Mataafa Saamu'eeli a lammatta 22 - Mataafa Qulqulloota

Masmuureta a putayma a Taawwiti Waaqa dawade

¹ Taawwiti ete Waaqa harka Saa'ooli isho nyaapaadi piisa kelaayye ishin paheeyye, saara masmuureseti'i Waaqa dawade,

² ka kide, “Waaqa shiliyyo ka mishshikeetiyyo ka a ana furanno.

³ Waaqiyyo shiliyyo an kela koorsanno ka kontaleetiyyo ka atti a hupna diniyyo ka a xelsumaayyo an kelopa qahano, ka a dinshampaytiyyo, atti hupna irreelaya kela anan pahani.

⁴ Anti Waaqase a kalata isha parpaacciisnon haleeni ka nyaapiyyo kela pahan.

⁵ Toota akka puppeeta a pisha qara mina ana kapa tiitayshe malxa pateetta ka ana qara pire.

⁶ Siibota toota ka ana kela kattamte, turuura toota ka ana tura' qa'adde,

⁷ eten rakkadeeyye anka Waaqa hale, ka kide, Waaqqo ana qaarqaare, ikka tikaadi a qulqulloota kelaxata nessiyyo dakaye; ullupittiyyo ka napahataadi dakaade.

⁸ Qoota isha miiroode malla piita ka xirarte ka xarte; kiriyya a irrowwa moontopa ca ka lellehen ka xerere'en.

⁹ Qayya miira ka soonaappa ishi sooke apitta orra xaalanno ka afaadippa opaye porooda ka ishoppa opaye.

¹⁰ Ikka moonta olkela kaa'e ka lekkade; oraarta poora ka loqqaadi kela kitta.

¹¹ Ka kirupeeli qara kuti'e, ka moontan xa'e ka xayxayta qara shiwwisame.

¹² Ka tukkanta isqaran deke. Ka oraarta poora a pisha qayte iskapan tiitayshe.

¹³ La'aytase fuulaadi tura co karaayye, porooda apitta ka opaye.

¹⁴ Waaqa ka moontexata xirare isase kutta ka nessaadi dakaytishe

¹⁵ ka lawaadi pokke ka olkela nyaapaadi pittinnayshe ka hankaade ka ishootta ririkkayshe.

¹⁶ Fukkeeta Waaqa malla ka nessaadi a miira a soonaappa ishi shore malla pakateeta kela piita kokte ka akkaatte; kiritta piita ka lakoppa akkaade.

¹⁷ Waaqa ka illi xata harkaadi derayshe ka ana qape ka pisha kutta kara ana tite.

¹⁸ Ka qoota a kuttati ana qaropa caan malla, nyaapiyyo a kokkoka ka isasene ana needda kela anan pahe.

¹⁹ Kuyyaata an rakkadeeyye ikka ana qara xa'en ma xoori Waaqa ana qaarqaarsa kodde.

²⁰ Ka pora palda oppopa ana sookshe ka qoota anan xasoode malla anan pahe.

²¹ Waaqa akka hanqeellumaayyo kapa'e ana loqshe ka harkaayyo a dapa in kooninni mina ana oorshe.

²² Maana malla saanta Waaqa in tooytaadeey, umma neequmtan Waaqiyyo kapa alle an tiitaawneey.

²³ Anti seerraadi piisa in tooyteey, umma taantetaadi kapa qindopa an kiineey.

²⁴ Anti fuulaadi tura qaja an qapnaanne; ka dapa kela isi tooyte.

²⁵ Semmalla Waaqa ka akka hanqeellumaayyo ka fuulaadi tura akka qulqullumaayyo mina ana daashe.

²⁶ Oo Waaqqo, a amanammaati'i, a amanammo koddini ka a qaja in qapniniti'i, a qaja in qapnini koddini ka isi akkinni

²⁷ Ka qulqullowwa'e, qulqullitta koddini ka quumarra'e, ookayta koddini ka isi akkinni.

²⁸ Atti a miiddameetinni pahani ildaatti xoori akka ishootta jeerisso'e a isi peepna'e akkini.

²⁹ Oo Waaqqo! Atti a la'aytiyyo ha Waaqa tukkantiyyo la'anni.

³⁰ Keenne, xela oranna'en torpa; ka waaqiyyonne, kawwatta qaran shora.

³¹ Waaqoose saantaadi qaja in qapto qaaleta Waaqa we pisanne a amanamte; a isha kela koorsanna piisa'e, isha kontaleeta.

³² Waaqinno mali aynon Waaqa? Waaqinno mali aynon shila xelsuma?

³³ A hupna ana daanno ka saantiyyo qajeelinno, Waaqoose isha.

³⁴ Loqqaayyo akka loqqa koraata mina'e kokkonnayshe; ka fuura mali irrowwa qara ana qaatishe.

³⁵ Isha harkaayyo oranna torpeeta kollinni, hupniyyo ka paanta sipla tittini.

³⁶ Atti kontaleeta a anan paheeta'e ana daasse. Qaarqaarsaatti ka ana kuttishen.

³⁷ Laabbeetiyyo a loqtati pora paldisse, umma loqtiyyo in shirqanne.

³⁸ Anka nyaapiyyo kamma daane ka ishootta pire, umma haka pirammaaneti'i, kamma an oorre.

³⁹ Anti in ishootta pire ka ishootta yooqe, umma ana kela in xaane ka loqqaayyo kela sehen.

⁴⁰ Maana malla, oranna'e hupna ana daasseey, ka a ana qara xa'e ana kela katteey.

⁴¹ Akka nyaapiyyo tulta kato ka qaho'e koote, anka a ana needdanna pire;

⁴² ikka qaarqaarsa akkatta'e, paata tooyni umma nama ishoottan paho in co. Ikka Waaqopa ullupaden umma oppa ishootta'en oorinne.

⁴³ Akka kuyyaalayta piita mina'en ishootta nukkulayshe; ka akka dooqqeta poroppa mina ishootta yetade.

⁴⁴ Tiyya samaytiyyo kela anan pahate, ka matta mankistewwaati ana koote. Lekna an anti an upnin ka ana piddame.

⁴⁵ Orra hapta'e deeni ka ana kela xaxxarsoonni ka ete kurriyyo dakayeneeyye, eennow ana ajajamen.

⁴⁶ Hapta tammaqta'e koke, ka mishshikewwaasso kara sookni ka fuuraan xarri.

⁴⁷ Waaqa caattampayta, shiliyyo a ulfeessamo. Waaqase xelsumaayyo ka dinshampaytiyyo kodde a kukuttado.

⁴⁸ Isha, Waaqase ana haalota pooyyino ka mankistewwa ana piddacciisno,

⁴⁹ ka nyaapiyyo kela anan pahe. Atti paarkaalaayyo qaropeela ana kuttisse ka karpampaya kela anan pahate.

⁵⁰ Oo Waaqqo! Semmalla mankistewaappa delan ke kalataysada; ka maxxaayti'i, kalata dawada.

⁵¹ Isha putayma kukutta'e nuqusaadi daanni ka Taawwitise a reexade'e isho sanynyeetaadi'i, xoonaadi a amaname haka paraparati akkinni.