Semmalla wa a Poqalla xasanna maana akka kodden kara qora.

¹¹ Kodase a tukkanta' kela delta in qapnin olli in parkuman ma lakopa sooksha.

¹² Wa orra tukkanta kara kalo dekandekatti koonaati desa haasawatta jeera.

¹³ We' piisa oto la'aytoppopa sookaneeyye ja'i kiini ka akkanni.

¹⁴ La'ayta akka we' piisa ja'i kidan ka akkaadane'e kooni; semmalla ikidamte, “Atti ke a mukno, impase! Ka orra le'eppaayye xa'e! Kiristoosi ike' la'ayshaay.”

¹⁵ Semmalla akka orra ookuma qapo diisheey akka orra ookuma in qapnin mina'e akka a' kallaannini'i, akka kallaannittan qanqannissa isi tooytaada.

¹⁶ Sapanoose' qoota neeqi malla, aroota a akkannittan piisa kara'e wa paxaara' koda.

¹⁷ Semmalla heenna Poqalla' maana akkima kodden upnaada diisheey, eeppa an koddan.

¹⁸ Qoota pateettopa orran annitto malla, taadeta wayneetatin in maashshoodan. Ma sekapaayye Hapura Qulqullootatin immakaada.

¹⁹ Masmuureta a Waaqa ulfeessa ka a kalataysatta isho masmuureta hapuratin olli' haasawada ka saara isho masmuuretan karittayyshin piisan Poqalla kalataysada.

²⁰ Ka maxxa Poqallaanno a yesuusi Kiristoosini awta piisa qoota we' piisati desa Waaqa Aappa kalataysada.

Qoota diirta ka a iskatteetaaditi desa

²¹ Ishina takka takkaayye ulfeena Kiristoosi malla kida ka olli' ajajama.

²² Ishina iskatteeyye! akkima' Poqalla Yesuusi ajajammittan mina'e, diiraassina ajajama.

²³ Akkima Kiristoosi matta tika kiristaana' kodde mina'e, diirta asseewween matta iskatteetaadi. Semmaliiyyiiw Kiristoosi tikase a kiristaana dakintaadi koddite'e, dinshampaytaadi.

²⁴ Akkima tika kiristaana Kiristoosi ajajammitto mina'e, asseew iskatta a we' piisan diirraassoti ajajamo.

²⁵ Ishina' diirraayyeew! akkima Kiristoosi tika kiristaana' jaalade ka isheeta malla isi daashe mina'e, ishina asseew iskattaayshin jaalada.

²⁶ Kiristoosi wa malla sede kode, tika kiristaana qulqullassa fade. Wa ishin qulqullayshe' nefo, qaaletaadinni pishaan isheetta jaqe.

²⁷ Ka sedenne tika kiristaana a jureeta taaki fuula poornassa taaki wa a neeqa a asse paha a isheetta qaraayye in kinnaannin mali qulqullitteeta a qaja in qapnin ka siratte' koda ka isturopa dehaysha.

²⁸ Akkimoose' mina'ew, diirra akka isi jaalannaan mina'e iskattaaysho jaalatta ishootta parpaaccisni. Nama iskatteetaadi jaalanno isi jaalanni.

²⁹ Nama dakintaadi needdino in co. Sekkapaayye idaminni ka qara tooyni diisheey. Kiristoosi' nefo asseew tika kiristaanati' kode.

³⁰ Ino'ew an meella dakinta Kiristoosi.

³¹ Seminanne kidamte, “Nama Aappaaysho isho aayasso'e diinni ka iskatteetaadi quda' jaqqalli; ishootta lakki ka dakinta takka koddini.”

³² Juuttotose akata kara seki. Ma anti, qoota Kiristoosi isho a tika kiristaanati desan haasawanni.

³³ Ma ishina matta mina'e, nama a iskatteetaadi isi mina' jaalado, iskatteetaaw a diirtaadi ulfeessito.