Mataafa Saamu'eeli a lammatta 17 - Mataafa Qulqulloota

Akkima dehaamta Hushaayi a Akitofeeli qara jaale

¹ Akitofeeli ka Apseloomi kide, “Ana nama kuma kudanka lakki reexxo ka raawwaayye Taawwiti xema tuulo.

² A kafade hupnaadi ka nukkullaadeyyen isha qara ura ka tammaqtan isha ririkkaysha, samayta isha quda co piisa ka alle qaha. Anka nuqusa pattaaw ishsha.

³ Ka akka haantota diirtaadi kelopa oorritto mina'e, samayta piisa ke kelopa oorsha. Atti akka nama takka'ew to'o, orra piisa ka tiitaawo ka fayya qapnaado faaniiy.”

⁴ Dehaamose ka Apseloomi isho qimaya Isira'eeli piisa xasayshe.

⁵ Apseloomi ka kide, “Intoonno Hushaayi Arkittase kuli halaaw anka wa kiina dakaynawweey.”

⁶ Ete Hushaayi Apseloomi kapopa de'eyye, Apseloomi ka ishi kide, “Akitofeeli asse kideey, hela dehaamtaadi qara'en koonam moon wa kiita'e ca?”

⁷ Hushaayi ka Apseloomi kide, “Kiseetose a ammati'i, dehaamtose a Akitofeeli daashe in paxaaran.

⁸ Aappaayshin isho xelaadi akkiman xormeeta oranna ka marqinolaya kodden ka akkima pinanta koommayta a kela nyalqa qeeden mina wareerraan i''upta. semmaliiyyiiw, aappaayshin xorma oranna pare. Umma halkeetteeyye xela oranna oppa mukni in co.

⁹ Esse amma apari rahana takkan taaki pora pila kara'e dekade. Oton isha qattisha ka xelaaytippa nama lamayta leyshaayye, nama sede dakayo itorra ka kide, ‘Xela Apseloomi quda anno ipirame.’

¹⁰ Aappaayshin akkima kokkoki, a isha quda ca kan xormeeta, oranna Isira'eeleta piisa upaay. Xorma kokkoka a ishi kiinaane marqina karma'e qapa kuli ka tammaqtan puulaawa.

¹¹ Semmalla anti waan ke dehaama, Taani paayyatte haka Persaapeti'i, Isira'eeleta a lekuma hinkaajjeta daka kela pahato piisa a ke kapopa qoobbaawto ka atti saara kodde ka olliiyyi oranna tuule.

¹² Ka pora oppa teyaade isha qara urra ka akkima tadahata piita qara pirritto mina isha qara pirra; umma isha isho a isha quda ca oppa nama takka nefo in paho.

¹³ Oton punu katama karopa qaheeyye, Isira'eeleta piisa watarowwaan de'a, anka daka takka nefo in hasnin mali, katamoosen watarootan tinna ka alle naabba karopa kanna.”

¹⁴ Apseloomi isho samaytase a Isira'eeli pisa ka kide, “Dehaamta a Akitofeeli kapaayye dehaamta a Hushaayi a Arkitta'e jaalli.” Maana malla, Waaqa Apseloomi qara neequmta qeeda'e dehaamtase a Akitofeeli paxaara hattissa'e piisadeey.

Akkima Taawwiti Mahanaaymipa qahe

¹⁵ Hushaayi ka qeesewwasene Satooqi isho Apiyataari kide, “Akitofeeli asse ka asse kide ka Apseloomi isho qimaya Isira'eeli dehaame ma, anti asse ka assen kide ka dehaameew.

¹⁶ Semmalla jarjartan nessa erka ka Taawwiti kida, ‘Raawwaayye malka koommayta qara in mukan ma, ke nuqusa isho orra ke quda co piisanti akka a pirammini'i, qinda ishina koddinitto piisan kirreeyye kama disi opa tuulla.’”

¹⁷ Sitiiyyi Yoonataani isho Ahimaani katama karopa kulleeta ka akkaatta qoota ishootta faani in kinnin malla, paada Enrokeeli kapa'e asanni. Orxayteeta takka a enenta ka deeni ka ishootta haasa lelli. Ishootta ka anni ka turaayye nuqusase Taawwiti lelli.

¹⁸ Ma xoori, xayyoolayse takka ka ishootta akke ka Apseloomi kapa lele. Ikka piisantiiyyi jarjartan alle qahen ka katama Pahuriimi karaayye tika nama takkati opa aanen. Isha nefo tikaadi karaayye qaawa pishaa'e qapa ikka karopa lekkaden.

¹⁹ Iskatteetaadi ka qeette ka afa qaawaseeti qara unta afte. Umma sede in upnaysamme.

²⁰ Orxaya Apseloomi ka iskatteetase kapopa tikaadipa de'en ka ishi kiini, “Ahimaasi isho Yoonataani ayshaayye caan?” Isheetta ka ishootta kiite, “Kirroose shakkaayye afa disi opa tuullen.” Ikka ishootta faden ka dapen ka alle Yursaalamipa tiitaawen.

²¹ Ete ishootta tawen kammaayye, Ahimaasi isho Yoonataani ka qaawase kara sooken ka aanen ka Taawwiti lelen ka kidene, “Akitofeeli asse ka asse kide ka ke suleey, xa'e ka jarjartan kirra tuulle.”

²² Taawwiti isho orrase isha quda co ka xa'e ka Yurtaanoosi tuulle. Ete para qinnooyye, piisa ka tuullen umma a in tuullinin nama takka nefo in hasne.

²³ Akitofeeli akkima sullaataadi olkela ishi in teynin ete akkeeyye, harreetaadi fe'ade ka qara fayyade ka katamaadippopa tikopa alle kale ka toolaadi kodeeta kode ka isi siibshe ka to'e. Ka hawla aappaayshoti oppa hawlame.

²⁴ Apseloomi ete samaytase a Isira'eeli piisa ollin Yurtaanoosi tuulleneeyye, Taawwiti Mahanayiimi kaye.

²⁵ Apseloomi pakka Iyyo'aapippa'e Amaasa saara xela orannati kode. Amaasa nefo inna a Isira'eelitta takka Yeteri kidammooti. Yeteri Apikeeli heme, Apikeeli kan enenta Nahaashi ka enenta opa Surriyya. Surriyya ka turaayye aayya opa Iyyo'aapi.

²⁶ Apseloomi isho Isira'eeleta ka piita Kele'aati oppa safaren.

²⁷ Ete Taawwiti Mehanaayimi kayeeyye, Shoopi inna Na'oosi isase Raapa katama Amoonetati de'e ka Maakiri inna Ami'eeli isase katama Lodapaariti de'e ka Parsilaay Kele'aadittase katama Rokelimiti de'e,

²⁸ qoolla mukitta ka tomadda ka okkotowwa ka kappa ka poorta ka daamma ka asheeta waaten ka xarsha ka missira ka

²⁹ takma ka xuda ka kaharra isho ittoota lo'alla qapaden ka akka Taawwiti isho orrase isha quda co damane'e, ishootta ishin de'en; maana malla idikaden ka kidene, “Orroose koommaytoppa'e kakkafaden ka doxen ka deepodeneey.”