Mataafa a Nuqussa a lammatta 9 - Mataafa Qulqulloota

Akka Iyyu nuqusa Isira'eeli kodda daatame

¹ Xuumampaytase Elsa'i ka olqapa xuumampaya oppaayye takka hale ka ishi kide, “Ohaataayti opeela hiddado ka muuddosen a sayteeta qapado ka katama Raamooti kele'adi opa aane.

² Ka oto eeyye kaytooyye Iyyu inna Iyyoosafiti oopa a Niimishi pora fade ka isha kapopa aane ka poraadippa xawwi isha qeede ka kaata karopa isha kullishe.

³ Ka muuddasene a sayteeta qeede ka matta qara ishi tuqe ka ishi kide, “Waaqa ikiini, ‘Akka Isira'eeli qara nuqusa koddito'en ke daate.’ Ka atti oori, xarra panado ka qahe diisheey in jaran.”

⁴ Semmalla xayyoolayse a xuumampayta ka Raamooti a kele'adi opa aane.

⁵ Ete eyye kayeeyye, saarra xela oranna'e eeyye pora takka ollin qaa'en. Ikka akke ka kide, “Saaritto, erkana an ke lela'en qapa.” Iyyu ka kide, “Inoppa ayno'e lelta?” Isha ka kide, “Saaritto ke'en lela.”

⁶ Iyyu ka xa'e ka tika kelopa kulle. Xuumampaytase ka sayteetase mattoppa ishi tuqe ka kide, “Waaqa Poqalla Isira'eeli ikiini, ‘Akka samaytiyyo a Isira'eeli qara nuqusa koddito'en ke daate.

⁷ Anti diika orxayaayyo a xuumampaya isho diika orxaya a Waaqa a Elisaapeeli tuqte piisa kapa'en haalota pooyyaay, atti toola Aki'api a poqallaatti'i patissa.

⁸ Toola a aki'api piisa pata; orxaya koddite ka in koddinin hellaa a diira a Isira'eeli kara ca a Aki'api piisa in qishsha.

⁹ Tika Aki'api akka tika Iyyorpi'ami a inna Naapaati ka akka tika Pe'isha a inna Akiyaali mina koda.

¹⁰ Kutta ka dula Iyyisira'eli oppa Elsapeeli daman umma nama isheetta hawlo in caado” Ka xarra panade ka qahe.

¹¹ Iyyu ka xeliyyasene xaadi a saarra oranna kapopa tiitaawe. Ishoottoppa takka ka isha kaassade ka kide, “Hela we piisa nakaytaawwe? Taarayse a nama maana'e ke kapopa de'e?” Iyyu ka kide, “namoose isho waadi a haasawanna i''uptan.”

¹² Ishootta ka kidene, “Ini dukaatanneey ino lele.” Isha ka ishootta kide, “I'ana kide, Waaqa ikiini, ‘Akka Isira'eeli qara nuqusa koddito'en ke daate ka asse ka asse ana kide.”

¹³ Ishootta piisa ka jarjartan mehaddaasso a kalsannaane isquda sookshen ka pora fayyumaati loqaadi kela afen ka kaasa dawen ka nessa kuttan kidene, “Iyyu inuqusume!”

Iyyu akka Iyyoraami isho Akasiyaasi leyshe

¹⁴ Sekkammaayye Iyyu inna Iyyoosafiti oopaase a Nimiishi nuqusase Iyyoraami qara'e sullaata kode. Sede turan Iyyoraami isho Isira'eeleta piisa akka Asaaheli nuqusa Sooriya ishootta qara Ramoot kele'adi in qeennini'i tooytini.

¹⁵ Nuqusase Iyyoraami xoori ete Asaaheli nuqusase Sooriya oli torpeneeyye, qoota soorata isha qarte malla, sede a datta'e Iyyisira'elipa aane. Iyyu ka saarrasene isha olli caati kide, “Oton ana olli kittaneeyye, akka otootose Iyyisira'eli kara in torrinini'i nama takka nefo akka katama kara in sooknini tooyta.”

¹⁶ Iyyu ka sarakellaadi qaropa fayyade ka nuqusase Iyyoraami a IyyIsira'eeli kara paaqno a nuqusa Yihuta Akasiyaasi eeyyepa isha tooyya aane kamma aaneew.

¹⁷ Tooytampaytase kawwatta a tooya a Iyyisira'eli qara qa'ade ete xela a Iyyu deeno akke ikide, “Xela oranna deenoon akkini.” Iyyoraami ka ajaje ka kide, “Nama fartan keerro xeloose turopa erke ikka kaassado ka kido, ‘Nakayta'ewwe deenittane?’”

¹⁸ Namase fartan kulufno ka xelase a Iyyu turopa aane ka ishootta kide, “Nuqusa ikiini, ‘Hela nakayta'ewwe deenittane?’” Iyyu ka ishi kide, “Nakayta kaassatta ke mina tooyni in cooy, ana kamma qate ka xooye.” Tooytampaytase ka kide, “Namase erkame i'ishootta kapa kaye ma desa oorri in co.”

¹⁹ Nuqusa ka a lammattati nama fartan keerro erkeew. Ikka ishootta kapa kaye ka ishootta kaassade ka kide, “Nuqusa ikiini, ‘Hela nakayta'ewwe deenittane?’” Iyyu ka ishi kide, “Nakayta kaassatta mina a qanneey, ana kamma qate ka xooye.”

²⁰ Tooytampaytase ka kide, “Namase erkame idesa kayeew ma oorri in co; saara xelooseti nefo a taarayta mina'e sarakellaadin kulufini. Kulufaadi nefo a Iyyu a inna Niimishi paha.”

²¹ Iyyoraami ka oori kide, “Sarakellaayyo ana harmisha.” Ikka sarakellaadi ishi harmishen. Nuqusa Isira'eeli Iyyoraami isho Akasiyaasi nuqusa Yihuta ka sarakeelladdaasso qaropa fafayyaden ka sooken ka Iyyu turopa aanen ka dulase a Iyyisira'elitta a Naapute oppa isha mina kayen.

²² Iyyoraami ete Iyyu akkeeyye, ikaassade ka kide, “Hela Iyyu nakayta'ewwe deeni?” Iyyu ka ishi oorshe ka kide, “Haka killanna sakatatta isho suuma aayyaasina a Elsapeeli asse koopeeyye, nakayta maana'e ca?”

²³ Iyyoraami ka sarakellaadi tiitayshe ka alle qahe ka Akasiyaasi kide, “Ha sede falqa.”

²⁴ Iyyu ka paantaadi titte ka Iyyoraami tupa otantatoppa pokke. Lawase ka sataatoppan ishi sooke ikka sarakellaadi karanxataaw pi'e.

²⁵ Iyyu ka Pitiqaani saarase a xelaadi a sarakellaati kide, “Pukkaadi qeede ka dulase a Naapute a Iyyisira'elitta oppopa kate; kuyyaatan ke isho ana sarakelladdaanno qara fayyanneeyye ka aappaaysho Aki'api kammadesa anninnooyye akkima Waaqa rakkoose a isha qara qeeda'e xuuma haasawade matte oorsado.

²⁶ Waaqa ikiini, ‘Diika Naapute isho a hellaadi xala in akke; ka duloose oppa'ew ke qara haalota pooyya.’ Semmalla akka Waaqa haasawade mina'e, pukkaadi qeede ka duloose oppopa kate.”

Akka Akasiyaasi nuqusa Yihuta to'e

²⁷ Akasiyaasi nuqusase a Yihuta ete sede akkeeyye, pora a katama Petihakaani'i qapade ka qahe. Iyyu ka kamma daanni ka salinni ka kiini, “Isha kuli ishsha!” Ishootta ka katama Yupile'ami kapaayye pora mara Kuuri quda sarakellaadi kara isha pokken ka qaren. Ikka katama Mekido opa qahe ka eyye to'e.

²⁸ Saarraadi ka sarakellaadi qara'ew isha fee'en ka Yursaalami opan kalen ka Yursaalami katama Taawwiti karaayye, turkaasso kara aappadaasso kapa mooken.

²⁹ A Iyyoraami inna Aki'api Isira'eeli qara nuqusume para kudanka takkattatiiyyi, Akasiyaasi Yihuta qara'e nuqusume.

Akka Elsaapeeli ishshen

³⁰ Sekkammaayye Iyyu ka katama Iyyisira'eli opa aane. Elsaapeeli ete sede dakayteeyye, ilda kela siratte ka nyirfaadi doopatte ka maskootetoppan tooyanni.

³¹ Ete Iyyu xarra katamaati kullinooyye, i'ishi kiite, “Ke a poqallaatti ishshe Simiri, hela nakayta'ewwe deete?”

³² Iyyu ka qinda maskooteta opa tooyyade ka kide, “Ata ayno ana quda koddini?” Kunayaappa nama lakki isho sessa mina co ka ishopa tooyyaden.

³³ Iyyu ka ishootta kide, “Isheetta kamma xata kata.” Ishootta ka kamma xata katen. Diikaadi ka kawwatta isho fartada qarandesa fidame; Iyyu ka qarandesa fartada qule ikka qara diddiiten.

³⁴ Iyyu ka kulle ka dame ka ikke. Ka kammadesa kide, “Iskatteese jiijamte qeeda ka hawla enenta nuqusa'eey.”

³⁵ Ete hawla aaneneeyye xoori, pukurkuraadi a matta isho lafa loqqaadi ka a harkaadi mali we takka nefo in akkine.

³⁶ Ikka tiitaawen ka sede Iyyu lelen. Iyyu ka kide, “Ha ini afaasene a Waaqa orxaytase xaadi Eeliyaasi Tesipittase qudan haasawade ka kide, ‘Piita Iyyisira'eli kara duloppa kutta pukka Elsaapeeli daman;

³⁷ Qoota So'adi piita Iyyisira'eli kara duloppa a kuufa mina fidaman malla, nama arepadesa ini Elsaapeeli kida in ettansho’ kide sede.”