Mataafa Saamu'eeli a lammatta 3 - Mataafa Qulqulloota

¹ Toola Saa'ooli isho toola Taawwiti eta lekaya oli torpen; ma xoori, Taawwiti kokkonnaattaane aane, tika a Saa'ooli ka nukkullaattaan ante.

Hellaa Taawwiti dalade

² Keprooni kara'e, Taawwiti ka hellaa xaayade. Innaadi a kuuta Amnooni, a IyyIsira'eelitteetase Ahinoomi xaayte.

³ Innaadi lammatta Kili'aapi, a iskatteetase a katama Qermeloosi a Naapaali qara to'e xaayte. Innaadi a sessatta Apiseloomi, a Maa'ikka enetase a Talmaayi a nuqusa Keshuuri xaayte.

⁴ Innaadi a afratta Atooniya a Hakitti xaayte, Innaadi a kenatta Sefatiya a Apitaali xaayte.

⁵ Innaadi a lehatta Yuturaami a iskatteetase a xaadi Ekla xaayte. Sene piisa hellaa Taawwiti a Keproni dalade.

Akka Apeneeri Taawwiti quda kodde.

⁶ Ete toola Saa'ooli isho a Taawwiti olitorpinooyye, a xela Saa'ooli quda kodde oppaayye Apeneeri kokkonnaattaane aane.

⁷ Saa'ooli enenta aayya takka Risfa kidammitto lammitteeta qapa. Iyyapuste ka Apeneeri kide, “Maana'e lammitteeta aappinno olli mukte? Apeneeri ka haasoosen a Iyyapuste ishi kide qara harmo miiroode ka ishi kide,

⁸ “Haka awweti sanynyeeta aappaayshina a Saa'ooli isho hellaasso ka daltayaadi tura in amaname umma harka Taawwiti oppa an ke an kanne. Atti xoori, iskatteese malla ana qootinni. Hela oori an kuta ka Yihuta akkaattummi?

^9-10 Waaqa akkima mankisteeta sanynyeeta Saa'ooli qara qeedo ka katama Taaniti paayyatte haka a Persaapeti Isira'eeli isho Yihuta piisa qara sufaaneta Taawwiti qaatisho, kippeetase a xaxaan Taawwiti kale oton ana fulaanne an kayniniiyyi, a Waaqa a neeqa ana qara kodo ka qaran jaalsho.”

¹¹ Iyyapuste qoota Apineeri fuure malla, we takkan isha mina oorissa in ettaninne.

¹² Apeneeri ka Taawwitise Keprooniiyyi co qaropa orra erke ka ishi kide, “Ata piisse piita ayno? Kodayteeta ana olli kodado akka Isira'eeli piisa ke kelopa oorto'e in ke qaarqaaray.”

¹³ Taawwiti ka ishi kide, “Ipaxaari! Kodayteeta in ke olli kodada ma, we takkanen paayyota ke qara faani. Wossen nefo, oto ana kapopa deenittooyye Melkooli enenta Saa'oolin ana xooye, ataakkiti ana akka a ettanissooy.

¹⁴ Taawwiti ka Iyyapuste inna Saa'ooli qaropa orra erkeew ka kide, “Haantotase xayyo an isheetta qapatta malla diira Filisteemi nama dippa kela dawra quure ka kamma daashe, ana daashe.

¹⁵ Iyyapuste ka orra erke ka diirtaadi Polteeli inna Laawishi kelaayye Melkooli qeede.

¹⁶ Ma xoori, diirtaadi isheetta kamma pooyni ka haka katama Pahurmiti'i isheetta kamma de'e. Apeneeri ka ishi kide, “Tikaaytipa alle tiitaawe.” Ikka tiitaawe.

¹⁷ Apeneeri ka qimoota Isira'eeli olli oorsade ka kide, “Se turanne akka Taawwiti ishin qara nuqusumo faanittaneey,

¹⁸ amma oori koda qara nakayshanka! Maana malla, Waaqa Taawwiti'i kippeeta daashe ka kide, ‘Harka Filisteemi isho a nyaapaaysho piisa kela, anti orxaytiyyo Taawwiti qudannen samaytiyyo a Isira'eelitin paha.’”

¹⁹ Apineeri ka Piiniyaameta olli asseew torraadeew ka wa a Isira'eeleta isho samayta Piiniyaami koda dikade piisa Taawwiti lela'e Keproonipa aane.

²⁰ Apeneeri ka diira nama kunda lakki ollin isquda qeede ka Keproonipa Taawwiti kapopa aane. Taawwiti ka Apeneeri isho orrase isha quda co'e, sankulta kode.

²¹ Apeneeri ka Taawwiti kide, “Akka ke olli kodayteeta kodadane atti ka orra karittaayti xajeele piisa qara nuqusumto'e, ana aano ka ke poqallaayyo nuqusa turopa Isira'eeleta piisa xaasho.” Taawwiti ka Apeneeri isqara xaashe ikka nakaytan tawe.

Akkima Apeneeri to'e

²² Eennow sitiiyyi, xela a Taawwiti a oranna Iyyo'aapi olliiyyi tuule kela kale ka poojeta kuttayteetan kale. Ma xoori sitiiyyi, Apeneeri Taawwiti olliiyyi Keprooni kara in co. Maana malla, Taawwiti i'isqara isha xaashe ikka nakaytan kaleey.

²³ Ete Iyyo'aapi isho xelase a oranna isha quda co kaleeyye, akkima Apeneeri inna Neeri nuqusa kapopa de'e, nuqusa ka kalta isha xaashe ikka nakaytan kale Iyyo'aapi lelen.

²⁴ Iyyo'aapi ka nuqusa kapopa aane ka ishi kide, “Ete Apeneeri ke kapopa de'eyye, maana'e kalta isha xa'isse ikka nakaytan kale?

²⁵ Apeneeri inna Neeri i''upta; isha ke sassapatta'e ka akka annitto ka oorritto ka wa koonitta piisa lettissa'e de'e.

²⁶ Iyyo'aapi ete Taawwiti kapa sookeeyye, Apeneeri kamma'e orra erke. Ishootta ka qaawwa piisha a Siisaarra kapa isha qeeden ka ishin ooren. Umma Taawwiti sede in upnaanne.

²⁷ Ete Apeneeri Keproonipa tiitaweeyye, Iyyo'aapi a xawwi desa isha haasaawsiiso pahanaade ka xarra turopa ishin aane ka haalota a innaassoti a Asaheeli isha qara pooyya'e, karittopa isha dote ikka to'e.

²⁸ Sekkammaayye Taawwiti ete sede dakayeeyye ikide, “Fuula Waaqa tura'e ana isho mankisteetiyyo haka paraparati'i diika Apeneeri a inna Neeri oppa an qapno.

²⁹ Diikaadi, a Iyyo'aapi isho sanynyeetaaysho piisa taqqeelo, ishoottoppa a dawraadi malinaan taaki qoosholayta taaki toonnayta taaki a xalittan anno taaki a orannaappa toono taaki a wa damta dape in dapannin.

³⁰ Qoota Apeneeri Keprooni kara orannaappa innaasso Asaheeli ishshe malla, Iyyo'aapi isho innaasso Apisa ka kapa Apeneeri ishsheneew.

³¹ Taawwiti ka Iyyo'aapi isho orrase isha quda co piisa kide, “Mehaddaassin isquda kakkaa'a ka mehadda dapteeta kalsada ka Apeneeri pooya. Nuqusase Taawwiti ka mattaadi pukka Apeneeri kamma qate ka olli aane.

³² Ka Keprooni kara Apeneeri hawlen. Nuqusa ka nessaadi kuttishe ka hawla qara Apeneeri pooye, samayta piisa ka asseew pooye.

³³ Nuqusa ka Apeneeri pooye ka kide, “Hela Apeneeri a eepa mina'e asse to'a?

³⁴ Harkaatti in hidamme umma loqqaatti in korpammeey takka ukkuttowwa tura pi'e mina'e atta asse pi'ite?” Samayta piisa ka oppa oore ka pooyeew.

³⁵ Sekkammaayye, samayta piisa ka akka Taawwiti damta damo'e, kuyyaata kumma isha naappanni nakaye, Taawwiti xoori ixaxade ka kide, “Haka letta dumto maliiyyi oton ana unta taaki wa pila immadaayye a Waaqa ana qatta'o ka qaran jaalsho.”

³⁶ Samayta piisa ka sede akke ka ishin xasoode. Wa nuqusa kode piisa ka samayta piisa xasayshen.

³⁷ Awsetiiyyi, samayta Taawwiti quda co isho Isira'eeleta piisa ka akkima harka nuqusa Apeneeri inna Neeri ikassaappa in kinnin upnaade.

³⁸ Nuqusa ka kodampayaadi kide, “Hela akkima nama kutta a saara kodde Isira'eeli kara to'e a uptane?”

³⁹ Anti kadin punu nuqusa a daatame koddeeyye, awwe helloosen a Suuriyya a kuttati ana qara kokkonnaaden anka ishootta ukkumeeta malaale, a Waaqa nama neequmta koono qara'e akka neequmtaadi mina kodo.