Efesooni 4 - Mataafa Qulqulloota

Kiristoosin takka koddeeta

¹ Semmalla anase Poqalla kela koda kodeetiiyyo minan hidame, wa malla halaamteneti'i akka caatta parpaaccisno kallaattane'en ishin naappanni.

² Jaalalaan oli kela duupada ka awta piisa naaluma ka tajjanuma isho oli haadattaan kallaada.

³ Nakaytan oli qapada ka takkumtase Hapura Qulqulloota kapa teyannitto tooyta' japaada.

⁴ A' halaamteneeyye akka kippeeta takka' halaamten' mina'e, dakinta takka ka hapura takka ca.

⁵ Poqalla takkan ka amanteeta takka isho jaqqaysuma takkan ka caaneew.

⁶ A piisa qaropeela co ka piisa kara koda koono ka piisa kara kallaanno, isase aappa opa we' piisa kodde, Waaqa takkayta ka caaw.

⁷ Ma xoori akka Kiristoosi daassata' piisade mina' kitto'e, ino takka takka' daassataadi daasamte.

⁸ Sede nefo akka kidamte, “Ete opeela fayyadeeyye, orra a poojaame lekayta qapade ka ishin aane, ka orra' daassawwa daashe.” mina.

⁹ Ka kuli qaalese' kiinitto, “Opeela fayyade.” Akka piiteeyye kelopa xata lekkade maliiyyi, a pila maana kideeta koddita?

¹⁰ Sede opa xata lekkade ishaaw we' piisa immaka'e moontada piisa qaropeela fayyade.

¹¹ Isha akka a demo erkamampaya koddan, a demo ka xuumampaya koddan, a demo ka a otootase a fayya' torrina koddan, a demo ka a orra amanno siknna koddan, a demo ka kollissampaya koddane'e daassawwa daashe.

¹² Wa malla sede kode' nefo, tikase a kiristaana dakinta Kiristoosi koddite, akka kokkonnaatto'e; orra amane koda a kodammo'e harrmissa malla.

¹³ Ka akkan inna Waaqa amaneeta ka upnaatta qudan takkumtase amanteetan teyaannitto oppa kayno ka akka Kiristoosi immakkoota kodde ka qaja in qapnin mina'e, ino' kuli immakkoota koddino malla.

¹⁴ Arepa desa oorii, xayxayta isho puppeeta a pakateeta qara a kollissa sassapa a ilattuma isho a pappahanassa namatin kodame ka akka kamma dapane'e orra koononne a nyoqqawwa' mina'e a arepa ka arepa daysamma an koddino.

¹⁵ Sekapaayye, dukaatan jaalalan haasawanna ka we' piisan Kiristoosise matta kodde opeela kuttanna.

¹⁶ Meella a dakinta ika lekayta Kiristoosinni oli mina' rakammi, dakinta piisa ka hittinnaan oli mina' qapammi. Semmalla meella piisa, oto matta mina'e kodaaysho a ishootta' daasame koonaaneeyye, dakinta piisa kuttanni ka jaalalaan kokkonnaanni.

Caata haaraya a Kiristoosin teyaanno

¹⁷ Semalla arepadesa oori akka a orrase Yihutaata in koddinin a dikattaaysho paata patta kodde mina in kallaadanen kiini ka maxxa Poqallaatin sede kokkonnanni ka ishina' lelli.

¹⁸ Mattaaysho itukkane; upna dapnaasso isho kamtoollumaasso minanne caatta Waaqa kapaayye isekaaden.

¹⁹ Qoota jeera ishootta' dakaanni in kinnin malla, nyaladda piisa koda'e xajeeltaaysho a so'ati isi daashen.

²⁰ Ishina' xoori qoota Kiristoosi desa asse a' kollanne.

²¹ Dukaatan qootaadi desa iddakayten ka dukaatase Yesuusin kitto qara'e isha kapa kollatten.

²² Semmalla aynumayteese xaayshin kere a xatta, a ishin kallaannittan, isase xajeeltase ishin sassapanno ka juppootoppopa ishinan annoon nyapale, akka alle isi quda sookissan ikkollatten.

²³ Mattaayshin akka hapuran haaraya koddo

²⁴ ka hanqeelluma isho qulqulluma a dukaatatin aynuma haaraya isase Waaqa pahanaatta uumame akka kalsatten malla.

²⁵ Semmalla darta in haasawadan! Piisantiiyyi qootan meella a dakinta takka' koddine malla, dukaata olli' haasawanna.

²⁶ Miirooda ma miiraayshinan juppoota an kodan; umma miiraayshin qara'e letta in dummin.

²⁷ Ka taaploosi' saanta in panan.

²⁸ A hanno arepa desa in hannin; sekapaayye, akka rakkatampaya'e wa daasha' qapnaado'e a harkaadin wa paxaara' kodo ka yaalo.

²⁹ Afaassin oppa lela a neeqa takka nefo in sooknin. Ma lela a orra dakayyno xasanno ka kokkonnassa we' nakanno ka orra' parpaaccisno haasaawada.

³⁰ Ka kuyyaatase a oppa furamtane'e Hapurase a Qulqulloota a Waaqa a ishin kobbeetan toommamten in nyarrahasiisan.

³¹ Miiran kupatta ka aareeta ka miira ka horayta isho otitta a neequmta' piisa ollin a alle ishin kapa sekaaden.

³² Sekkappaayye a wa paxaara olli' koona ka oli suraysanna' kodda ka akka Waaqa Kiristoosi qudan ishina' diishe mina'e, ishina asseew olli' diisha.