Mataafa Saamu'eeli a lammatta 23 - Mataafa Qulqulloota

Haasa Taawwiti a piraampira

¹ Afa Taawwiti a piraampira sene. Isase a Waaqa opeela kukuttishe, Waaqa Yayqoopi ka isha reexade, saarissampaytase a Isira'eeli jaalatame, innasene a Isseyi afa haasawade sene.

² “Hapura Waaqa anoppanne haasawade, qaaletaadi ka arrapiyyo qara kitta.

³ Waaqa Isira'eeli ihaasawade xelsuma Isira'eeli ka asse ana kide, ‘A hanqeetan samayta mukinno ka Waaqa fuureetan samayta kallaaccisno

⁴ isha akka para mina'e ishootta qinni ka akka letta mina ishootta piirri ka akka jaama roopa kamma deene mina ishootta japarinni.’

⁵ Dukaatan sanynyeetiyyo olliiyyi Waaqa asseewwen qa'anne? Maana malla, isha we piisa harmishe ka tooyeey, ka ana olliiyyi kodayteeta para para kodadeey; semmalla oori, isha anan qaarqaaro? Ka xajeeltiyyo piisa porannen teyo?

⁶ Ukkuttowwa xoori, akka qeeyyasene harkan qappatammi in kinnini mina'e alle kataman

⁷ orra qeeyya quda kayno xoori qonjora isho tossola qapanni, ikka pora takka'e apittan kupanni.”

Xormeeta Taawwiti a oranna a kurraaysho dakaanna

⁸ Sene maxxada a hupnampayasene a Taawwiti: Tahikimoonittase Yushepipaashepeeti hupnampayasene sessa qaraayye jaalli; isha oranaadi teyyade ka orannaappa nama dippa sette pora takka leyshe.

⁹ Hupnampayasene sessa oppaayye a isha kamma qannoow, Ali'asaari inna Dooddo, a Ahohitta. Hupnampayasene sessa Taawwiti olli ca oppa isha takka; isha isho Taawwiti a Filisteemeta eeyyepa oranna tuulte qara jeejjannaaneeyye, xela Isira'eeli ka iskammopa oore,

¹⁰ isha xoori poraadippa in mayne ma haka harkaadi isha tupa qishshaamoonno ka koraateta quda jaqqallooti'i Filisteemeta leyyshe. Awse kuyyaaseti Waaqa ka putayma kutta daashe. Xelase a Isira'eeli isha kamma alle oore ka a le'e quda mehadda furatta patta'ew tiitaawe.

¹¹ A isha kamma qannoow Shaama inna Aake a Haraaritta, Filisteemeta ka Lehi karaayye dula takka Missiraan immakaade oppopa ollopa xoorte. Xela Isira'eeli ka Filisteemeta tura qaheew.

¹² Shaama xoori dulaseti otantoppa'e qa'ade ka a poraadi qara in maynin mali Filisteemeta leyshe. Waaqa ka putayma kutta daashe.

¹³ Eta fera oppaayye, a xela Filisteemeta a Oranna naabba Rafaayimi kara safareeyye, hupnampayasene kunda sessa oppaayye sessa ka, rahanasene a Adulaami a Taawwiti karaayye ca opa de'en.

¹⁴ Sitiiyyi Taawwiti mishshikeeta kara ca. Xela Filisteemeta ka Peetelehemi kara ca.

¹⁵ Taawwiti ka yaatanni ka kiini, “Katin nama qaawase a pisha xarra Peetelehemi oppa co kara pisha ikkayta ana muuddini ma!”

¹⁶ Sekkammaayye, hupnampayasene sessa ka xela Filisteemeta oppan tarpen ka qaawase a pisha xarra Peteleheemi oppa co kara pishasene muudden ka Taawwiti ishin de'en. Isha xoori in ikkine ma kalisoota Waaqati'i alle tuqe.

¹⁷ Ka kide, “Oton pishoosenen ikkaayye, akkan diika orroose isqara karitta kutade ka aane ikkino mina. Waaqqo! Sede kodeeta a alle ana kapa sekaatto.” Ka ikkeeta tiite. Hupnampayasene sessa tooy sede koden.

¹⁸ Inna opa Iyyo'aapi Apisaayi inna Suuriyya ka hupnampayasene kunda sessa qaraayye mattitta kodde. Ka nama dippa sessa qaropa oranaadi oorsade ka ishootta leyshe. Isha isasene sessa olliiyyiiw kurraadi ka dakaade.

¹⁹ Apisaayi hupnampayasene kunda sessa oppaayye kurraadi a kuttati dakaanni ka saaraysho kodde. Ma xoori pora a hupnampayasene sessa oppa in kayne.

²⁰ Pannayya inna Yihoyadaa'i a Qapsi'eelitta torpampayta kokkoka a koda kutta kode. Ka xormeeta a Mo'aapi a kokkoka lakki leyshe ka kuyyaata ishi apteenta roopteeyye xata lekkadeew ka qaawa kara karma ishsheew.

²¹ Ka se maliiyyiiw irreelayta takka a Kipsi ishsheew. Kipsittase orana harkoppa qapa. Pannayya xoori uleetanne isha qaropa aane ka harka Kipsitta oppaayye oranaadi tafe ka oranaadinniiw isha ishshe.

²² Inna Yihoyadaayi Pannayya tooy sene kode. A hupnampayasene sessa mina'e kurraadi ka dakaade.

²³ Isha hupnampayasene kunda sessa olli kurraadi idakaanni ma, pora hupnampayasene sessa oppa in kayne. Taawwiti ka foolisa isha tooytino qara isha shuume.

²⁴ Sene arepaxata dikame hupnampayasene kunda sessa oppaayye caan. Innaapa Iyyo'aapi Asaheeli ka Elihanaani inna Dooddo a Peetelehemitta

²⁵ ka Shaama Harootitta, ka Eeliqa Harootitta

²⁶ ka Helesi Filetitta, ka Irra inna Iqeeshi a Teqohitta

²⁷ ka Api'aseeri Anatootitta, ka Mepunaayi Huushitta

²⁸ ka Salmooni Ahoohitta, ka Mahiraayi Netoofitta

²⁹ ka Heleepi inna Pa'inna a Netoofitta, ka kafa Piiniyaami oppaayye Itaayi inna Ripaayi a katama Kipi'a

³⁰ ka Pannayya Piri'atoonitta, ka Hidaayi namase a naabba Kaashi

³¹ ka Api'alpooni Arapitta, ka Asmaweti Paarihuumitta

³² ka Eeliyahiipa Shaalpoonitta, ka hellaa Yasheeni, ka Yoonataani.

³³ ka Shaama Haraaditta, ka Ihi'aami inna Sharaari a Araaritta.

³⁴ Ka Eliifeeleti inna Ahasepaayi a Maka'itta, ka Eli'aami inna Akitofeeli a Kilotitta.

³⁵ Ka Hesiro Qermeloositta, ka Pa'iraayi Arapitta

³⁶ ka Yiki'aali inna Naataani Asoopitta, ka Paani Kaatitta

³⁷ ka Seleqi Amoonitta, ka Nahiraayi Pa'irotitta isase Iyyo'aapi inna Suuriyya kela kontaleeta haano.

³⁸ ka Iraana Yaatiritta ka Kaareepi Yaatiritta

³⁹ ka Ooriyooni Hittitta ishootta olloppa'e, kunda sessa tappa kayni.