Mataafa Saamu'eeli a lammatta 16 - Mataafa Qulqulloota

Akkima Siipa Taawwiti qaarqaare

¹ Ete Taawwiti kuutase a irrootaseti qara desa shakkayteeta tarpeeyye, orxaytase a mefepoosheti Siipa harrewwa lakki a qara laaqqota dippa lakki ka qoomayta dalta wayneeta laaqqota dippa ka luukkata a palite dippa ka taadeta wayneeta shiwwayta takka fe'isan qapade ka isha mina mina'anayta deeni ka a isi qara in upniniiyyi isha minaadesa sooke.

² Nuqusase ka Siipa kide, “Wossen a qapatte maana?” Siipa ka ishi oorshe ka kide, “Harrewwa toolaayti a nuqusa'e qara kuti'a, laaqqota isho luukkawwa xelaayti dama. Taadeta wayneeta'ew a koommaytoppa kakkafanna'e ikka.

³ Nuqusa ka isha kaassade ka kide, “Oopaase a poqallaatti a Saa'ooli Mefepoosheti ayshaayye ca?” Siipa ka ishi oorshe ka kide, “Isha ikiini, ‘Samayta Isira'eeli awwe mankisteeta a akkinno'e ana oorsha’ Ka Yursaalami kara hase.”

⁴ Nuqusa ka Siipa kide, “Tin amma oori wa Amefeposheti kodde piisa xaayti. Siipa ka fuula piitan kaye ka kaareeta oorshe ka kide “Nuquso poqallaayyo, itturopa asseew a paxaara ana dikatta in diishan!”

Akka Shimi'i Taawwiti ote

⁵ Nuqusase Taawwiti ete katama Pahuriimi kayeeyye, daltayta Saa'ooli oppaayye nama takka Shimii kidammo inna Keera isha mina sooke ka Taawwiti otittan deeni.

⁶ Ka kadi punu xela oranna isho foolisadi a isha tooytino piisa akkitta ka pittittan isha kapa caayye, Taawwiti isho saarraadi dakaddaan dakkini.

⁷ Ka isha onni ka kiini, “Atti nama diika, ukkuttootayti are kara sooke, sooke.

⁸ Ha Waaqa, diikase a toola Saa'ooli, isase a qara mankisteeta qedatte piisa kapa'e ke qara haalota pooyyini ka mankisteetase harka innaatti a Apseloomippa daashe. Qoota nama diika koddite malla, pateettase xaayti ike qara kayte.”

⁹ Sitiiyyi Apiisa inna Seruyya ka nuqusa kide, “Kutoose to'e, maana'e nuquso ke poqallaayyo onni? Ana aano ka qaraayye matta muro.”

¹⁰ Nuqusa xoori i'Apisa isho innaasso Iyyo'aapi ikide, “Ishina hellaa Seruyyaayye, maana oppopa ishin kalshe? Oton iWaaqa ishi kide, ‘Taawwiti ote.’ Ikka malla ana onniiyyi, ayno ishi kida maana'e asse koote?”

¹¹ Ka Apiisa isho saarraadi piisa kide, “Oto innaayyo an xaaye ana ikassa faanaaneeyye, Piiniyaamittose desa kuli atta fadaaw? Waaqa isha ajajeey, diisha ikka eeyye otado.

¹² Takka punu Waaqa rakkootiyyo ana akka ka otittose a awwe kapa paxaarumta ana kodaay.”

¹³ Semmalla Taawwiti isho orraadi ka poraaysho oppa aananni. Shimi'i xoori kunkunnaatase Taawwiti minandesa kitto quda anni ka poran isha onni ka dakaddaan isha dakkini ka kuyyaalayta qaropa pulli.

¹⁴ Nuqusase isho orrase isha quda co piisa ka porase a opa annan kayen ka kakkafaden ka nessaden.

Akkima Akitofeeli Apseloomi dehaame

¹⁵ Sitiiyyi, Apseloomi isho samaytase a Isira'eeli isha quda co piisaka Yursaalamipa kale. Akitofeeli ka isha olliiw ca.

¹⁶ Moottase a Taawwiti Hushaayi arkittase ka ete Apseloomi kapopa aaneeyye ishi kide, “Nuquso! Parra leka nuqusume, nuquso! Parra leka nuqusume.”

¹⁷ Apseloomi ka Hushaayi kide, “Amanumase xaayti a moottaayti Taawwiti qapto sede? Maana malla moottaayti Taawwiti olli a annin?”

¹⁸ Hushaayi ka Apseloomi oorshe ka kide, “Inna! Nama a Waaqa ka samayse isho lekna Isira'eeli piisa reexade, anti xaadin kodda ka isha kela kallaada.

¹⁹ Ka allu, otoon innaadi kela koda an kooniniiyyi, ayno kelan koda koda? Akkiman aappaayshin kela koda kode mina'en ke kelaayye koda koda?”

²⁰ Apseloomi ka Akitofeeli kide, “Intoonno, maana ino dehaamta? Maanan koona?”

²¹ Akitofeeli ka Apseloomi kide, “Aane ka lammowwasene a aappaayshina, isasene akka tika manksteeta tooytane are hattishe olli muke. Sitiiyyi akkima aappaayshin akka ke xaccisado koote. Isira'eeleta piisa dakaya; hupna orra a ke quda co ka kokkonnaadaay.”

²² Ka oori tika nuqusati tula qaran Apseloomi'i, tukkana daapen. Apseloomi ka tukkannasene kelopa kulle ka ilda samayta Isira'eeli piisa tura'e lammowwa aappaayshoti olli muke.

²³ Etoosen karaayye, dehaamta a Akitofeeli kaassatta akka nessa Waaqa kaassannaan kapa'e dikammi; Taawwiti isho Apseloomi ka piisantiiyyi dehaamta Akitofeeli asseew ulfeessini.