Mataafa Saamu'eeli a lammatta 8 - Mataafa Qulqulloota

Putaymadda a Taawwiti orannaappa akkade

¹ Sekkammaayye, Taawwiti Filisteemeta pute ka iskelopa isheetta oorshe ka katama Maateki'ama kidamma isheettaqaraayye qeede.

² Ka Mo'aapeta puteew ka olkammandesa jirfa sessa'e ishootta piitopa mukshe ka haatan ishootta ekkaysade ka oppaayye jirfa lakki leyshe ka jirfa sessatta hattishe. Mo'aapeta ka Taawwiti piddamte ka isha kapparte.

³ Taawwiti ka hamintaadi a kirra Efraatiisi kapa kitto oorsatta tuuleew ka Hataati'eseri inna Rehoopi, nuqusase a Soopa puteew.

⁴ Ka qaraayye xela oranna a fartan torpina kuma ka dippa tappa ka a loqqaan anna kuma kunda lakki pooje; ka fartada a sarakeella tinna dippaaw hattishe ka a taakkane piisa qiqqintile.

⁵ Ka ete Soorata Temaasqo Hataati'eseri nuqusase a Soopa qaarqaara awliteeyye, Sooratoppa'e, nama kuma kunda lakki lakki leyshe.

⁶ Ka Tamaasqo a Sooriya kara'e safarra oranna qaatishe. Soorata ka Taawwiti piddamte ka isha kapparte. Waaqa ka pora oppopa Taawwiti tuule piisa oppaayye ishi putayma daashe.

⁷ Taawwiti ka kontalewwasene a warqeeta a saarra Hataati'eseri qapannaane pooje ka Yursaalamipan kale.

⁸ Ka katamaddasene a Hataati'eseri Pataahi isho Perotaayi karaayye sipla poora a akata leka pooje.

⁹ Nuqusase a Hamaati To'i, akkima Taawwiti xelase a oranna a Hataati'eseri piisa pute ete dakayeyye,

¹⁰ qoota turan a lekatin Hataati'eseri torpe malla, Taawwiti ka Hataati'eseri pute malla, akka nakayta ishi oorsho ka “Paka xasootte” Ishi kido'e innaadi Yoraami nuqusase Taawwiti kapopa erke; Yoraami ka meeha a sipla dakara ka a warqeeta ka a sipla poora qapade ka ishi de'e.

^11-12 Taawwiti ka akkimase a sipla dakara isho a warqeeta, a mankistewwa a pute piisa qara pooje ka Hataati'eseri inna Rohoopi nuqusase a Soopa qara pooje Waaqa reexxe mina'e, meehose kuli Waaqa xawwi reexeew. Mankistewwasene a qara meehase pooje nefo, Etoomi ka Mo'aapi ka Amooni ka Filisteemi isho Amaleqi.

¹³ Taawwiti ete naaba Sookitta kara Etoometa nama kuma kudanka sette leyshe ka kaleeyye, kurraadi ka dakaade.

¹⁴ Ikka piitadda Etoomi piisa kara safarra oranna qaatishe. Etoometa piisa ka ishi piddamte, Waaqa ka pora oppopa tuule piisa oppaayye Taawwiti putayma daashe.

Maxxada saarra Taawwiti

¹⁵ Taawwiti ka Isira'eeli piisa qara nuqusume ka samayta piisa'e, mura dukaata qaatishe.

¹⁶ Iyyo'aapi inna Suuriyya saara xela oranna, Iyyosaafiti inna Ahiluutiiw taafampayta taarikeeta.

¹⁷ Satooqi inna Ahituupi isho Apemeleki inna Apiyataari qeesewwa, Seraya kan taafitta.

¹⁸ Pennaya inna Yoodaahe saara isasene nuqusa tooytinaati. Hellaa Taawwiti kan dehaamampaya.