Mataafa Saamu'eeli a lammatta 7 - Mataafa Qulqulloota

Akkima Waaqa Taawwiti kippeeta daashe

¹ Ete nuqusase tikaadi a mankisteeta kara kallaanno ka olkela oorsadeeyye, Waaqa ka nyaapaadi a isha kapandesa co piisa kela isha nessisheeyye;

² ixuumampaytase Naataani kide, “Tin anti tika qoyra kokkokan qupamte karan kala. Taapota Waaqa xoori, shaakka kela kitta.”

³ Naataani ka nuqusaseti kide, “Waaqa ke olli caay, aane ka wa karittaayti kara ca piisa kode.”

⁴ Halkeesse oppaayyeew, nessa Waaqa ka Naataani kapopa de'e ka kiini,

⁵ “Aane ka orxaytiyyo Taawwiti kide, ‘Waaqa ikiini, hela ke tika an kara kallaado ana qupa?

⁶ Kuyyaata an samayta Isira'eeli Kipsi kara sooksheeyye paayyatte haka awweti'i, tukkana kara'en kallaade ka pora kotaane diisheey, anti tika kara an kallaanne.

⁷ Porra an oppopa samayta Isira'eeli olli kotaane piisa oppaayye akka samaytiyyo a Isira'eeli sikshane'e, saarraasso an ajaje oppaayye, hela in apari takka kide, ‘Maana'e qoyra kokkokan tika ana a qupnin?’

⁸ “Semmalla amma orxaytiyyo Taawwiti kide, Waaqa Poqlase a we piisa ettaninno ikiini, ‘Akka samaytiyyo a Isira'eeli qara mukissampayta koddito'e kahirra kammaayyen koommaytoppa ke qeede.

⁹ Ka porra oppa ante piisa oppa ke olli kinnaade; ka nyaapaayti piisa ke tura pire ka amma oori maxxaayti akkima maxxa a poqalladda piita qara kukutta mina kuttisha.

¹⁰ Akka poraaysho oppa kallaadane'e ka arepadesa pora in qaapnini ukkuttowwa ka a xatta mina ishootta in rakkacciisnini'i, samaytiyyo a Isira'eeliti poran daasha ka oppa ishootta kutiisha.

¹¹ Umma hakan samaytiyyo a Isira'eeli qara saarra shuume paayyatte akkima ishootta qara koddite mina in koddito; anti nyaapaayti piisa kelan ke nessisha; semaliiyyiiw, anti Waaqa akkiman ke tika qupo ana ke lelli.

¹² Oto arreetaayti piito akka aakkadaassin kapopa antooyye, sanynyeetaayti a kupeettaaytippa sookten pakkaaytippa xaashaaw ka mankisteetaadi kokkonnaysha.

¹³ Isha ka maxxiyyo tika qupa; anti ka haka paraparati mankisteetaadi kokkonnaysha.

¹⁴ Anti aappaaysho'en kodda, isha ka innaayyo kodda. Oton ishinni dapaayye, akka aappa innaadi shooraan qiino mina'en isha qida ka akka nama innaadi qattaano mina isha qatta'a.

¹⁵ Umma Saa'oolise an ke turan alle mayshe qaraayye akkiman diissatiyyo a parapara teyyade mina'e, isha qara diissatiyyo a parapara an teyyado.

¹⁶ Toolaayti isho mankisteetaayti fuuliyyo tura'e haka paraparati japaadan. Suufaanetaayti ka haka paraparati kokkonnatta.’”

¹⁷ Nataani ka akka lelooseti ka a akkeetoseti piisa qara'e Taawwiti haasawade.

Akkima Taawwiti qinseeta a kalata qinsade

¹⁸ Taawwiti ka kulle ka fuula Waaqa tura kute'e ka kide, “Oo Poqlo Waaqqo! Ke piisa qara qapo ata anti an ayno? Tooliyyo kan opa ayno? Akka aren ana kayte.

¹⁹ Oo Waaqqo ke a pisa qara qapo! Aren sede ke turaayye wa shakka akka qoota tooliyyo a orxaytaayti a itturopatidesa haasawatte. Oo Waaqqo! Ke a piisa qara qapo, hela orra piisa'e asse kooni?

²⁰ Oo Waaqqo! Ke a piisa qara qapo ana orxaytaayti i'uptaay, ana Taawwiti semina maanan kida?

²¹ Kippeetaayti a daasse malla, akka heenna karittaayti qara'e wossen asse kutta koote ka akkan anti orxaytaayti upnaado koote.

²² Oo Waaqqo! Ke a piisa qara qapo, semmalla atti ikkutti umma a ke paho in co. Umma akkan napahtan dakayne qara'e, Waaqa pila ke mali in co.

²³ Orra samayta Isira'eeli paho, a Waaqa akka samaytaadi koddo'e ishootta furatta aane ka issi maxxa kodatta malla ishootta turaayye mankistewwa isho killannaasso alle daane ka wa kukutta ka orra qawwanna ishootta kodeetan Kipsi kara ishootta furade, a samaytaayti a Isira'eeli paho hela icaawwe?

²⁴ Samaytose xaayti a Isira'eeli, akka haka paraparati samaytaayti koddo'e issi qaatisse. Ka oo Waaqqo atti Waaqaaysho koddite.

²⁵ Semmalla, amma Poqlo Waaqqo! Qoota ana a orxaytaaytiti desa ka qoota tooliyyoti desa kippeeta a haasawatte haka paraparati dikkishe ka akka haasawatte qara kode.

²⁶ Maxxaayti ka haka paraparati ulfeessama. Orra ka kido, “Waaqa Poqalla isase we piisa ettaninno, ha Waaqa Isira'eeli.” Fuulaayti tura'e, tikiyyo a orxaytaayti a Taawwiti ka haka paraparati japaatto.

²⁷ Oo Waaqa Poqalla ke a we piisa ettaninno, ke a Waaqa Isira'eeli kodde, ke ana orxaytaayti sede akkishe ka kide, “Tikan ke qupa.” Semmallan anti orxaytaayti qinseetose ke tura qinsatta maxanyume.

²⁸ Oo Waaqqo ke a we piisa qara qapo, atti a Waaqa! Qaaletaayti nefo dukaata; atti ka akkima ana orxaytaayti wa asse paxaara kooto'e, kippeeta daasse.

²⁹ Semmalla tikiyyo a orxaytaayti akka haka paraparati ke tura kallaatto'e, ishi sake. Oo Poqlo Waaqqo! ke pisa qara qapo ke haasawadeey, tikiyyo a orxaytaayti sakaaytin haka paraparati'i sakamta.