Mataafa Saamu'eeli a lammatta 12 - Mataafa Qulqulloota

Akka Taawwiti ishin dapaytaadippa oore

¹ Waaqa ka Naataani taawwiti kapopa erke; ikka isha kapopa aane ka ishi kide, “Katama takkan kara nama lakki kala, takka teyantoolayta takka kan teekolayta.

² teyantoolaytase a nama xelloota kaharra isho a okkaya lekaya qapa.

³ Teekolaytase a nama xoori we'en qapo ma sukeenta takka shakka a piddade patta qapa. Ka qohade ikka isha kela hellaadi olli kuttatte ka moossotaadi quda damte ka kuppaayyaadippa ikkite ka isha qara mukte ka kati enentaadi mina.

⁴ Takkaayye, teyantoolaytase qara xaykitta ka de'e. Umma isha xaykittose isha qara de'e damta harmissa'e, xellootaadi a kaharra taaki a okkaya oppa takka qeedeeta ka qaleeta in heennaanne. Se kapaayye sukeentase a teekolayta'e qeede ka xaykittase isha qara de'e qale.

⁵ Taawwiti ka namoose qara a kuttati miiroode ka Naataani kide, “Waaqa caattampaytannen xaxanni, namoose asse kode toota isha parpaaccisni,

⁶ qoota asse kode ka suraysatta dape malla, pakka kahartooseti oppa harka afur oorissa isha faani.”

⁷ Naataani ka Taawwiti kide, “Ha namoose ke, Waaqa Poqalla Isira'eeli ikiini, “Isira'eeli qara'en nuqusuma ke daate ka harka Saa'ooli kela ken pahe.

⁸ Ka tika poqlaayti ke daashe ka iskattaadi kuli ke daashe ka samayta a Isira'eeli isho a Yihuta asseew ke daashe. Oton sede piisa ke qaje nefooyye, a sede qaran qapto ke padaawnin heene.

⁹ Ka kuli maana malla qaaletiyyo a Waaqa tuffatte ka fuuliyyo tura wa neeqa koote? Ka Ooriyo Hittittase orannaappa'e ikasse ka iskatteetaadi qedatte ka xaayti kodatte ka akka Amooneta orannaappa isha ikasso koote.

¹⁰ Semmalla qoota ana tuffatte ka iskatteeta a Ooriyo a Hittitta qedatte ka xaayti kodatte malla, arepadesa nama oranan ishshammo sanynyeetaaytippa in dapado.

¹¹ Waaqa ikiini, “Tikaaytippa'en neequmta ke qara xaasha ka ildaattipadesa iskattaayti ke tura qeeda ka daltaytaayti daasha ikka kuyyaateeyye la'aytoppa ishootta olli muka.”

¹² Atti dekandekatti sede koote ma anti ilda Isira'eeli piisa tura'en kuyyaate la'aytoppa sede koda.

¹³ Taawwiti ka Nataani kide, “Waaqa'en ishin dape.” Nataani ka Taawwiti kide, “Waaqa dapaayti ike diisheey, a tooto;

¹⁴ ma xoori qoota kodoosetin a kuttati Waaqa tuffatte malla, innoosen ke dalade ito'an.”

Akkima inna Taawwiti to'en

¹⁵ Nataani ka oori tikaadipa kale. Waaqa ka innasene a iskatteeta Ooriyo Taawwiti xaayte qara surumta qeede ikka akata paaqni.

¹⁶ Seminan Taawwiti ka innaseneti qinsanni ka damta musani ka kaataadi karopa kullini ka halkeetta piisa piitoppa mukni.

¹⁷ Qimoota tikaadi ka piiteeyye isha xi'issa'e isha kapa qa'anni ikka tiinni. Umma ishootta olli damta dammi in co.

¹⁸ Kuyyaata tappattatiiyyi, innasene ka to'en; saarra Taawwiti ka akkimma innasene to'en isha leleeta fuuren ka kidene, “A inna caaneeyye, oton ishi haasawanninno inon dakayneey, attan akka to'en ishi lella, takka punu isqara'e wa neeqa koda.”

¹⁹ Taawwiti xoori akkima saarraadi hushushaytan olli torraannaane akke ka akkima innasene to'en upnaade ka saarrasene xaadi kide, “Hela innasene ito'ene?” Ikka kidene “Aa! Ito'en.”

²⁰ Taawwiti ka oori piite xa'e ka pisha jaqade ka daata daatade ka mehadda pursade ka tika Waaqa opa aane ka sakatade ka sekamma tikaadipa kale ka damta kaassade ikka ishi daashen ikka dame.

²¹ Orxayaadi ka ishi kidene, “A innoosen caaneeyye, damta musatte ka pooyte ka ete to'eneeyye piite xaate ka damta damteey, wossen a koote maana?”

²² Isha ka kide, “A innoosen caaneeyye in kide ka kide, ‘Ayno upa takka punu Waaqa i'ana suraysada ka innoosen caaysha koddita.’

²³ Amma oori ito'eneey, maana'en damta musanni? Hela amman ishootta desa oorissa ettansha? Ana ishootta kapopa aana diisheey, ishootta ana kapopa in ooran!”

²⁴ Sekammaayye Taawwiti ka iskatteetaadi Persaapehi xasa oorshe ka isheetta qudopa aane ka olli muke. Ikka inna diirta xaayte. Taawwiti ka ishi maxxa kode ka kide, “Selemooni.” Waaqa ka innoosen jaalade;

²⁵ ka xuumampaytase Nataani qudan nessa erke ka maxxa ishi kode ka kide “Yititiyya.”

Akkima Taawwiti katama Raapa pute ka qara pire

²⁶ Sitiiyyi, Iyyo'aapi katama Amooneta Raapa torpe ka mishshikeeta tika nuqusa qara pire.

²⁷ Ka Taawwitipa orra erke ka kide, “Raapa in torpe ka porase a oppa paada pisha co qara pire,

²⁸ Semmalla oton anaaw katamoosen qara piraayye, maxxiyyonne halaamaneey, atti xela oranna a ata hase ollopa oorshe ka isheetta kapa mure ka qara pire.”

²⁹ Taawwiti ka xelase a oranna piisa ollopa oorshe ka Raapaapa tuule ka torpe ka qara pire.

³⁰ Ka kulleeta warqeeta a nuqusaayshoti mattaadi qaraayye qeede. Ulsuma kulleetoseti kiilota kunda sessa keni ka furoota a kokkoka kara qapta, opanka matta Taawwiti qara kalshen ikka katamoosene oppaayye poojeta a kata kuttatin kale.

³¹ Ka orra kara co kulin kale ka akka makaasewwa ka siplowwa isho erkahaddaan koda kodane ishootta kite. Ka akka dooqqeta tika laaqane'e ishootta kode ka katamadda Amooneta piisa qara asseew kode. Taawwiti isho xelase xaadi a oranna piisa ka oori Yursaalamipa tiitaawe.