Mataafa Saamu'eeli a lammatta 18 - Mataafa Qulqulloota

Akkima Apseloomi putame ka orannaappa to'e

¹ Taawwiti ka orrase isha olli co ollopa oorshe ka ishootta qara shalaqadda ka motoloqadda shuume.

² Ka xelase a oranna pora sessa qishshe ka paka takka qara Iyyo'aapi saara kode ka paka takka qara Apishaayi inna Suuriyya innasene a opa Iyyo'aapi saara kode ka paka takka qara'ew, Itaayi Kettittase saara kode ka tuula ishootta erke ka xelaseti kide, “Anti kuli ishin olliiwwin tuula.”

³ Ishootta xoori i'ishi kidene, “Atti ino olli tuula ke faani in kitto, maana malla kadin punu qahaninnaayye ishootta we kapa ino in dikan. Umma kadi punu paka takka ino quda piramaayye, we kapa in dikan; ma atti xawwaati inoppaayye nama kuma kudani qara qapta. Semmalla kati katama kara tawta ka eeyye xata ino qaarqaarta erkinittaayye wayyi.

⁴ Nuqusa ka ishootta kide, “Anti wa ildaassin tura paxaara piisan koda.” Ete xelase a oranna dippada isho kumadda qootame kita kitaan tuula xaanooyye, nuqusa ka xarra katama kapa qa'ade.

⁵ Ka Iyyo'aapi isho Apisaayi ka Itaayi ajaje ka kide, “Ana malla kida ka xayyoolaytase Apseloomi in miidan.” Qoota Apseloomi desa ete nuqusa saarra piisa ajaja daannooyye, xela piisa ka dakaye.

⁶ Xelase ka Isira'eeleta torpa'e koommaytopa tuule ka mura Efreemi kara oli torpen.

⁷ Xela Isira'eeli ka xela Taawwiti tura putame; kuyyaasetiiyyi orra pirame ka ollin koope; nama kuma kunda lakki ka le'e.

⁸ Oranase ka murase piisa kara paldaade. Kuyyaasetiiyyi a orannaan pirame qaran qapto'e, a ataka mura karatin pirame ka jaalen.

⁹ Apseloomi ka xela Taawwiti mina kaye ka kaanketa qara kulufini. Kaanketase ka paajana qoyra a hanjarraadi oli qapen kelandesa ishin keerte. Nyirfaadi ka hanjarrasene kara qapamen. Kaanketase isha kela kitto ka kelan tawte ikka irra quda raa'ini.

¹⁰ Nama takka ka akke ka Iyyo'aapi lele ka kide, “Tin Apseloomi a paajana qoyra oppa raa'inon akke.”

¹¹ Iyyo'aapi ka namase sede ishi lello kide, “Maana kiini? Ete isha akkiteeyye ka kuli maana'e sitiiw a donnin ka piitopa isha a kannin? Helani anti dakara pirreeta sheqileeta kudani isho salpata xormeeta ke daannin heene.”

¹² Namase ka Iyyo'aapi kide, “Qoota nuqusa ke ka Apisaayi isho Itaayi ajaje ka kide, ‘Ana malla kida ka xayyoolaytose Apseloomi in miidan.’ Malla kadan punu turanneew dakara pirreeta sheqileeta kuma takka harkan kayade nefooyye, inna nuqusa qaropa anti harkiyyo an xaasho.

¹³ Katin isqara karitta kutade ka isha ishshe kiiteeyyeew, we takkan nefo nuqusa tura in juutamaneey, atti kuli alle ana diinni heente.

¹⁴ Iyyo'aapi ka kide, “Anti ke olli asse eta pira quda an tawo.” Ka orana sessa harkoppa teyyade ka aane ka Apseloomi a eeyye co ka qoyroppa raa'ino tupa sataata tottorpe ka oppa qaqqaatishe.

¹⁵ A Iyyo'aapi kela kontaleeta haana oppaayye, nama kudani ka Apseloomi kapa mure ka isha doddoten ka ishshen.

¹⁶ Iyyo'aapi ka kaasa dawe ka xelase a oranna qaatishe, xelase ka Isira'eeleta kamma alle oore.

¹⁷ Ka Apseloomi qeeden ka mura kara qaawa seka karopa isha katen ka qaropa dakadda tuulen. Isira'eeleta piisa ka tikkaasso opa qahate.

¹⁸ Apseloomi ka a cooyyew kide, “Anti inna maxxiyyo dakaytishe an qapo.” Ka naaba takka “Naaba nuqusa.” Kidammo kara daka diiruma dishade ka maxxaadin hale ikka awwe ikki “Daka Apseloomi.” Kidammi ka halaammi.

Akkima Taawwiti toota Apseloomi dakaye

¹⁹ Kammadesa Ahimaasi inna Satooqi kide, “Ana keero ka akkima Waaqa harka paarkaalaadi kela ishan pahe, nuqusa otoota lelo.”

²⁰ Iyyo'api ka ishi kide, “Awwe otootannen aanan, kuyyaata pilaati ishin antaay; qoota inna nuqusa to'en malla, awwe otootannen aanan.”

²¹ Ka eennow Toobbitta kide, “Aane ka wa akkitte nuqusa lele.” Toobbittase ka Iyyo'aapi kaareeta oorshe ka keeritan tawe.

²² Ahimaasi inna Satooqi ka Iyyo'aapi kideewwe, “Ana Toobbittase kamma keeroow, wa deena ka alle de'en.” Iyyo'aapi xoori i'ishi kide, “Otoota a kamma we teyto in kittooy, innaayyo! Maana malla keertaaw?”

²³ Ikka ishi kide, “In keera wa deena ka alle de'an.” Ikka ishi kide, “Keere.” Ahimaasi ka pora lakka oppa mare ka keere ka Toobbitta qatte.

²⁴ Taawwiti sitiiyyi xarradasene a kara isho a laka tulati otanta kara'e qaa'e. Tooytampayta waartiya tooytino ka xarrase kawwatta quda co qaropa fayyade ete tooynooyye, nama xawwaati keerro akke.

²⁵ Ka nuqusa hale ka ishi lele. Nuqusa ka kide, “namoose oton xawwaati caayye, otoota paxaaratnni deeni.” Namase ka dehaattaan de'e de'e ka ishootta kapa foolsade.

²⁶ Tooytampaytase waartiya tooytino ka nama pila a keerro akkeew ka aappa xarra tooytino wellele ka ishi kide, “Tin nama pilaa'e xawwaati are keerriiw.” Nuqusa ka kide, “Namoose kuli otoota paxaaratinniiw deeni.”

²⁷ Tooytampaytase waartiya tooytino ka kide, “Namoose tura qatte, keerittaadi keeritta Ahimaasi a inna Satooqi ana paha.” Nuqusa ka kide, “Isha nama fayya'ey, otoota fayyatin deena in diisho.”

²⁸ Ahimaasi ka ullupe ka nuqusa kide, “Nakaytaaw!” ka nuqusa tura fuula piitan kaye ka kaareta oorshe ka kide, “Poqallaayyo nuquso, Waaqa Poqallaatti isase orrase ke qara xa'e akka putamane kode, a eeppisamo!”

²⁹ Nuqusa ka kaassade ka kide, “Xayyoolaytase Apseloomi fayyaaw qapa?” Ahimaasi ka ishi oorshe ka kide, “A Iyyo'aapi orxaytase xaayti a nuqusa isho ana orxaytaayti erkinooyye, horayta ollin koopen dakaye; ma wa kodde an upo.”

³⁰ Nuqusa ka ishi kide, “Eeppadesa tarpe ka qa'ado.” Ikka tarpe ka qa'ade.

³¹ Kammadesaaw Toobbittase ka de'ew ka kide, “Nuquso poqallaayyo, otootannen ke de'e. Waaqa awwe harka orrase ke qara xa'e piisa kela ken pahe.”

³² Nuqusa ka Toobbittaseti kide, “xayyoolaytase Apseloomi fayyaaw qapa?” Toobbittase ka ishi oorshe ka kide, “Poqallaayyo nuquso, nyaapaayti isho a neequmtan ke qara xaana piisa a xayyoolayseti mina kodden.”

³³ Nuqusa ka a kuttati nyarrahe ka tikase kawwatta katama qara kitto qaropa fayyade ka pooye. Ka ete annooyye pooyni ka kiini, “Oo innaayyo, Apseloomi kaata anti pakkaaytippa anto'o, oo Apseloomi innaayyo, innaayyo!”