Mataafa Saamu'eeli a lammatta 19 - Mataafa Qulqulloota

Akkima Iyyo'aapi Taawwiti dehaame

¹ Ikka Iyyo'aapi lelen ka kidene, “Ha! Nuqusa Apseloomi malla nyarrahani ka pooyni.

² Ete kidammitto, “Ha! Nuqusa innaadi malla nyarrahani.” Qoota xela dakaye malla, xela oranna piisa'e awwse kuyyaasetiiyyi putaymasene nyarrahatopa pursamen.

³ Awwse kuyaasetiiyyi, xelase a oranna ka akkima xela a orana tura qahe ka jeere ka lokko lohno mina'e, katama karopa lohe.

⁴ Nuqusa ka fuuladi qara dekade ka nessa kuttan pooyni ka kiini, “Oo innaayyo Apseloomi! Apseloomi innaayyo, innaayyo!”

⁵ Iyyo'aapi ka nuqusa kapopa tika kelopa kulle ka ishi kide, “Xelase xaayti a oranna, isase ke ka hellaatti a diira ka a tuparra isho haantowwaatti ka lammowwaattin pahe, awwe ijeerisse.

⁶ Atti a ke needdanna ijaalanni ka a ke jaalanna needdanni. Atti akkima saarra isho xela oranna we kapa a dikni a kinnin awwe fayya'e akkisse. Kadi Apseloomi pattaaw caade ino ka piisani pirammeeyye, akkima xasootto anti awwe fayya'en akke.

⁷ Semmalla amma xa'e ka sooke, xelaayti a orannaati xasa kokkonnayshe. Anti maxxa Waaqatinnin ke xaxanni, oton a sookniniiyyi halkeettose are kitto oppaayye nama takka nefo ke kapa in haso. Ini ka neequmta a shakki paayyatte haka ammati ke qara kayte qara jaaltaay.”

⁸ Nuqusase ka xa'e ka xarra katama kapa kuti'e. Ikka xelase a oranna piisa lelen ka kidene, “Ha nuqusa xarra katama kapa'e kuti'e. Xela piisa ka nuqusa turopa dehaade. Artosen karan Isira'eeleta piisa ka tikkaasso opa alle qahate.

Akkima Taawwiti Yursaalamipa kalta xa'e

⁹ Kaffa Isira'eeli piisa karaayye, samayta piisa ka oli deexni ka kiini, “Ha nuqusa nyaapaayno piisa kela inon pahe ka Filisteemeta kuli kela inon pahe ka amma oori Apseloomi tura alle piitoppa qahe.

¹⁰ Apseloomese an reexanne ka isqara nuqusa koone nefo orannaappa'e to'e. Semmalla qoota nuqusa kalissaati desa maana'e oppa a oorinni a kinnin?

¹¹ Nuqusase Taawwiti ka qeesewwasene Satooqi isho Apiyataari nessa erke ka kide, “Qimaya a Yihutaati kida, ‘Qoota nuqusa tikaadi karopa oorssaati desa wa Isira'eeleta piisa oorsatte inuqusa qara kayeneey, xaayshin maana malla kamma hasnittan?

¹² Ha ishina a hellaanno, ha ino ollin an dakinta ka diika takkaay, maana malla ana nuqusa kalissa'e kamma hasnittan?’

¹³ Ka Amaasa kidaawwe, ‘Ino ollin an dakinta ka diika takkanne? Arepa desa oton pakka Iyyo'aapi oppa'en xeliyyo a oranna qara saara ke an kooniniiyyi, a Waaqa a neeqa ana qara kodo ka qaran jaalsho.’”

¹⁴ Taawwiti ka afoosenen karitta samayta Yihuta piisa akka nama takka mina tiitayshe. Ikka nuqusa nessa erken ka kidene, “Ke isho orraayti piisanti kala.”

¹⁵ Nuqusa ka tiitaawa xa'e ka kirra Yurtaanoosi kapa kaye; Yihutaata ka nuqusa teyyatta'e ka Yurtaanoosi qaran isha tuullissa'e katama Kelkela opa deete.

¹⁶ Sitiiyyi Shimi'i Piiniyaamittase katama Pahuriimiti de'e inna Keera ka nuqusa teyyatta'e orra Yihuta olli jarjartan lekkade.

¹⁷ Kafa Piiniyaami oppaayye nama kuma takka ka isha olli de'e. Orxaytase a toola Saa'ooli Siipa ka hellaadi a diira kudanka ken ka orxayaadi kunda lakki qapadeew ka Yurtaanoosipa nuqusa turopa jarjartan lekkadeew.

¹⁸ Ka toola nuqusa tuullissa'e ka wa nuqusa fade koda'e, kirra tuullen. A nuqusa Yurtaanoosi tuulla harmisannooyye, Shiimi inna Keera ka nuqusa tura'e pi'e ka fuula piitan kaye.

Akkima Taawwiti Shimii ishindapaytaadi diishe

¹⁹ Ka nuqusa kide, “Poqallaayyo nuquso, kuyyaata atti Yursaalami kara sookteeyye, anti orxaytaayti wan ishin ke dape ana qara'en qapadan ka matte in qapnaadan; poqallaayyo, ishin dapaytiyyo alle ana diishe.

²⁰ Maana malla, anti orxaytaayti akkiman juppoota kode in upaay. Awwe xoori ke poqallaayyo nuqusa teyyatta'e, sanynyeeta Yoosefi oppaayye tin a paayyota'en kodde ka lekkadeey.”

²¹ Inna Suuriyya Apiisaayi ka kide, “Shimi'i qoota nuqusa isase a Waaqa daatade ote malla, toota isha faani in kitto?”

²² Taawwiti xoori ikide, “Ishina hellaa Suuriyyaayye, maana oppopa ishin kalshe akka awwe ana qara paarkaala koddinittan? Hela awwe kuyyaata a oppa Isira'eeli kara nama ikassa parpaaccisnitto? Awwe kuyyaatan oppa suafaaneta nuqusumiyyo a Isira'eeli qaropa oore akkima koddite in upnaade.

²³ Nuqusa ka oori Shimii xaxade ka kide, “Atooto!”

Akkima Taawwiti mefepoosheti'i, ishindapaytaadi diishe

²⁴ Mefepoosheti oopa Saa'ooli ka nuqusa teyyatta lekkadeew. Umma kuyyaata a nuqusa sooke paayyatte haka nakaytan kallo kara'e, loqqaadi in jaqanne. Umma kawsaadi in mujanne. Umma mehaddaadi in diipanne.

²⁵ Ete Yursaalamiiyyi nuqusa teyyatta de'eyye, nuqusa ka ishi kide, “Ata mefepoosheti, maana malla ana olli a deenin?”

²⁶ Ikka ishi oorshe ka kide, “Oo poqallaayyo nuquso! Anti orxaytaayti an toonnaytaay, in orxaytiyyo kide, ‘Akkan qara kuti'o ka nuqusa olli aano'e, harreeta ana harmishe.’ Ikka ana sassapade.

²⁷ Ka ke poqallaayyo nuqusa tura qootiyyo a orxaytaaytiti desa darta torre. Ma atti poqallaayyo nuquso, a erkampattoota Waaqa minaay, wa ildaatti tura paxaara piisa kode.

²⁸ Poqallaayyo nuquso, qindaayti desa sanynyeeta aakkinno piisa a leeta ishootta parpaaccisnitta patta ma, atti ana orxaytaayti qeette ka orra tomaayti oppaayye dammo oppa kittite. Ka kuli sede qaropa ke nuqusa'e, maana lelattan ettanshaaw?”

²⁹ Nuqusa ka ishi kide, “Qootaayti desa maana'e haasa koopinni? Ke isho Siipa akka dulla qootattan in murade.”

³⁰ mefepoosheti ka nuqusa kide, “Isha a piisa teyyado ma, poqallaayyo nuquso! Paka atti patta nakaytan kalte.”

³¹ Parsilaayi Kele'aadittase ka katama Rokelimiti xata lekkade ka eeyye isha olliiyyi yoortaanoosi tuulla'e ka nuqusa keessa de'e.

³² Parsilaayi nama akata kere ka para kunda sette pire. Ka qoota akata teyantoolayta malla, a nuqusa Mehanaayiimi kara cooyye damta ishi dehanni.

³³ Nuqusa ka Parselaayi kide, “Ana olli tuulle ka ana olli Yursaalami kara kallaado, ana ke damshaay.”

³⁴ Parsilaayi xoori inuqusa kide, “Anti para meeqan arepadesa kallaada ka ke nuqusa olliiyyi Yursaalamipa aana?

³⁵ Amma pariyyo kunda setti'iy, wa orra xasanna ka xasanni in kinnini in olkela upnaatta ettansha? Anti orxaytaayti waan damma ka ikkina maana akkima kiinaan in olkela damdamsatta ettansha? Nessa diira isho a iskatta kirpa dawannooti arepadesa in dakaya ettansha? Ka kuli anti orxaytaayti ke poqallaayyo nuqusa qara'e, waan ishi haadeta pila kodda maana?

³⁶ Anti orxaytaayti Yurtaanoosin tuulla ka nuquso ke olliiyyi shakkayteeta aana diisheey, atti nuquso maana malla sede piisan ana kalata oorissa?

³⁷ Anti orxaytaayti ana tiitaawo ka katamaayyo a mattiyyo kara'e hawla aappinno isho a aayyaanno kapa to'o. Ma xoori orxaytaayti Kimihaami tin are caay, poqallaayyo nuquso isha a ke olli aano ka wa ildaatti tura paxaara ishi kode.”

³⁸ Nuqusa ka kide, “Kimihaami ana olliiyyi de'a, anti ka wa ildaatti tura paxaara piisa ishi koda ka wa atti ana qara faanitta piisa ke kodaaw.”

³⁹ Kammadesa samaytase piisa ka Yurtaanoosi tuulle. Nuqusa ka tuulleew, nuqusa ka Parsilaayi dinke ka ishi sake, Parsilaayi ka tikaadipa tiitaawe.

⁴⁰ Nuqusa ka Kelkelaapa aane. Kimihaami ka isha olli aane. Xela oranna a Yihuta piisa isho a Isira'eeli quda paka takka ka Yurtaanoosi qaran isha tuullishe ka isha olli aane.

⁴¹ Xelase a oranna a Isira'eeli piisa ka nuqusa kapopa de'e, ka nuqusa kide, “Hellaasene xanno, xelase a Yihuta maana malla dekandekatti ke qeede ka nuquso ke isho toolaayti ka xelaayti a oranna Yurtaanoosi qaran tuullishen?”

⁴² Xelase a oranna a Yihuta piisa ka a Isira'eeliti oorshe ka kide, “Waan malla asse koone, qoota nuqusa kafuman ino quda qato mallaay, maana malla sede malla miironnittan? Hela ino nuqusa qaran we damme? Moon isha daassata wati ino daashe?”

⁴³ Xela Isira'eeli ka a Yihutaati oorshe ka kide, “Ha ino nuqusa qudaayye harka kudanin qapna ka mankisteeta Taawwiti quda qoottota kutta qapna. Semmalla maana malla ino tuffatten? Qoota nuqusaayno kalsattaati desa haaswatta'e, ishin tura an qattine?” Ma xoori, afa xela Yihuta miira miira haasawanna'e a xela Isira'eeli qara jaale.