Efesooni 3 - Mataafa Qulqulloota

Pawloosise akkima orra a Yihutaata in koddinin oppopa erkame

¹ Semmalla anti Pawloosi ishin orra a Yihutaata in koddinin mallan kide ka qoota Yesuusi Kiristoosi malla hidame.

² Akka ishina we patasso'e Waaqa akkima daassataadin faroota a ishina koda kodeeta ana' daashe dukaatan iddakayten.

³ Akkiman turan qattishe ka pora kumma'an ishina' taafe mina'e, Waaqa juuttotaadi sookshe ka kelashaatoppan ana' akkishe.

⁴ Oto sede an ishina' taafe nappapnittaneeyye, a atta kitto'e akkiman juuttota Kiristoosi upnaade akkeeta i'ettanissan.

⁵ Juuttose nefo akkima amma hapura Waaqatin erkamampaya isho xuumampaya akkaatte mina'e orra sapanna tarrpeeti cooti'i in akkaanne.

⁶ Sede nefo wa akkinnitta, orra a Yihutaata in koddinin akkima Yihutaata olli lehan a sene lehaado ka meella a dakinta takka' koddo ka otootase a fayya qudanne kippeetase a Waaqa daashe Yesuusi Kiristoosin qoottado akkinni.

⁷ Akka hupna Waaqa koda koono qara'e anti ka daassatase a Waaqa ana' daashenne otootase a fayyaati orxayta kodde.

⁸ Anti kadin punu qulqullowwa piisa kelopa xata shakkiiyyi, akkan paxaarumtase a Kiristoosi turaayye xeela in qapnin orra Yihutaata in koddinini' torro'e daassata Waaqatinni faroose ana' daasamte.

⁹ Ka akkimoose' mina'ew juuttotase a sapanna tarpeetiiyyi Waaqase we' piisa uume juute, wa Waaqa koda' qapade akkan orra piisa' la'aysho'e daassase ka ana' daasamte.

¹⁰ Dikatta a Waaqa' nefo, sapanoose a amma oppaayye, tika kiristaana qudanne saarra isho ukkumampaya moonte ca akka ookumase a Waaqa pahana lekayan akkanno upnaadan malla.

¹¹ Waaqa wa haka paraparati koda' qapade qara'e Poqallaanno Yesuusi Kiristoosi qudan sede dikkishe.

¹² Qootan a Kiristoosi koddine ka isha amanninno malla, maxanyuma ka karitta immakootan fuula Waaqa' turopa dehaatta in ettaninna.

¹³ Rakkoota an anti ishin malla teyyanno ulfeenaayshin; semmalla, rakkootiyyo malla xasa an muranen kiini ka ishin' naappanni.

jaalala a Kiristoosi

¹⁴ Semmallan fuula Waaqa Aappa tura kilpiippanni ka qinsanni;

¹⁵ Toola a piita isho moontan co piisa, maxxaadi a dukaata Waaqa kapaaw akkanni.

¹⁶ Waaqa teyantaadi a ulfeena oppaayye akka hapuraadi qudan hupna a karan xata ishin kokkonnaysho, ishina' daasho'en qinsanni.

¹⁷ Ka akka Kiristoosi amanteetan karittaayshin kara kinnaado, akka hittina katattan ka a jaalalaan kokkonnaanna kodditane' qinsanni.

¹⁸ Ka qulqullowwa piisa ollin akka jaalala Kiristoosi paldumaasso ka derumasso a piitandesa ka kuttumaasso a moontandela isho sekumaasso a piita kelanxata atta akka caan upnaatta ettanissane'en qinsanni

¹⁹ Ka jaalaloosene a Kiristoosi upna nama' qaropeela ca akka upnaattan ka immakkoota Waaqa piisan immakaattoppa kaytane'en qinsanni.

²⁰ Semmalla Waaqase hupnase' xaadi ino karan koda koono qudan waan qinsanninna ka dikanninna qaropa a kuttati jaalissa ka koda ettaninno'e,

²¹ ishi'i, tika kiristaana kara isho Yesuusi Kiristoosi qudanne sapanna piisa kara'e haka paraparati'i a ulfeena isha kayo. Ameen!