Efesooni 1 - Mataafa Qulqulloota

¹ Erkana ana Pawloosise heenna Waaqatin erkamampayyta a Yesuusi Kiristoosi kodde kapaayye, qulqullowwasene Yesuusi Kiristoosin amaname ka Efesooni kara caati erkame;

² Waaqa aappinno ka Poqalla Yesuusi Kiristoosi kapaayye a daassata Waaqa isho nakayta a ishina' kodden.

Saka Hapura a Yesuusi Kiristoosi qudan teyanno

³ Aappa opa Poqallaanno a Yesuusi Kiristoosi isase Kiristoosi qudan sakase a Hapura' moonte co piisan ino' sake Waaqa a kalataysamo.

⁴ Akkan qulqullowwa a qaja in qapnin koddino ka fuulaadi tura kinnaanno'e, a piita in uumammin turanne jaalalaadin Kiristoosi qudan ino reexade.

⁵ Waaqa heennaadi a paxaara'e koddite ikka Yesuusi Kiristoosi qudanne akkan hellaadi koddino'e, turanneew akka koda' qapade qara'e qattishe ka ino reexade.

⁶ Wa malla asse kode' nefo, innasene' xaadi jaalatame qudanne, daassatase' xaadi ulfeessamte a patta ino' daashe akka kalataysamto malla.

⁷ Daassata Waaqa a koopte minannen diika innaaditin furamme ka haseenta juppootinno akkanne.

⁸ Isha ka daassataadi ookuma ka upna pisan ino' koopshe ka tupa xata ino' tuqe.

⁹ Waaqa heennaadi a paxaara'e koddite ikka Kiristoosi qudan akka turanneew koda' qapade qara'e, akkan juuttota heennaadi upnaanno' kode.

¹⁰ Kodoose qapame a Waaqa oto etaadi kaytooyye kodo, uumata a piita isho moonteeyye co piisa akka ollopa ooro ka hupna ukkumeeta a Kiristoosi a isase matta kodde kela kinnaado' kodeeta.

¹¹ Waaqase we' piisa akka heennaadi a koda' qapade qara akka koddane' koono, akka turanneew qootinno desa piisade qara'e, akkan Kiristoosi qudan hellaadi koddino'e ino reexade.

¹² Sede nefo wa malla asse koddite, innoosene Kiristoosi kippatta'e a paayyota kodde akkan ulfeena Waaqa kalatan akkinno malla.

¹³ Ishina'ew, ete qaalese a dukaata dinaayshina otoota fayya koddite dakayteneeyye, Kiristoosi amanten ka Hapurase a Qulqulloota, isase a isha akkima ishina' daasho'e ishina' kippeeta daashen toommamten.

¹⁴ Hapuroose nefo, akka ulfeenaadi' kalata koddo'e, haka Waaqa a xaadi kodde piisa furanno kara'e, lehnaasene an itturopa akkannaati qapteetinno.

Pawloosi akkima orra Efesooniti' qinsade

¹⁵ Semmalla amanteeta a Poqalla Yesuusin qaptan isho jaalala a qulqullowwa piisa' qaptane'en dakaye ka

¹⁶ qinseetiyyon matte ishin oorsanni ka ishin malla kalata Waaqa' kalissa an qa'atinni an kinnin.

¹⁷ Aappa opa Poqallaanno a Yesuusi Kiristoosi Waaqase a ulfeena isha parpaaccisno, akka a qaran qapto isha upnaattane'e, akka hapura ookuma isho a olkela paata la'anno ishina' daasho'en qinsanni.

¹⁸ Kippeeta a atta pahato'e akkima' halaamten ka lehnasene ulfeessame a qulqullowwa lehaadane a atta kitto akkima kutti, akka upnaattane'e, ildaassin a karan xata akka ishina' panamane'en qinsanni.

¹⁹ Ka hupnase' xaadi kutta ekkaysatammi in kinnin ino amannaati a atta kitto akkima kutti akka upnaattane qinsanni.

²⁰ Hupnose a Waaqa kutta ino kara koda koono nefo Kiristoosise a tootoppa xaashe ka moonteeyye harka Waaqa a akkittati' kutiishe qudanne akkishe.

²¹ Waaqa Aappa ete Kiristoosi moonteeyye harkaadi a akkittati' kutiisheeyye, mukissa ka ukkumeeta ka hupna isho poqluma a piisa qaropa jaallo ishi' daashe. Ka piisse are kitto pattoppaayyen ma, piita ituropa deenitto kuli oppaayye maxxa ulfeessame a piisa qaropa qapo ishi' daashe.

²² Ka we' piisa hupnaadi a ukkumeeta' kelopa oorshe ka ishi' piddacciise ka tika kiristaana' karaayye, akka we' piisa qaropeela kinnaado'e, matta isha kode.

²³ Tika kiristaana dakinta Kiristoosi; Kiristoosi'iw tika kiristaana isho wa ata hase piisa qara immakkoota.