Mataafa Saamu'eeli a lammatta 24 - Mataafa Qulqulloota

Akkima Taawwiti samayta dike

¹ Waaqa ka a kuttati Isira'eeli qara miiroodeew ka Taawwiti ishootta qara xaashe ka kide, “Aane ka samayta Isira'eeli isho a Yihuta dike.”

² Nuqusa ka Iyyo'aapi isho ajajampayasene a xela oranna isha olli caati kide, “Taani paayyatte haka Persaapeti'i, kaffa Isira'eeli piisa oppopa aana ka meeqa akkima kaynaan akkan upnaado'e, xela oranna ollopa dika.”

³ Iyyo'aapi xoori inuqusa kide, “A Waaqa Poqallaatti xelaayti a oranna qara harka dippa padaawo. Ildaatti a poqallaayyo a nuqusa ka sede akken. Ma poqallaayyo nuquso maana'e sede kodeeta faate?”

⁴ Ma xoori ajaja nuqusa'e afa Iyyo'aapi isho ajajampaya xela oranna qaropa caade. Iyyo'aapi isho ajajampayasene a xela oranna ka fuula nuqusa tura sooken ka xela torpampaya Isira'eeli dika aanen.

⁵ Ka Yurtaanoosi tuullen ka katamasene naaba kara ca, a Aro'eeritiiyyi qinda tupattatin safaren. Ka eeyye desa Kaatippopa tarpen ka katama Ya'iseeri opa aanen.

⁶ Ka eeyye desa Kele'aadipa aanen. Ka piitase haminta Hittaata kara kitto katamasene a Qaadesi opa aanen ka Taani kayen ka katama Taani desa katama Sidoona opa de'en.

⁷ Ka mishshikeeta kawwatta katama a Tiroosi kayen ka katamadda Hiiwwaata isho a Keni'aaneta oppa kayen ka tupatta Yihutaatiiyyi katama Persaapehi opa aanen.

⁸ Ka ete piitase piisa oppa aanen kammaayye, leya sakal ka kuyyaata kunda lakki kamma Yursaalamipa ooren.

⁹ Iyyo'aapi ka xela oranna piisa meeqa akkima kaynaan nuqusa upnayshe. Diira kokokkoka a oranna torpeeta ettaninna Isira'eeli karaayye nama kuma dippa sette ka Yihuta karaayye nama kuma dippa keni kayen.

¹⁰ A koddito ma, Taawwiti ete xela oranna dike kammaayye, karanxata ishi dakaatte ikka Waaqa kide, “Waan kodeetinni a kuttati'in juppoota kode. Ma amma Waaqqo, in ke qinsanniiy ishindapaytiyyo a orxaytaayti alle pashshe, a kuttati'in eepuma kodeey.”

¹¹ A Taawwiti teykanteeyye in xaanin turanne, nessa Waaqa ka akkampaytase a Taawwiti xuumampaytase Kaadi kapopa de'e ka kiini,

¹² “Aane ka Taawwiti kide, ‘Waaqa ikiini, we sessan ke dehanniiy, akkan ke qara kodo'e oppa takka reexado.’”

¹³ Kaati ka Taawwiti kapopa aane ka ishi lele ka kide, “Hela loota para sessa'e piitaaytippa de'am, moon nyaapaayti pora ke daana akka leya sessa turaayye pora qaahata, moon piitaaytippa'e kuyaata sessa paaqa neeqa de'a; semmalla isase ana erke'e maana akkiman oorsho, oppa dikado ka takka reexado.”

¹⁴ Taawwiti ka Kaati kide, “Akatan oppa rakkade, diissata Waaqa ikuttiiy, harkaadi oppa'ewwen pi'ia, ma ana harka nama oppa'ew pi'a diisho.”

¹⁵ Waaqa ka oori teykanseti paayyatte haka xoorasene qapame kaynitto kara'e, Isira'eeli qara'e, paaqa neeqa qeede. Taani paayyatte haka Persaapeti'i, nama kuma kunda tappa ka pirame.

¹⁶ Ete erkampattoota Waaqa Yursaalami patissa'e harkaadi derasseeyye, Waaqa ka neequmtose malla maraarfade ka erkampattoose orra pirritto kide, “Ikodditeey, harkaayti oorsado.” Sitiiyyi erkampattootase a Waaqa awta Orna a Iyyapuusitta kapa'e qa'atte.

¹⁷ Taawwiti ete erkampattootase orra pirritto akkeeyye, iWaaqa haasawade ka kide, “Tin are ana mattiyyo juppoota ka neequmta kode ma, kaharroosen maana koden? In ke qinsanniiy rakkoose a ana ka tooliyyo qara kayto.

Akkima Taawwiti pora kalisoota Waaqa dawe

¹⁸ Kuyyaasetiiyyi Kaati ka Taawwiti kapopa de'e ka ishi kide, “Opeela fayyado ka awta Orna a Iyyapuusitta oppa'e, Waaqa'e, pora kalisoota dawe.”

¹⁹ Taawwiti ka akka Waaqa ajaje, Kaati ka ishi lele qara'e, opeela fayyade.

²⁰ Ete Orna kumpaappe tooyyadeeyye, Taawwiti isho saarraadi a isha kapopa deena'e akke ka xata aane ka fuula piitan kaye ka nuqusa'e, kaareeta oorshe.

²¹ Ka kide, “Poqallaayyo nuquso! Maana'e ana orxaytaayti kapopa deete? Taawwiti ka sihi kide, “Akka paaqose neeqa samayta qara xa'o'e, awtaatti piddatta'e ka oppa pora kalisoota Waaqa dawa'en de'e.”

²² Orna ka Taawwiti kide, “Poqallaayyo nuquso! Teyyado ka wa ildaatti tura paxaara oppa kalisoota dehayshe. Kalisootase kupannitto'e xormada tin are caan. Ishin kupa'ew, qora untan tummaane isho qamparra are caan.

²³ Nuquso! Anti Orna sene piisa ke'en daanni” Ka nuqusa kideewwe, “A Waaqa Poqallaatti kalisoose ke qara teyyado.”

²⁴ Nuqusa xoori iOrna kide, “Inna! In koddito; kaajaannen ke qara piddada. Kalisoota kupannitto an kamma we an daannin, Waaqa'e an dehaysho.” Taawwiti ka awtasene isho xormadasene dakara pirreeta a killoota quda paka kayen pidde.

²⁵ Ka eeyye pora kalisoota Waaqa dawe ka kalisowwasene kupanna isho a takkumta dehayshe. Waaqa ka qinseeta qoota piitoseti desa dehaannitto dakaye, paaqase neeqa ka Isira'eeli qara xa'e.