Mataafa Saamu'eeli a lammatta 2 - Mataafa Qulqulloota

Akkima Taawwiti nuqusa Yihuta kodde

¹ Sekkammaayye, Taawwiti ka Waaqa kaassade ka kide, “Hela katamadda Yihuta oppa takka karopa in aana?” Waaqa ka ishi kide, “Aane.” Taawwiti ka kideewwe, “Katama a xaamene karopan aana?” Waaqa ka ishi kide, “Keproonipa aane.”

² Taawwiti ka iskattase xaadi lakki ollin eeyyepa aane. Ishootta nefo Ahino'aamese a katama a IyyIsira'eeli isho Apikeeli iskatteetase a diirtaadi Naapaali qara in kinnin a katama Qermeloosi.

³ Taawwiti ka xelase xaadi isha quda co isho toollaasso ollin eeyyepa qeede, ikka katama Keprooni kara kuti'en.

⁴ Samayta Yihuta ka de'e ka eeyye'e Taawwiti reexe ka samayta Yihuta qara nuqusa kode ka daaten. Ete Taawwiti lelen ka kidene, “Ha orra a Yaapeeshi a kele'adi'i saa'ooli hawleeyye,

⁵ Taawwiti Yapeeshi a kelaati opa orra erke ka kide, “Qoota poqallaassin Saa'ooli paxaarumta kooten ka isha hawliten malla, a Waaqa ishina sako.”

⁶ Amma nefo a Waaqa xoonasene xaadi isho amanumaadi ishina akkisho; qoota asse kooten malla anti nefo a paxaara'en ishina koda.

⁷ Poqallaassin Saa'ooli ito'ey, samayta Yihuta ka ana reexade ka isqara nuqusa ana daatadeey, amma oori japaada ka kokkonnaada.”

Akka Iyyapuste nuqusa Isira'eeli kodde

⁸ Innasene a Neeri Apeneeri, isase saara xela oranna a Saa'ooli kodde, Iyyapuste inna Saa'ooli qeede ka katama Mahinaaymi opan de'e.

⁹ Ka piita Kele'adi ka a Aseeri ka a Iyyisira'eli ka a Efreemi ka a Pini'ami isho a Isira'eeli piisa qara nuqusumshe.

¹⁰ Innasene a Saa'ooli Iyyapuste a Isira'eeli qara nuqusumooyye paraadi kunda afuri ikka para lakki nuqusume. Samayta Yihuta xoori Taawwiti quda kodde.

¹¹ Taawwiti ka katama Keprooni kara'e, samayta Yihuta qara'e para tappa ka leya lehi nuqusume.

Akka Isira'eeleta isho Yihutaata oli torpen.

¹² Innasene a Neeri Apeneeri isho saarra a Iyyapuste a inna Saa'ooli katama Mahanaaymi desa Kepa'oonipa aanen.

¹³ Iyyo'api inna Suriyya isho xela Taawwiti ka ishootta mina aanen. Ka harta Kepa'ooniti olmina kayen. Ka hartasetiiyyi kama kama olmina safaren.

¹⁴ Sitiiyyi Apeneeri ka Iyyo'aapi kide, “xayyoolayta a xa'o ka ino tura oli ekkaysho.” Iyyo'api ka kide, “A xa'o.”

¹⁵ Qinda Iyyapuste a inna Saa'ooli desa nefo Piiniyaamippa nama kudanka lakki, qinda Taawwiti desa nama kudanka lakki ka xa'e ka dikame.

¹⁶ Nama piisa ka paarkaalaadi qara matta qape ka koraatetan qinittoppa dote ka ollin seehen, Kepa'ooniiyyi porose ka “Piita koraateta.” kidame.

¹⁷ Awse oranase harmo'e kokkonnaade Apeneeri isho xela Isira'eeli a oranna ka xela Taawwiti ka oranna kela putame.

¹⁸ Hellaasene a Suuriyya sessa Iyyo'aapi ka Apsa isho Asaheeli nefo eeyyew caan. Asaheeli xoori keeritta'e a kuumanta mina moontan xaani

¹⁹ ka Apeneeri kamma daane. Umma kammaayye akkitta ka pittittopa in maqqine.

²⁰ Apeneeri ka iskammandesa tooyyade ka kide, “Hela Asaheeli ini ke?” Isha ka kide “Aa, ana.”

²¹ Apeneeri ka ishi kide, “Ana kamma oore ka xayyoolaytose oppaayye takka qape ka poojeeta qapo qara qeede.” Asaheeli xoori isha kamma daaneeta in qaatinne.

²² Apeneeri ka Asaheeli kideewwe, “Kaata ana kamma oorin, maana'en leyan ke xapta? Oton ke ishshooyyeew attan fuula a Iyyo'aapi oppa tooyyada?”

²³ Ma xoori Asaheeli isha kamma ooreeta itiite. Semmalla Apeneeri ka oranan karittoppa isha dote, kuutaadi ka tultan ishi sooke. Ikka eeyye'ew pi'e ka to'e orra poroose a oppa Asaheeli pi'e ka to'e kapan tarpino piisa ka qa'anni ka isha tooyni.

²⁴ Ma xoori, Iyyo'aapi isho Apiisa Apeneeri kamma daanew ka ete letta dummittooyye, kunkunnaatase a amma porase koommayta Kepa'ooni opa annooyye Kaayi minandesa kitto kayen.

²⁵ Piiniyaameta ka Apeneeri qudopa ollopa xoorte ka olli takka koddite ka kunkunnaatase qara oranna harmisatte.

²⁶ Sekkammaayye Apeneeri ka Iyyo'aapi hale ka ishi kide, “Hela awta piisan olitorpa quda tawna? Piraampiraadi akkima haddaawo hela a upnaanni a kitto? Orraayti akkima hellaasso kamma alle ooro'e, haka aytamiti ajaja diissa?”

²⁷ Iyyo'api ka kide, “Caattampayta Waaqatinnin xaxanni, kadi asse a kiininiiyyi, xeliyyo a oranna haka parri parinitto'e hellaasso kamma oorri in heene.”

²⁸ Iyyo'aapi ka oori kaasa dawe, xelase a oranna ka qa'ade ka Isira'eeleta kamma daana diishe. Umma kulipaata oranna in torpine.

²⁹ Apeneeri isho xelaadi a oranna ka halkeetta kumma anni rafen ka naaba Arapa karan tarpen ka kirra Yurtaanoosi tuullen ka Pitirooni piisa oppan tarpen ka Mehanaayimipa de'en.

³⁰ Iyyo'aapi ka Apeneeri kamma alle oore. Ete xelaadi a oranna piisa ollopa oorsheeyye, Asaheeli mali xela Taawwiti oppaayye nama kudanka sakali ka in kinnin.

³¹ Xela Taawwiti xoori Piiniyaameta Apeneeri quda kitto pa'e nama dippa sessa kunda lehi leyshen.

³² Ka Asaheeli qeeden ka Peetelehemiiyyi hawla aappaayshoti kara hawlen; Iyyo'aapi isho xelaadi a oranna ka halkeetta kumma anni rafe ka ete para qiteeyye, Keprooni kayen.