Mataafa Saamu'eeli a lammatta 14 - Mataafa Qulqulloota

Akkima Apseloomi Yursaalamipa oore

¹ Inna Siiruyya Iyyo'aapi ka akkima nuqusase Apseloomi yaatanno upnaade.

² Ka katama Teqo'a opa nama erke ka iskatteeta takka ooka koddite halaaccise ka ishi kide, “Atara! Nama nyarrahano pahanaado ka mehadda a dapteeta kalsado. Umma daata in daatadan ma iskatteeta nama to'e malla eta kutta nyarrahate pahanaado;

³ ka nuqusa kapopa aane ka waan ke lela ishi lele” Ka oori wa haasawatta isheetta lele.

⁴ Iskatteetase a Teqo'a ka nuqusa kapopa ante ka fuulaadi piitan kayte ka ishi kaareeta oorisse; ka ishi kiite, “Nuquso! Ana qaarqaare!”

⁵ Nuqusa ka ishi kide, “Rakkootaayti maana?” Ikka ishi oorisse ka kiite, “Dukaatan anti an hiyyeetteta a diirtiyyo ana qara in kinnin.

⁶ Anti orxayteetaayti hellaa diira lakkin qapa, ikka lakoppa oli piren. Umma nama olkela qapo in co, takka ka takka dayshe ka ishshe.

⁷ Kafa piisa ka amma ana orxayteetaayti qara xa'e ka kiini, ‘namase innaasso ishshe ino daashe; innoosen xaaysho a ishshe kapa'en ikannaay.’ Ka semmalla lehampaytase kuli patissa faani ka qoyrase xayyo takka apittoppa opayno libbissa ka diirtiyyo'e piita qaraayye maxxa isho xotta dawreeta faani.”

⁸ Nuqusa ka iskatteetaseti kide, “Qootaayti desa ana ajaja tarpishaay atti tikaaytipa kale.”

⁹ Iskatteetase a Teqo'a ka nuqusa kiite, “Poqallaayyo nuquso! Wa arepadesa koonitta minan oton waqasa ke qara kayniiyi, ke nuqusa isho sufaanetaayti qara'en kaynin ma a ana isho tooliyyo qara kayo.”

¹⁰ Nuqusa ka isheetta kide, “Oton nama we ke kiiniiyyi ana kapopan xooye, lammatta ke in qappadooy.”

¹¹ Isheetta ka ishi kiiteewwe, “Akka haalota pooyyampaytase arepadesa nyapala qara'ew nyapala in koonini ka innaayyo in ikannini'i, atara nuquso maxxa Waaqa a Poqallaattitin ana xaxado.” Nuqusa ka ishi kide, “Caattampayta Waaqatinnin xaxanni, we takkan nefo innaatti quda in kayan.”

¹² Iskatteetose ka kiiteewwe, “Anti orxayteetaayti akkan ke poqallaayyo nuqusa'e we takkan haasawado'e, atara ana faqqate.” Ikka kide “Haasawado.”

¹³ Iskatteetase ka kiite, “Atti nuquso! Innaatti a piitoppa daaname a tikopa a oorinneey ka kuli maana malla wa asse paha samayta Waaqa qara dikatte? Asse haasawattaaytinni, keew isqara dapa mure.

¹⁴ Akkima pisha tuqame ka lammatta ela oorri in kinnin mina'e, ino piisani asseewwen leena. Waaqa xoori isase piitoppa daaname akka laka in hasnini isaanta ishi harmisha diisheey, in ishsho.

¹⁵ Amma waan malla poqallaayyo nuqusa'e sede lela de'e, qoota samayta ana fuurshe malla Anti orxayteetaayti anka dikade ka kide, ‘Nuqusa kaassumaayyo a orxayteetaadi oorissa in diishooy.’ Nuqusa'en haasawada;

¹⁶ maana malla, nuqusa idakaya ka piitase a Waaqa lehanda ino daashe qara namase ana ka innaayyo patissa faano kelaayye ana orxayteetaadin pahaay.

¹⁷ Anti orxayteetaayti anka dikade ka kide, ‘Poqallaayyo nuqusa, a neeqa ka a paxaara akkeeta'e ooka erkampattoota Waaqa minaay.’ Afa poqallaayyo a nuqusa qaran we anan kayyaneey, Waaqa Poqallaatti a ke olli caado.”

¹⁸ Nuqusa ka iskatteetaseti oorshe ka kide, “Waan ke kaassada mina'e malseeta takka nefo ana turaayye in juutan.” Iskatteetase ka kiite, “Poqallaayyo nuquso haasawado.”

¹⁹ Nuqusa ka ishi kide, “Akka sede kooto'e a ke ajaje Iyyo'aapinni?” Iskatteetase ka ishi oorisse ka kiite, “Poqallaayyo nuquso, maxxaaytinnin xaxanni! Wa atti haasawatte kapaayye nama qindopa kida ettansho in co; a ana ajaje ka ana orxayteetaayti haasoosen piisa afaappa xaaye, orxaytaayti Iyyo'aapi.

²⁰ Orxaytaayti Iyyo'aapi wa malla asse kode, qoota harmissa dikade malla; Poqallaayyo! Atti xoori a Erkampattoota Waaqa mina'e ookuma qapta ka wa piita qara koddina piisa upta.

²¹ Nuqusa ka Iyyo'aapi kide, “Ipaxaari! In oppa saleey, aane ka innasene xayya Apseloomin kale.”

²² Iyyo'aapi ka fuula piitan kaye ka nuqusa kaareeta oorshe ka nuqusa sake. Ka kide, “Atti nuquso, qoota kaassuma a anna orxaytaayti oorisse malla, anti awwe akkiman fuulaayti tura teyyatame in upnaade.”

²³ Iyo'aapi ka xa'e ka Keshuuripa aane ka Apseloomi qeede ka Yursaalamipan kale.

²⁴ Nuqusa xoori ikide, “Tikaadi a mattaadi kara a kallaado diisheey, ildaayyo turanne in akkaannin. Apseloomi ka oori ilda nuqusa turanneew akkaatta diishe ka tika a mattaadi kara kallaade.

Akkima Apesoloomi Taawwiti olli araarame

²⁵ Isira'eeli piisa karaayye xarjaalluma'e nama a Aapseloomi mina peepammo in co. Kanaataadi a loqtati paayyatte haka nyirfaadi a mattati'i qaja in qapo.

²⁶ Qoota nyirfaadi a matta isha ulsaannaan ikka paroppa takkan mujanno malla, oto mujadooyye, hiilta a tika nuqusatinni kiilota lakki qaropeela kayni.

²⁷ Apseloomi hellaa diira sessa ka enenta takka xaayade, maxxaadi nefo Ti'imaari isheetta nefo xarjaallitteeta.

²⁸ Apseloomi ka a ilda nuqusa turan in akkaannin mali Yursaalami kara'e para lakki immakkoota kallaade.

²⁹ Kammadesa Apseloomi nuqusa kapopa isha erkatta malla, Iyyo'aapi kamma erke. Iyyo'aapi xoori isha kapopa deena in heennaanne ikka a lammattati kamma erkeew; umma deena in heennaanne.

³⁰ Apseloomi ka orxayaadi kide, “Tooyya! Dula Iyyo'aapi a xayyo kapa ca ka oppa poorta qapaay, aana ka oopa apitta qapa!” Orxaya Apseloomi ka aanen ka dulase oppa apitta qapen.

³¹ Iyyo'aapi ka oori xa'e ka tika Apseloomipa aane ka ishi kide, “Orxayaatti maana malla duliyyo apitta qapen?”

³² Apseloomi ka ishi oorshe ka kide, “Eten ke halaaccisnooyye qoota a deenin malla akka nuqusa kapopa anto ka isha kaassatto ka kiito, Apseloomi ikiini, ‘Ata kuli maana mallan Keshuuri kara kale? Katin eeyye'ew tawe ana wayyi.’ mallan nessa ke kamma erke. Semmalla amma aane anka fuula nuqusa akko; oton dapa ana qara caayye, ikka kapa alle ana ishsho.”

³³ Iyyo'aapi ka nuqusa kapopa aane ka ishi sede lele. Nuqusa ka Apseloomi hale. Ishi ka nuqusa turopa dehaade ka nuqusa tura fuula piitan kaye ka ishi kaareeta oorshe; nuqusa ka isha dinke.