Mataafa Saamu'eeli a lammatta 21 - Mataafa Qulqulloota

Akka Kepa'ooneta sanynyeeta Sa'ooli qara haalota pooyyite

¹ Parrada Taawwiti nuqusumma karaayye, para sessa olkamma loota deete; Taawwiti ka qootoseti desa Waaqa kaassade. Waaqa ka kide, “Qoota Saa'ooli Kepa'ooneta leyshe malla, ishindapayta diika kodeeta'e isha isho sanynyeetaadi qara ca.”

² Nuqusa ka Kepa'ooneta hale; isheetta nefo Isira'eeleta oppaayye in qapto ma, Amooratoppaayye peela haste. Kadi punu orra Isira'eeli ishoottan paheeta'e xaxade nefooyye, Saa'ooli qoota orra Isira'eeli isho a Yihutaati yoota qapo malla ishootta lessaata fade.

³ Taawwiti ka Kepa'ooneta kide, “Maanan ishina koda? Akka samayta Waaqati saktane'e attan diikoose jaqa?”

⁴ Kepa'ooneta ka ishi kiite, “Ino ka Saa'ooli isho sanynyeetaadi otantoppaayye wa ca, pirrewwa isho warqewwannen koddo. Umma ino Isira'eeli karaayye nama takka nefo ikassa mina an qanne.” Taawwiti ka ishootta kide, “Ka kuli maanan ishina koda?”

⁵ Ishootta ka ishi kidene, “namoose ino qittassa ka akkan Isira'eeli karaayye pora takka nefo oppa an kallaannini'i, ino pira fade.

⁶ Semmalla sanynyeetaadippaayye a diira tappa ino daasamen, anka Kipi'a katamasene Asaa'ooli, nuqusase a Waaqa reexade kara'e, fuula Waaqa tura ishootta siibbinno.” Nuqusa ka kide, “In ishina daasha.”

⁷ Nuqusa xoori kodayteetase a isha isho Yoonataani inna Saa'ooli fuula Waaqa tura kodaden malla, mefepoosheti innasene a Yoonataani, oopaase a Saa'oolinni pahe.

⁸ Nuqusa ka hellasene a diira lakki a enenta aayya Risfa Saa'ooli xaayte, Arimooni isho mefepoosheti qeede ka hellaasene a diira keni a enenta Saa'ooli Miraapi Adira'eli inna Parsilaayi a Mahilitaati xaayte qeede,

⁹ Ka Kepa'ooneta'e harkoppa daashe. Ishootta ka fuula Waaqa tura'e irroota qara ishootta fannisen. Tappasene piisa ka pora takka piramen. Ishootta nefo eta fera karaayye a poorta muja paayyinaaneeyye kuyyaata paayyotati leysamen.

¹⁰ Enenta Aayya Risfa ka ohaata dapteeta qeedatte ka shila qara afatte ka a fera paayyannaane paayyatte haka roopa katana pukkadasene qara roopno kara'e, pukkadasene qaraayye kuyyaate xampira moonta ka halkeette pinaana koommayta tooytite.

¹¹ Taawwiti ete wa lammiteetase a Saa'ooli Risfa enenta Aayya koote dakayeeyye,

¹² i'aane ka orra Yapeeshi a Kele'aadi kapaayye lafa Saa'ooli isho a innaadi a Yoonataani qeede. Ishootta nefo kuyyaatase a oppaayye Filisteemeta Kilpo'a kara Saa'ooli ikasseeyye, paapahase a Peeteshaani a kara ishootta siibbisse oppaayye lafoosen haten.

¹³ Taawwiti ka lafa a Saa'ooli isho a innaadi a Yoonataani eeyyeeyye qeede ka lafa orraase siibbsame ollopa pohacciise.

¹⁴ Ka piita Piiniyaami kara'e, pora Sella'i kidammo oppa'e, turka a aappa opa Saa'ooli a Qiisi kara lafa Saa'ooli isho a innaadi a Yoonataani hawlen ka we piisa akka nuqusa ajaje qara koden. Sekkammaayye Waaqa ka qinseeta qoota piitaseti desa dehaannitto dakaye.

Akkima xormeeta Isira'eeli Filisteemeta torpite

¹⁵ Filisteemeta isho Isira'eeleta ka oli torpiteew. Taawwiti ka xelaadi a oranna olli kumpaappe tuule ka Filisteemeta torpen. Taawwiti ka kafade.

¹⁶ Sanynyeeta Rafaaymi oppaayye takka orana a sipla qara a kiilota sessa ka paka kayno qapo ka koraateta haaraya hidade, Yoshipipenooki kidammo ka Taawwiti ikassa dikade.

¹⁷ Ma xoori Apisaayi inna Seruyya Taawwitin pahe ka Filisteemittase torpe ka ishshe. Xela Taawwiti ka Taawwiti xaxade ka kide, “Ilta Isira'eeli akkima in pannini'i, atti lammatta ino olli oranna a tuulto.

¹⁸ Sekkammaayye pora Koopi kidammo kara'e Filisteemeta olli torpeneew. Huushittase Siipekaayi ka sanynyeeta Rafaayimi oppaayye takka Saafa kidammo ishshe.

¹⁹ Kiseeta pilaati Koopi kara'e Filisteemeta olli torpeneew. Inna a Peetelehemittase Elehaanaani a Yaa'iri ka Koliyaadi Keettittase a seyma oranaadi kappuma wantarshoota ohaata mina co ishshe.

²⁰ Akkimose mina'ew, Kaati kara'e orana ka qiteew; sanynyeeta Rafaayimi oppaayye irreelayta takka harka isho loqqa minaayye qupiyya lehi lehi qapo, a olloppa qupiyyaadi kunda lakki afur kaynaan ka eeyye ca.

²¹ Ete Isira'eeli qara jeejjannooyye, Yoonataani inna inna opa Taawwiti Ashama ka isha ishsheew.

²² Sene afuri sanynyeeta a irreelaya. Sene a Rafaaymi Kaati kara dalade; Taawwiti isho xelaadi a oranna ka ishootta leyshen.