Mataafa Saamu'eeli a lammatta 9 - Mataafa Qulqulloota

Akkima Taawwiti Mefepoosheti wa paxxaara kode

¹ Taawwiti ka kide, “Qoota Yoonataani malla naman ishi paxaarumta kodo, a sanynyeeta Saa'oolippa pahe, hela ica?

² Tika Saa'ooli karaayye, orxayta takka Siipa kidammo ka ca. Ikka Taawwiti turopa isha halen; nuqusa ka isha kaassade ka kide, “Hela atti a Siipa?” Isha ka ishi oorshe ka kide, “Aa! Anti an Siipa orxaytase xaayti.”

³ Nuqusa ka isha kaassade ka kide, “Akkan paxaarumta Waaqa ishi kodo'e, sanynyeeta Saa'ooli oppaayye hela nama pahe in co?” Siipa ka nuqusa kide, “Inna takkan a Yoonataani loqqaan totoonnaawe'e ca.”

⁴ Nuqusa ka ishi kide, “Ayshaayye caan?” Siipa ka nuqusa kide, “Lotapaari karaayye, tika a Makiiri a inna Ami'eeliiyyi caan.”

⁵ Nuqusase Taawwiti ka orra erke ka Lotapaariiyyi tika Amakiiri a inna Ami'eeliiyyi Mefepoosheti qeede.

⁶ Mefepoosheti inna Yoonataani oopaase a Saa'ooli ka Taawwiti turopa dehaade ka fuula piitan kaye ka ishi kaareeta oorshe. Taawwiti ka isha wellele ka kide, “mefepoosheti! Ishi ka ehade ka kide, ee! Poqallaay, anti an mefepoosheti orxaytase xaayti.”

⁷ Taawwiti ka ishi kide, “in fuuran! Anti aappaayshin Yoonataani mallan kida ka paxaarumta ke kodaay. Ka piita Saa'ooli a aakkaayshina piisan ke kalsha atti ka awta piisa ana olli damta damta.”

⁸ mefepoosheti ka kaareta ishi oorshe ka kide, “Ana kuta to'e kapa dikammo, anti orxaytaayti an nameeyye maanaaw, akka asse ana tooyyatte?”

⁹ Kammadesa nuqusa ka Siipa orxaytase a Saa'ooli hale ka ishi kide, “Wa a Saa'ooli isho a sanynyeetaadi kodde piisa tooy anti oopa poqallaattitin daashe.

¹⁰ Oopa poqallaatti akka wa damta akkado'e, ke isho hellaatti ka orxayaatti piita ishi qottan ka unta ishi kalissan; oopa poqallaatti mefepoosheti ka awta piisa ana olli damta dama.” Siipa, hellaa a diira kudanka ken ka orxaya kunda lakki qapa.

¹¹ Sekkammaayye, Siipa ka nuqusa kide, “Nuquso poqallaayyo! Wa atti ana orxaytaayti ajajte piisan koda.” mefepoosheti ka hellaa nuqusa oppa akka takka mina dikame ka Taawwiti olli damta dammi.

¹² mefepoosheti inna Miikka kidamma shakkaya qapa, a tika Siipaayye kala piisa ka orxaya mefepoosheti kodden.

¹³ mefepoosheti qoota awta piisa nuqusa olli damta dammo malla, Yursaalami kara'e kallaanni; loqqaadi lakki xoori totoonnaya.