Mataafa Saamu'eeli a lammatta 20 - Mataafa Qulqulloota

Akkima Shepaa'i Taawwiti falqe

¹ Tiyyoolayta takka Shepaa'i kidammo inna Pikkiri a kafa Piniyaami kodde ka Kelkela kara kala ka kaasa dawe ka kide, “Oo Isira'eeli Taawwiti quda qoottota an qapno! Inna Isseyi quda lehna wati an qapnooy, nama piisa a alle tikaadipa kalo.”

² Xela Isira'eeli piisa ka alle Taawwiti diishe ka Shepaa'i inna Pikkiri olli aane. Samayta Yihuta xoori, nuqusaaysho quda'e koke ka Yurtaanoosi paayyatte haka Yursaalamiti olli aane.

³ Taawwiti ka tikase xaadi a mankisteeta Yursaalami kara kitto opa kale. Ka lammittewwasene xaadi kudani a akka tikaadi a mankisteeta ishi tooytane'e a turan eeyye diishe qeede ka akka tika takka kara tooytamane kode ka wa a damane kuli ishootta daashe. Ma xoori, ishootta olli in mukne ikka tika takka kara dufamen ka haka leenaane'e, a hiyyettewwa mina kallaaden.

⁴ Nuqusa ka Amaasa kide, “Kuyyaata sessa kara'e xela Yihuta piisa arepa ollopa ana xaashe ka atti kuli are caado.”

⁵ Amaasa ka xela Yihuta ollopa xa'issa aane. Ma xoori, xoora nuqusa ishi qape oppa in deene ka jare.

⁶ Taawwiti ka Apishaayi kide, “Shepaa'i inna Pikkiri a Apeseloomi qaran qapto'e ino rakkacciisaay, akka katamadda kawwattan kapa qorrame in qapannin ka ino kela in tawnini'i, xelase xayyo a oranna qeede ka kamma fade.

⁷ Xela Iyyo'aapi ka Keeritaata ka Felitaata ka xormeeta oranna a ata hasse piisa ka Yursaalami kara Apishaayi quda' xaate ka Shepa'i inna Pikkiri kamma fada tuulte.

⁸ Ete Kepa'ooniiyyi shilase kutta kapa caaneeyye, Amaasa ka ishootta mina de'e; Iyyo'aapi sitiiyyi, mehaddaadi a oranna'e hidade ka pilla korkortaadi ollin surraappa hidade. Ete opadesa annooyye, pillase ka isha quda pi'e.

⁹ Iyyo'aapi ka Amaasa kide, “Innaanno! maanaappa kitta?” Ka a isha dinkino pahanaade ka harkaadi a akkittatin isha tupa kawsa qape.

¹⁰ Amaasa xoori, pilla harka Iyyo'aapi oppa co in akkine; ka in tooytaanne. Iyyo'aapi ka pillasetinni, karittoppa isha dote ka piitopa kara marqina kaa'e. Umma lammatta isha in donne ikka to'e. Iyyo'aapi isho innaasso Appiisa ka Shepa'i innasene a Pikiiri fada kamaaw caaden.

¹¹ Xelase a oranna a Iyyo'aapi oppaayye takka ka pukkase a Amaasa kapa qa'ade ka kide, “Nama Iyyo'aapi jaalanno ka Taawwiti quda kodde, a Iyyo'aapi kamma aano.”

¹² Pukka Amaasa a diikan lahame ka poreeyye otantoppa pi'e. Namase ka akkima xela eeppan tarpino oto pukkase akkooyye akkima eeppa qa'anno tooye ka pukkase poroppaayye alle dula karopa desa mayshe ka japara qara kate.

¹³ Ete pukkase alle poroppa ma'eyye, xela piisa ka Shepaa'i inna Pikkiri kamma fada'e, Iyyo'aapi olli aane.

¹⁴ Shepa'i ka kaffa Isira'eeli piisa oppan tarpe ka katama a Pelipetema'ika kaye. Pekireeta piisa ka ollopa xaate ka isha olli katamasene karopa kalte.

¹⁵ Xelase Iyyo'aapi quda co piisa ka aane ka katama a Apelipeelema'ika kara isha kapa mure ka katamaseneti laka tulan piita ollopa tuulen ka moontandela kawwatta katamaseneti mina deeshen ka qitissa'e, kawwattase tottoommi.

¹⁶ Katamasene karaxata ookayteeta takka a iskatta ka kiite, “Dakaya dakaya! Iyyo'aapi kida, ‘Waan ke lela'e caay, arepa xooye.’”

¹⁷ Ikka isheetta kapopa aane. Iskatteetase ka ishi kiite, “Hela atti a Iyyo'aapi?” Ikka kide, “Aa! ana.” Ikka ishi kiite, “Anti orxayteetaayti waan ke kiina dakaye.” Ikka kide, “In dakayni.”

¹⁸ Ikka kiite, “Xattaayye ikiini, ‘Orra dehaama kaasatta faano a katama Apeeli opa aano.’ Ka qara deexa murri.

¹⁹ Isira'eeli karaayye orra nakayta faano ka amanammo oppaayye takka ana; atti Isira'eeli karaayye katama aayya kodde patissa heenta? Maana malla katamoosen qoottota a Waaqa kodde patissa faani?”

²⁰ Iyyo'aapi ka kide, “Katamoosen patissa ka pireeta a alle ana kapa sekaatto.”

²¹ Ha assen! Nama takka a piitase kunkunnawwa qapto a Efreemi isase Shepaa'i kidammo innasene a Pikkiri nuqusase Taawwiti qara xa'e. Isha pattaaw ana daasha. Anti katamaassin kapa alle'en ma'ay.” Iskatteetase ka Iyyo'aapi kiite, “Mattaadin kawwatta qara xata ke kanna.”

²² Ka oori ookumase xaadin orra piisa kapopa ante. Ikka innasene a Pikkiri Shepaa'i qara matta muren ka Iyyo'aapi katen. Isha ka kaasa dawe ka katamasene kapa pasen. Nama piisa ka tikaadipa kale, Iyyo'aapi ka Yursaalamipa nuqusa kapopa tiitaawe.

²³ Sitiiyyi, Iyyo'aapi xela Isira'eeli a oranna piisa qara saara. Inna Yoodaahe Pannayya kan Kelitaata isho Felitaata qara saara.

²⁴ Atoniraami saara a orra a koda irreeta koonooti, Iyyosaafiti inna Ahiluuti taafampayta taarikeeta.

²⁵ Suusa taafitta, Saatoqi isho Apiyataari kan qeesewwa.

²⁶ Iira Ya'irittase qeesitta Taawwitiiw.