Mataafa Saamu'eeli a lammatta 6 - Mataafa Qulqulloota

Akkima taapota Waaqa Yursaalamipa kalte

¹ Taawwiti ka orra Isira'eeli oppaayye reexame diira nama kuma kunda sessa a lammattati ollopa xaasheew.

² Taawwiti isho xelase xaadi isha quda co piisa ka xa'e ka taapotase a Waaqa maxxa Waaqa Poqalla a we piisa ettaninno, a isase kirupeelewwa qara kutiinon halaamte, qeeda'e, katamasene a Yihuta Pa'ali kidamma opa aanen.

³ Ka taapotase a Waaqa tikase kunkunnaata qara kitto a Apinataapiiyyi qeeden ka sarakella haaraya qara fee'en. Hellaa Apinataapi Uusa isho Ahiyyo ka sarakeellasene qulli.

⁴ Ahiyyo ka taapotase tura qatte ka anni.

⁵ Taawwiti isho samayta Isira'eeli piisa ka masmuureta ka kehayta ka maasinqoota ka timpa ka siplalla sokojkojna isho tawnanna dawanni ka fuula Waaqa tura isi piisan kirpini.

⁶ Ete awta Naakoori oppa kayeneeyye, qoota xormada kehaden malla, Uusa harkanne desa kide ka taapotase a Waaqa quda qape.

⁷ Waaqa ka fuura dapetaadi malla a kuttati isha qara miirode ka eeppa'ew isha ishshe. Ikka taapota Waaqa tura eeppa'ew to'e.

⁸ Qoota Waaqa Uusa qatta'e malla, taawwiti ka miiroode; haka awweti'i porose ka “Qatta'amitta Uusa” kidammi.

⁹ Awwsetiiyyi Taawwiti ka Waaqa fuure ka kide, “Taapota Waaqa atta anopa deeta?”

¹⁰ Seminan Taawwiti taapota Waaqa qeedeeta ka katamaadipan kaleeta in faane. Se kapaayye tika a Keettittase a Opeeti'etoomipanne kale.

¹¹ Taapota Waaqa ka tikase a Opeeti'etoomi a Keettittati leya sessa pirte, Waaqa ka Opeeti'etoomi isho toolaadi piisa sake.

¹² Ikka Taawwiti lelen ka kidene, “Ha taapotaadi minan Waaqa toola Opeeti'etoomi isho wa qapane piisa'e sake.” Taawwiti ka oori aane ka tika Opeeti'etoomiiyyi taapotase a Waaqa qeede ka katamaadipa xasan kalshe.

¹³ Oto orrase taapota Waaqa haano lehin laabbo piisa kapa'e, Taawwiti xorma takka ka mirkoota a meerte takka kalisoota qalli.

¹⁴ Taawwiti ka saappata a qaaha a qeesewwa surraappandesa saappade ka fuula Waaqa tura'e, issi piisan kirpini.

¹⁵ Taawwiti isho samayta Isira'eeli piisa ka uuyata isho kaasa daweetan taapotase a Waaqa qeeden.

¹⁶ Ete taapotase a Waaqa katama Taawwiti opa kullinittooyye, enenta Saa'ooli Melkooli maskooteta karanne tooyyatte ka nuqusase Taawwiti a fuula Waaqa tura shoshshorro ka kirpino akkite ka iskaranxata isha puyatte.

¹⁷ Ikka taapotase a Waaqatin kalen ka tukkanase a Taawwiti ishi daape kela poraadippa xaayen. Taawwiti ka fuula Waaqa tura kalisoota kupannitto isho a takkumta dehayshe.

¹⁸ Taawwiti ete kalisootase kupannitto isho a takkumta dehayshe ka dikkisheeyye, maxxa Waaqa Poqalla a we piisa ettaninnonne samayta sake.

¹⁹ Ka lekna Isira'eeli piisa'e, diira ka iskattan matta nama piisa mina'e laaqqota shakkayteeta ka so'a lamaya ka qoomayta wayneeta qoote. Nama piisa ka tikaadipa kale.

²⁰ Taawwiti ka toolaadi saka'e, tikopa kale. enenta Saa'ooli Melkooli ka isha mina mina'anayta ante ka ishi kiite, “Oo awwe nuqusa Isira'eeli atta issi ulfeesse! Ka akkima almaleeta iskammeela uwwa qaqqapnitto mina'e ka tuparra saarraadi kela shettewwa kodde turandesa iskammeela uwwa qaqqape!”

²¹ Taawwiti ka Melkooli kide, “Waaqase aappaayshin isho toolaadi piisa qaran jaalshe ka ana reexade ka samaytase xaadi a Isira'eeli qara saara ana kode tura'en asse kirpe ka amma nefo kirpa.

²² Ka a sede qaran qapto issi jeersha ka fuulaayti tura puyatama. Ma shettewwosen a tuparra a lellitta tura'e, in ulfeessama.”

²³ Sede minan enenta Saa'ooli Melkooli haka toonitto kara'e inna in xaayne.