Mataafa Saamu'eeli a lammatta 1 - Mataafa Qulqulloota

Akkima Taawwiti toota Saa'ooli dakaye

¹ Toota Saa'ooli kammaayye, ete Taawwiti Amalaqeeta pute ka kaleeyye, katama Siqlaaki kara kuyyaata lakki pire.

² Kuyyaata sessattatiiyyi, nama takka mehadda a kalsade isquda kakkaa'e ka matta qara kuyyaalayta fidade ka safara Saa'ooliiyyi de'e ka ete Taawwiti kapa kayeeyye, xata kide ka ishi kaareeta oorshe.

³ Taawwiti ka isha kaassade ka kide, “ayshaayye' deeni?” Ikka ishi kide “Safara xela oranna a Isira'eeli karan qahe ka deeni.”

⁴ Taawwiti ka ishi' kide, “Maana kodde? Intoonno ana' leleey.” Ikka ishi' kide, “Oranase tura xela oranna alle qahe; ishoottoppa lekaya ka piitandesa seehen ka le'en. Saa'ooli isho innaadi Yoonataani kuli ka le'en.”

⁵ Taawwiti ka xayyoolayse ishi otootase' lele kide, “Akkima saa'ooli isho innaadi Yoonataani le'en maanaanne' upnaatte?”

⁶ xayyoolaytase ka ishi' kide, “Anti xayyooyyen irroota Kilpo'a qara ca. Saa'ooli ka oranaadi quda teesade kaarreetta oranna isho xela fartan torpino ka isha qaatqaate.

⁷ Ikka iskammandesa tooyyade ka ana akke ka ana hale. Anka ehade;

⁸ Ikka ana kaassade ka kide, “Atti a ayno?” Anka kide, “Anti an Amaleqitta.”

⁹ Ikka ana' kide, “Akatan qarame umma ata an tooneey, xooye ka alle kela ana pire.”

¹⁰ Anka ete piitan sookeeyye, akkima in caannin akke ka alle kela isha pire ka mattaadi qara kulleetaadi a nuqusa isho harkaadi mina tuma qeede ka tin poqallaayyo ke ishin de'e.”

¹¹ Taawwiti isho xelase isha quda co piisa ka nyarrahatan mehaddaasso isquda kakkaa'en.

¹² Ka qoota Saa'ooli ka innaadi Yoonataani isho qoota xelase a Waaqa ka qoota leknase a Isira'eeli orannaappa le'e malla haka dumaatati damta musaden ka nyarrahen ka pooyen.

¹³ Taawwiti ka xayyoolayse otootase ishi' lele kaassade ka kide, “Atti aysha' deete?” Isha ka kide, “Anti an inna kalayta a Amaleqitta.”

¹⁴ Taawwiti ka ishi kide, “Ka kuli ete nama Waaqa daatade qaropa harkaayti xa'innittooyye, atta a fuurrin?”

¹⁵ Taawwiti ka xelaadi a oranna oppa takka hale ka kide, “Aane ka ishshe!” Ikka dote ka ishshe.

¹⁶ Taawwiti ka ishi kide, “Keew afaattin isqara' maakkume ka kide, “Nama a Waaqa daataden ishsheey.” Diikaayti ke'ew taqqeela.

Saara pooyta a Taawwiti Saa'ooli isho Yoonataani' saarshe

¹⁷ Taawwiti ka pooye ka saarosen a pooyta Saa'ooli isho innaadi Yoonataani saarshe.

¹⁸ Ka akka samayta Yihuta saarosen kollishane ajaje. Ikka mataafa Yashaari kara taafamte ikka kide,

¹⁹ “Oo Isira'eeli, saara ulfeenaayti atta irrowwa qara pi'e! Xormewwaatti ka seehen.

²⁰ Tuparra Filisteemi akka in xasoonnini'i tuparra orra dawra qara in murannin ka in ililiwnini'i otootose katama keettiti in torran umma porra Asqeloona oppa in salishan.

²¹ Ishina irrowwa Kilpo'atiiyyi! Kontaleeta a xorma oranna'e ishin qara jeereey, kontaleeta Saa'ooli ka sayteetan shohama dapteey, tadahata taaki roopa ishin qara in pi'inin umma dullaasin a unta palanna oppa we in sakkattinin.

²² diika orra le'e isho moora irrelaya qaraayye, paanta Yoonataani iskammopa in oorre, umma koraateta Saa'ooli assepatta in tiitaawne.

²³ Saa'ooli isho Yoonataani oli jaalanni ka jaalatammi umma caatta ka tootoppa olkela in qootamme jarjarta'e kawwaarayta qaropa ka kokkonnuma karma qaropa'e qapan.

²⁴ Ishina tuparra Isira'eelitiiyyi! Saa'oolise rufta tiima a heraan kokkookatin ishin uwwishe ka uwwaassin warqeetan sire pooya.

²⁵ Ata irrelaya atta orannaappa seehen, Yoonataani irrowwaatti qara'e ishshame ka eeyye pi'e.

²⁶ Innaanno Yoonataani a kuttatin ke nyarrahani; akuttati ana xasasse jaalala ana qapta orra qawwanni ka jaalala iskatta qaropa qapan.

²⁷ Xormewwaatti ka atta seehen! meeha oranna ka asse patta pate!”