Mataafa Saamu'eeli a lammatta 4 - Mataafa Qulqulloota

Akkima Iyyapuste ishshen

¹ Innasene a Saaooli Iyyapuste, ete akkima Apeneeri Keprooni kara to'e dakayeyye, xasa mure, Isira'eeleta piisa ka tammaqte.

² Inna Saa'ooli Iyyapuste sitiiyyi, saarra lakki a kita xela oranna qara saarumma'e qapa. Maxxa takkati Pe'anna, a takkati kan Rekaapi. Ishootta hellaa Arimooni a Piiniyaamittase a katama Perooti. Maana malla, Perooti sitiiyyi haminta Piiniyaami opa'ew dikammiy.

³ Perooteta ka katama Kitaaymi opa qahate ka haka awweti'i eeyye kalayta koddite.

⁴ Inna Saa'ooli Yoonataani inna takkan loqqaan toonnaawe Mefepoosheti kidamma'e qapa. Qoota toota Saa'ooli isho a Yoonataani desa ete katama Iyyisira'eliti otoota deeteeyye, innoosen sitiiyyi para keni piren. Ampattootaaysho ka ishootta qeette ka ishin qahani. Ete jarjartan ishin qahanittooyye ikka pi'en ka toonnaawen.

⁵ Takkaayye, hellaa Riimi a Peerotitta Rekaapi isho Pe'anna ka xa'en ka ayaasoppaayye tika Iyyapuste kayen. Isha sitiiyyi olli qootta kuyyaata oppa nessuma qara ca.

⁶ Iskatteetase xarra tooytinitto ka kappa xayyinni. Oppan himoolta ka isheetta qeette. Ikka mukte; Rekaapi isho Pe'aanna ka alleeta kelopa muren.

⁷ Ka ete alleeta kelopa kulleneeyye, Iyyapuste a kaataadi kara loshshaadi qara muke doddoten ka ishshen ka qara matta muren ka mattase qeeden ka halkeetta kumma pora naaba Arapatin anni rafen.

⁸ Ka matta Iyyapuste Keprooni karaayye Taawwiti kapopan aanen ka nuqusa kidene, “Tin matta Iyyapuste a inna Saa'ooli a nyaapase xaayti ke ikassa faanooti! Waaqa awwe ke poqallaanno nuqusa malla, Saa'ooli isho sanynyeetaadi qara haalota pooyye.

⁹ Taawwiti ka hellaa Remooni a Peerotitta Rekaapi isho innaasso Pe'aanna kide, “Waaqa caattampaytase rakkowwa piisa kela anan pahannonne xaxanni!

¹⁰ Nama takka katama Siqlaaki kara ete a otoota fayyaatin ana deeno ishi pahanaatte, ikka ana kiino tin Saa'ooli ito'eyye, in qape ka isha ishshe. Otootaadi kapa'e, ini ka loqshaadi koddite.

¹¹ Ka kuli ete ukkuttowwa hanqeellayta nama a tikaadi karaayye loshshaadi qara muke ishsheneeyye, desa atta kitto'en qara haalota pooyyaaw? Amma harkaayshin oppa an diikaadi an fado? Ka piita qara ishin an pashsho?”

¹² Taawwiti ka orraaadi ajaje, ikka ishootta leyshen ka harka ka loqqa tupa quuren ka Keprooniiyyi haarta kapa'e, moonte xata raken ka matta Iyyapuste qeeden ka Keprooni karaayye hawla Apeneeri kara hawlen.