Efesooni 2 - Mataafa Qulqulloota

Kiristoosin tootoppa desa caattappopa tuulleeta

¹ Ishina ishin dapaytaayshin ka juppootaayshin minanne, kallaataayshin a hapuratinni a orra le'e.

² Ka sitiiyyi saantase a piisseti neeqa kamma annittan ka isase hupnaddasene a hapura xayxaytoppa ca ukkummooti ajajammittan. Isha' nefo hapurase neeqa orra ajajammi in kinnin kara koda koono.

³ Seturan ino pisaniiyyi anka ishoottoppaayye heenna so'anno isho dikatta mattinno kammaaw anninna ka xajeelta so'annotin kallaanninna ka akka orra pila' mina'ew dalaanno oppaayye miira Waaqa kela kinna.

⁴ Maa xoori, Waaqa a diissatan koope, jaalaladi a ino' qapa' qoota akata kutti malla,

⁵ Kadin punu ishin dapaytinnon a le'e' koddine nefooyye, Waaqa Kiristoosi olli caattampaya ino kode. Ishina ka daassataadin dinten.

⁶ Waaqa Yesuusi Kiristoosi olliiyyi tootoppa ino xaashe ka pora moontatiiyyi isha olli ino kutiishe.

⁷ Wa malla asse kode nefo, sapanna itturopa deenaatiiyyi akka daassatase' xaadi koopte ka tura xeela in qapnin qudan a xoonaadin Yesuusi Kiristoosin ino sookshe ino akkissa malla.

⁸ Ishina amanteeta qudanne daassataadinni dinten; ini nefo daassata Waaqa diisheey, wa kodaayshinan teyade'en.

⁹ Akka nama takka' nefo isin in jeejjinini'i, daassase a dina kodaanne, in teyanne.

¹⁰ Ino kodaddaasene paxaara a Waaqa turan harmishe akkan koono'e, an uumata Waaqa a Yesuusi Kiristoosi qudan lammatta uumame.

Takkumta a Kiristoosin teyanitto

¹¹ Semmalla ishina turan dalaassin oppaayye a orra a Yihutaata in koddinin, a Yihutaata harka namatin dawra qara muratte ishina' kiinitta, “Ishina a dawra qara in murannini;” sede matte oorsada.

¹² Ishina sitiiyyi akka kiristoosi ka samayta Isira'eeli oppa a' qapnin ka kodeetase a kippeetati' xaykiyya kodditen ka piisse qaraayye kippeeta a' qapnin ka a Waaqa maliiyyi kallaanna' kodditen, akka Kiristoosi kapa xawwi oorten, matte oorsada.

¹³ Amma xoori ishina se turan sekaade, Yesuusi Kiristoosinni kinnaatten ka diikaadin dehaatten.

¹⁴ Kiristoosi nakaytinno! Isha qussase a miira olkela ino reexe alle' poote ka Yihutaata isho orra a Yihutaata in koddinin takka' kode.

¹⁵ Ka samayse lakkippaayye samayta takka haraya a isha olli parkumo, uuma'e dakintaadin ajajadda isho tampeewwa seera alle hattishe ka nakayta kode.

¹⁶ Ka masqalase' xaadi a paarkaaluman haattishenne, Ishootta lakki dakinta takka' kode ka Waaqa olli araarshe,

¹⁷ Ka de'e ka ishina a pora sekaayye ca isho Yihutaata a pora dehaayye kitto'e otoota a fayya a nakayta' torre.

¹⁸ Ino' pisantiiyyi isha qudanne hapura takkan Aappa kapopa dehaatta in ettaninna.

¹⁹ Semmalla ishina qulqullowwa olliiyyi, a orra piita takka ka a toola Waaqa diisheey, arepa desa a' xaykiyyaan umma a' kalaytan.

²⁰ Ishina kiritta a erkamampaya isho a xuumampaya qara'e qupamten; dakase kiritta qeppeelitta' kodde nefo Yesuusi Kiristoosi.

²¹ Qupeeta piisa ishannew oli mina kakkalte ka tikase a Qulqulloota a Poqalla' kodda kuttanni.

²² Ishina'ew tika a Waaqa hapuraadin kara' kallaanno kodda'e takka oli tura Kiristoosin qupammittan.