Mataafa Saamu'eeli a lammatta 11 - Mataafa Qulqulloota

Akkima Taawwiti Persapehi olli sharmuutume

¹ Masaanaappaayye, eta nuqussa oranna tuullaneeyye, Taawwiti Iyyo'aapi isho saarra oranna ka xela oranna piisa tuula erke. Ikka Amooneta puten ka katama Raapa kapa muren; Taawwiti xoori Yursaalami kara'e hase.

² Kuyyaata takka kalaakalaayye, Taawwiti nessuma kuyyaata oppaayye xa'e ka tikaadi a nuqusa qaradesa pora anni ka tikase qara xata iskatteeta takka pisha jaqannitto akke. Iskatteese nefo akatan xarjaallitteeta.

³ Taawwiti ka nama erke ka qoota iskatteeseti desa kaassade. Namase ka kide, “Ha isheetta Persaapehi enenta Ele'aami ka iskatteeta a Ooriyo a Hittitta.

⁴ Taawwiti ka isheetta kamma orra erke ikka deete ka isha kapopa kullite. Qoota juretaadi a leya jaqqatte malla, ikka isheetta olli muke. Ikka tikaadipa tiitaawte.

⁵ Iskatteese ka inna hitte ka Taawwiti erkite ka kiite, “Innaan qapa.”

⁶ Taawwiti ka Iyyo'aapi kamma nessa erke ka kide, “Ooriyo Hittittase ana kapopa erke.” Iyyo'aapi ka Taawwiti kapopa Ooriyo erke.

⁷ Ete Ooriyo Taawwiti kapopa de'eyye, Taawwiti ka Iyyo'aapi ka xelase a oranna isho oranna maanaappa akkima caan isha kaassade.

⁸ Ka Ooriyo kide, “Tikaaytippa kale ka loqqa jaqado.” Ooriyo ka tikase a nuqusati sooke; nuqusa kapa damta ka ishi erkamte.

⁹ Ooriyo xoori tikase a nuqusatiiyyi orxaya a poqallaadi olliiyyi xarra kapa muke diisheey, tikaadipa in kalle.

¹⁰ Ete Taawwiti lelen ka kidene, “Ooriyo tikaadipa in kalleeyye” Taawwiti i'Ooriyo kide, “Pore kalteey, maana'e tikaaytipa a kallin?”

¹¹ Ooriyo ka Taawwiti oorshe ka kide, “Taapota isho Isira'eeleta ka Yihutaata shaakka kela caan. Poqallaayyo Iyyo'aapi isho saarrasene xaayti a poqallaayyo ka lakoppa safaren. Hela kuli anti damta ka ikkayta ka iskatteetiyyo olli mukeeta'en tikiyyopa kala? Napseetaaytinnin xaxanni anti wa asse paha an kodo.”

¹² Taawwiti ka Ooriyo kide, “Awwe are nakaye, parrin ke xaashaay.” Ooriyo ka awwse isho parraytaadiiyyi Yursaalami kara nakaye.

¹³ Taawwiti ka damta Ooriyo hale ikka fuulaadi tura dame; Taawwiti ka isha maashshayshe. Ete halkeettaawteeyye, Ooriyo orxaya poqallaadi kapa mukitta'e qoolaadi afatta aane diisheey, tikaadipa in kalle.

¹⁴ Parraytaadiiyyi teykante Taawwiti ka Iyyo'aapi'i taptaapeta taafe ka Ooriyo qara erke.

¹⁵ Taptaappese kara itaafe ka kide, “Pora oppa orana kokkokiiyyi fuula tura Ooriyo qattishe ka akka torpamo ka to'o'e kamma qaha.”

¹⁶ Ete Iyyo'aapi katamasene kapa mure ka eeyye cooyye ikka pora oppan xela oranna kokokkoka a nyaapa caan a upo oppa Ooriyo kite.

¹⁷ Orra katamaseneti ka sooke ka Iyyo'aapi oli torpen. Xelase oppaayye saarra Taawwiti a oranna lamaya ka le'en. Ooriyo Hittittase kuli ka to'e.

¹⁸ Kammadesa Iyyo'aapi ka otoota orannaseneti piisa Taawwiti erke.

¹⁹ Ka namase a erkino ajaje ka kide, “Oto qoota orannaati desa nuqusa we piisa leltooyye,

²⁰ Nuqusa ka miiroonno ka kiino, “Oranna'e maana'e katamasene kapopa a kuttati dehaatten, akkima kawwatta qaraxata ishin pokkan a upnaanne?

²¹ Ayno Apemeleki inna Kedewooni ishshe? Kawwatta qaraxata iskatteeta isha qara mateeta in kanne ikka Tepeesi kara in toone? Maana'e kawwwatta qudopa a kuttati dehaatteneeyye,” Ishi kide, “Ooriyo Hittittase orxaytase xaayti kuli to'e.”

²² Namase erkame ka Taawwiti kapopa aane ka erkanasene a Iyyo'aapi isha erke ishi lele.

²³ Ka Taawwiti kide, “Orraase i'ino qara kokkonnaade ka lakoppopa ino torpa sooke, ino ka xarra katamaseneti karopa ishootta kalinne.

²⁴ A paantaan ino pokna ka kawwatta qaraxata ino orxayaatti poken; saarrattippa lamaya ka le'en; orxaytase xaayti Ooriyo Hittittase kuli ka to'e.”

²⁵ Taawwiti ka namase erkame kide, “Iyyo'aapi kide, ‘Orannaappa'e kuyyaata takka nama takka tooni, kuyyaata a pilaati a pila'e tooniiy, in qaapan! Japaado ka katamoosen torpe ka qara pire.’ Ka atti kuli xasa ishi oorshe.”

²⁶ Iskatteeta ooriyo akkima diirtaadi to'e ete dakayteeyye, diirtaadi pooyatte.

²⁷ Ete pooyta dikkatteyye, Taawwiti ka isheetta kamma erke ka tikaadipa isheetta teyyade ikka iskatteetaadi koddite ka inna diirta ishi xaayte; ma xoori wa Taawwiti kode Waaqan xasanne.