Mataafa Saamu'eeli a lammatta 5 - Mataafa Qulqulloota

Akkima Taawwiti nuqusa a Isira'eeli ka a Yihuta kodde

¹ Kammadesa kaffa Isira'eeli piisa ka Keprooni karopa Taawwiti kapopa aanen ka ishi kidene, “Ha ino ke olliiyyi an diika takka.

² Xatta a Saa'ooli ino qara nuqusa koddeeyye, a Isira'eelin tuullo ka ishin kallo ke. Waaqa ka ke kide, ‘Samayta a Isira'eeli qara'e sikmayta ka saara koddita.’”

³ Qimaya Isira'eeli piisa ka Keprooni karopa Taawwiti kapopa aanen. Taawwiti ka Keprooni kara'e, fuula Waaqa tura ishootta olli kodayteeta kodade; ishootta ka isha daaten ka Isira'eeli qara isha nuqusumshen.

⁴ Taawit a nuqusummooyye, paraadi kunda sessa. Ikka para kunda afuri nuqusume.

⁵ Isha Keprooni'i kuti'e ka Yihuta qara para tappa ka leya leh nuqusume ka Yursaalami kuti'eew ka Yihuta isho Isira'eeleta piisa qara para kunda sessa sessa nuqusume.

Akkima Taawwiti Yursaalami pute

⁶ Nuqusase isho xelaadi a oranna ka Iyyapuusata a eeyye kalto torpa'e katama Yursaalami opa tuulen. Iyyapuusata ka dikatte ka kite, “Taawwiti are karopa kulleeta in ettansho!” Ka oori Taawwiti kiite, “Joolamma isho totoonnaya kuli ke ikkisadaay, arepa a kullito.

⁷ A koddito ma, Taawwiti kawwatta Siyyooni qara pire. Isheetta ka “Katama Taawwiti” kidamte.

⁸ Kuyyaasetiiyyi Taawwiti ka kide, “Nama Iyyapuusata torpino, joolamma isho totoonnayasene nyaapa Taawwiti kodde torpa'e a pisha karan tarpo ka katama karopa fayyaado.” Semmalla deymatteeta kiini, “Joolamma isho totoonnaya tika mankisteeta opa in kullan.”

⁹ Taawwiti ka kawwattase a Siyyooni kara kallaade ka isheetta kide, “Katama Taawwiti.” Ka piitase teettamte desa paayye ka katamasene kapa kawaattan qorre.

¹⁰ Qoota Waaqa Poqalla ise we piisa ettaninno isha olli co malla, Taawwiti ka kokkonnaattaan aane.

¹¹ Kiraami nuqusase a Tiroosi ka Taawwiti kapopa orra erke ka qora talta isho harmoota a qora ka a kawwatta erkeew, ishootta ka Taawwiti tika mankisteeta qupen.

¹² Taawwiti ka akkima Waaqa Isira'eeli qara nuqusumaadi kokkonnayshe ka samaytaadi a Isira'eeli malla mankisteetaadi poorshe upnaade.

¹³ Taawwiti ka a Keprooni kale kammaayye, Yursaalami kara lammowwa lekaya padaawade ka hellaa a diira isho a tuparra lekaya xaayade.

¹⁴ Hellaadi a Yursaalami kara dalade maxxadaasso Shamu'a ka Shopaapi ka Nataani ka Selemooni

¹⁵ ka Yipihaari ka Elshu'a ka Nefeki ka Yafi'a

¹⁶ ka Elshama'i ka Eeli'adaa'i isho Elfileta.

Akkima Taawit Filisteemeta pute

¹⁷ Akkima Taawwiti Isira'eeli qara nuqusuma daatame Filisteemeta ete dakayteeyye, xelaaysho a oranna piisanne Taawwiti fada sookte. Ma xoori, Taawwiti sede dakaye ka kawwatta mishshikeeta karopa aane.

¹⁸ Filisteemeta ka deete ka naabase a Rafaaymi kara paste ka pora qapatte.

¹⁹ Taawwiti ka Waaqa kaassade ka kide, “Hela Filisteemeta torpa'e in tuula? Hela atti akkan ishootta puto'e ikkoota?” Waaqa ka Taawwiti kide, “Anti dukaatannen akka ishootta puto kodaay tuule.”

²⁰ Taawwiti ka Pa'alferasimipa tuule ka eeyye Filisteemeta pute ka kide, “Waaqa akkima malxa mina nyaapiyyoppanne fullaase. Seminan maxxa porooseti ka “Poqalla fullahasinno.” Kidame ka halaame.

²¹ Filisteemeta ka eeyye killowwaasso diisse ka kapa qahate. Taawwiti isho xelaadi a oranna ka killowwasene haadaden.

²² Filisteemeta ka amma oorteew ka naabase a Rafaaymi kara paste ka pora qapateew.

²³ Taawwiti ka Waaqa kaassadeew. Waaqa ka ishi kide, “Fuule desa ishootta'en aanan ma, tultan ishootta oore ka qora leya tulte desa ishootta torpe.

²⁴ Ka oto qorasene a leya qarandesa nessa kamanta dakaynittooyye, xela Filisteemeta puta'e, Waaqa oori iketuropa qatteey, atti jarjartan fuulandesa torpe.

²⁵ Taawwiti ka akka Waaqa ishi kide qara kode. Ka Kepa'ooni paayyatte haka Keseriti'i Filisteemeta daane ka pute.