Mataafa Saamu'eeli a lammatta 10 - Mataafa Qulqulloota

Akkima Taawwiti Amooneta isho Soorata pute

¹ Sekkammaayye, nuqusa Amooneta ka to'e; innaadi Hanuuni ka pakkaadippa nuqusume.

² Taawwiti ka kide, “Akkima aappaaysho ana amanammo mina'e, anti nefo asseewwen Hanuuni inna Na'oosi amanama.” Ka akka toota aappaayshoti malla Hanuuni xasa oorshane'e, isha kapopa orraadi erke, orra Taawwiti ka piita Amooneta opa aanen.

³ Saarra Amooneta ka Hanuuni poqallaassoti kidene, “Hela sede a Taawwiti ke xasa oorissa malla orra ke kapopa erke a aappaayshin ulfeessino ke pahanaatte? Ha akka katamaatti kara tooyan ka lettishan ka qara piran malla.

⁴ Hanuuni ka orrase a Taawwiti erke qeede ka ishootta piisa tupa kawsa paka takkan xata kooshe ka mehaddaasso a kalsadene otantan desa quure ka haka surraati kukumma'ayshe ka tupadesa kalshe.

⁵ Taawwiti ete sede dakayeeyye, orrase xaadi qoota a kuttati jeere malla, ishootta mina'e mina'anayta orra erkeew ka kide, “Haka kawsayshin dehno kara'e, katama Iyyaarko kara jara ka kuli kala.”

⁶ Amoonata ka akkima Taawwiti harkan isqara miirasse upnaatte ka Soorata Peetirehoopi isho a Soopa oppaayye xela oranna a loqqaan torpina nama kuma kunda lakki ka orra Toopi nama kuma kudanka lakki ka nuqusa Ma'ika a nama kuma takka isquda qapo xaayyatte.

⁷ Taawwiti ete sede dakayeeyye, Iyyo'aapi isho xelase a oranna piisa tuula erke.

⁸ Amooneta ka sookte ka xarra katamaassoti pora qapatte. Soorata a Suupa ka Are'aapi isho orra Toopi ka a Ma'ika ka xaayshotin lakoppa pora qapaden.

⁹ Iyyo'aapi akkima orana fuuledesa ka tulte desa isha torpa harmisade ete akkeeyye, xela Isira'eeli oppaayye xormewwa lamaya reexe ka Soorata tura ishootta pora qapsiise.

¹⁰ Ka xela ata hase qara'e, innaasso Apisaayi saara kode ka Amooneta tura ishootta pora qapsiise.

¹¹ Ka ishi kide oton Soorata ana qara kokkonnaanniiyyi, ana awwle. Oton Amooneta ke qara kokkonnaanniiyyi anti in ke awwlaay.

¹² Japaado! ka samaytinno isho katamadda Waaqinno malla torpina, Waaqa ka wa ishi aaka kodo.

¹³ Iyyo'aapi isho xelase isha quda co ka Soorata torpeeta dehaaden. Soorata ka ishootta tura qahate.

¹⁴ Akkima Soorata qahate Amooneta ete akkiteeyye, isheetta kuli Apiisaayi tura alle qahateew ka katamaapa kalte; Iyyo'aapi ka Amooneta kamma alle oore ka Yursaalamipa tiitaawe.

¹⁵ Soorata akkima Isira'eeleta tura putamte ete akkiteeyye, oli pohoteew.

¹⁶ Hataati'eseri ka Soorata Efratiisiiyyi a kama disiti kitto kamma erke ikka deete; saarase a xela Hataati'eseeri Shopaaki ka saaraysho kodde ikka Helaami karopa tuulte.

¹⁷ Taawwiti ete sede dakayeeyye, xela Isira'eeli piisa ollopa oorshe ka kirra Yurtaanoosi tuulle ka Helaamipa tuule; Soorata ka pora qapatte ka isha qara orana qitisse.

¹⁸ Soorata ka Isira'eeleta tura qahate; Taawwiti ka Sooratase oppa'e, a sarakeellaan torpina nama dippa tappa ka a fartan torpina nama kuma kunda afur leyshe ka saaraysho Shopaaqi qare ikka eeyye'ew to'e.

¹⁹ Nuqussasene Hataati'eeseri kela ca akkima Isira'eeleta tura putamene akken ka Isira'eeleta olli araaramen ka isheetta piddamen. Soorata ka lammatta Amooneta qaarqaara fuurte.